خلال ثلاث سنوات عزلت 3 مرات، طبعًا ممكن يكون للبعض رقم قليل حيث إن في شخصيات هوايتها العزال والترحال، لكن مع وجود أطفال رضع وفي سن الحضانة، بيتحول العزال لمارثون مهلك واختبار لضبط النفس.. خصوصًا لو مش عارفة تبدأي منين؟ وتبدأي إزاي؟ أو لو شركة الشحن والنقل هتنقلك الأثاث فقط والباقي عليكي مهمة تغليفه وتحضيره (بعض الشركات لا توفر خدمة التعبئةوالتغليف أو بتوفرها بمبالغ باهظة جدًا). لذلك في السطور التالية هاشركك من واقع الخبرة والتجربة أسهل خطوات النقل لبيت جديد (العزال).
خطوات النقل لبيت جديد
أول مرّة عزال كان الموضوع صعب ومرهق وكئيب، في المرات التالية كان أسهل وأسهل رغم وجود الأطفال، لكن لإن تكرار التجربةبيضعك على أول سلم أهل الخبرة، لذلك أول تساؤل سيتبادر لذهنك مع التفكير في النقل لبيت جديد والعزال وخطوات نقل عفش المنزل هو، ابدأ منين؟
أول شيء بيجي في بالك، الصريخ والانفعال وإحساسك إن كل الشقة فوق رأسك –حرفيًا-، علشان كدة، ابدأي بالخطة دي؛ بعد تحديد معاد النقل بتحطي لنفسك خطة للتفريغ، وليكن محتاجة أسبوع لتفريغ الشقة بالكامل حسب عدد الغرف وإذا كنتي بتشتغلي أو لأ وفي مساعدة أو لوحدك.
جمعي وغلفي وفرغي محتويات البيت حسب الغرف، وليس الأنواع، يعني فرغي غرفة غرفة بكل محتواياتها
(ملابس،أدوات،أجهزة،سجاد، ستاير، وهكذا) ابدأي بغرفة السفرة والصالون ثم غرفة نوم والمعيشة، وأخر شيء غرفة الأطفال والمطبخ وأي رفايع بتستخدم يوميًا.
ليه التكنيك ده في التفريغ؟ لإنه أفضل تكنيك يحسسك بالإنجاز، ويساعدك لما تيجي تفرشي في البيت الجديد، لإنك تلقائيًا هتدخلي محتويات كل غرفة في مكانها، بدون كركبة أو هاجس ضياع المتعلقات. التفريغ حسب النوع بياخد وقت وجهد أكبر، بيحسسك إنك تايهة، ومفيش شيء بيخلص، ومن ناحية تانية بتحسي إن الشقة كلها اتكركبت
مرة واحدة فجأة. وده اللي حصلي أول مرّة وحسيت بالفرق العظيم لما استخدمت تفريغ الغرف بالترتيب السابق.
لاحظي إننا بنعمل عكس التكنيك ده وقت الفرش.
تعرفي على: 4 خطوات لدهان الشقة بنفسك
تحضير كراتين للنقل وأدوات العزال
من أهم خطوات النقل لبيت جديد وتجهيزات العزال هي نقل عفش المنزل بدون تلفه، لذلك هتحضري الأدوات كاملة علشان متتعطليش في النص وهي؛
- كراتين تقيلة للزجاج ومشتقاته (بتتباع في محلات مخصصة أو ممكن تشتريها من السوبرماركت الكبيرة في نهاية مواعيدالعمل) راعي تكون تقيلة ومتقفلة كويس جدًا.
- سلوتيب عريض وقوي
- شنط سفر وشنط ضغط الهواء للملابس والمفروشات (عملية جدًا وشفافة تسمحلك تشوفي اللي جواها علشان الحيرة) هتلاقيهافي السوبرماركت الكبيرة.
- مقص وورق وماركر لكتابة محتوى كل شيء تم تعليبه وتغليفه.
- بابلز أو رول الفقعات زي اللي بنلاقيه في تغليف الأجهزة الجديدة.
- دباسة
- أكياس بلاستيك تقيلة وكبيرة زي أكياس القمامة
- رول استريتش شفاف للتغليف النهائي (كلينج فليم)
خطوات نقل عفش المنزل
خطوات نقل عفش المنزل والنقل لبيت جديد بتبدأ عادة بجهود جماعية لكل أفراد الأسرة وأحيانًا بمشاركة شركات شحن الفرش..كالآتي؛
- هتبدأي تغلفي الزجاج الأول، محتويات النيش والسفرة والمطبخ الزجاجية، تلفي برول البابلز وترصيهم بحيث يكون التقل متوزع صح،متحطيش كاسات خفيفة مع أكواب تقيلة أو زجاجات مياه مثلاً، كذلك الأطباق والفناجين، وسدي الفراغات بين محتويات الكرتونة بقطع أسفنج أو فوم أو قماش أو لعب أطفالك السوفت الصغيرة. وأهم شيء، تكتبي ع الكراتين إنها زجاج قابل للكسر وتنبهي على عمال النقليتعاملوا بحرص وحذر.
- الملابس والمفروشات بكل أنواعها تتغلف نضيفة ومغسولة علشان تطلع ع الفرش مباشرة، كل ستارة يكون معاها كيس صغير فيه دبل، الستاير والتعليقات، والملابس تتشال حسب النوع، الشتوي والصيفي وأطفال أو كبار، البراويز واللوحات والتحف تتغلف زي الزجاج بالظبط.
- كل المحتويات المهمة زي الدهب، اللاب توب والأجهزة الصغيرة، ورق مهم) لازم تتشال قبل ما تبدأي تغلفي علشان متضعش في النص، ويفضل توديها في مكان موثوق فيه لحد عملية النقل كلها ما تتم على خير.
- بعد ما تخلصي تفريغ التقايل كلها، هايتبقى رفايع زي أدوات التنظيف، الأحذية، أدوات العناية الشخصية في الحمام) هنا بتغلفيهم حسب نوعهم وتتأكدي إنك قافلة الأغطية كويس جدًا بسلوتيب أو دباسة.
ودلوقتي عرفنا هنبدأ إزاي؟ فرغنا الغرف؟ قفلنا ولصقنا كل شيء كويس واتأكدنا من حمولة الكراتين متوسطة مش تقيلة ولا خفيفة، هيتبقى شوية خطوات هتسهل علينا أكتر وأكتر.
ملحوظة: شركات الشحن هي اللي بتغلف وتفك الأثاث والنجف والأجهزة الكهربائية لإنها بتحتاج متخصصين محترفين للفك والتركيب.
نصائح النقل لبيت جديد بسهولة
ودلوقتي وصلنا مرحلة أعلى درجات الأدرينالين خلال مرحلة النقل لبيت جديد وتجهيزات العزال الأخيرة، وقت العزال خلال 24 ساعة تقريبًا ومحتاجة تتأكدي من تقفيل كل شيء صح وإنك منستيش حاجة، ورقة وقلم واكتبي معايا يا ست الكل هذه النصائح الذهبية اللولبية؛
- اتخلصي من الكراكيب..الكراكيب سم قاتل، ده حقيقي، هتستهلك طاقتك وجهدك ومش هتخلص، هدومك اللي صغرت عليكي،لعب أولادك اللي اتكسرت أو صغرت عليهم، الأطباق المستهلكة، والبرطمانات اللي قربت تغزو مطبخك، في كل الأحوال كلواحد فينا أدرى بكراكيبه، حرفيًا هتوفري نص مجهود النقل والتغليف والفرش فيما بعد، هتسيبلك براح في بيتك وروحك، وهتحسي إنك فعلاً رايقة وبيتك رايق.
- كل غرفة متغلفة مكتوب علي كراتينها نوع الغرفة ومحتوى الكرتونة بخط عريض.
- في شنطتين أهم من الشقة كلها، شنطة في ملابس ليكي ولأسرتك تكفي أول يوم بعد العزال مع احتياجاتكم الأساسية (شامبو وصابونة وفوطة وأدوية يومية وبامبرز وشبشب بيت وهكذا حاجات الاستخدام اليومي الضرورية) وشنطة فيها كام طبق بلاستيك وكوبايتين ومعالق علشان الأكل والشرب خصوصًا للأطفال)، ده هيسهل عليكي جدًا إنك تفرغي وتفرشي بيتك بهدوء، بدون استعجال أو توتر أو قلق إنك محتاجة ضروريات من الشنط المقفولة.
- ابعتي السجاجيد تتغسل قبل النقل في مكان مخصص، وخليهم يوصلوها بعد تنضيفها للبيت الجديد مباشرة.
- كلمي كل شركات الصيانة والتركيب والغاز في أسبوع ما قبل النقل وحددي مواعيد في أول أيام بعد العزال هتوفري وقتوتنجزي فتفرشي أسرع.
- الملابس اللي ينفع تتشال بالشماعات شليها كدة بطريقة تكيسها في أكياس بلاستيك تقيلها ولصقها بالسلوتيب العريض عندالشماعة.
- التلاجة والديب فريزر فضيهم تمامًا قبل النقل بيوم، ممكن تستعيني إنك تحفظي الأكل عند حد مقرب، والأفضل إنك تعملي حسابك تستخدمي وتخلصي محتوياتهم خلال فترة النقل علشان مفيش حاجة تفسد أو تترمي.
- محتويات الروتر والتليفزيون تتحط في شنطة ويتكتب عليها خاصة بأي شاشة لو في أكتر من جهاز، ده هيسهل جدًا وقت، تركيبها ويجنبك ضياع الأسلام والفيش وما إلى ذلك.
مترميش سلك أو مشترك أو فيشة أو بطارية، خلي في شنطة فاضية للحاجات التايهة لإنك هتلاقيلها استخدام بعد ما تنقلي. - الملابس والمفارش فرغيهم مطبقين في شنط سفر أو أكياس ضغط، بلاش كراتين لتجنب بهدلتهم.
- قبل ما تفرغي محتويات كل غرفة صوريها على وضعها، صوري النيش، وضلف المطبخ وضلف البوفيه والدواليب، علشان وقت الفرش متحتاريش ايه كان بيتحط فين وإزاي.
- افتكري إنك بتبدأي دايمًا تفريغ المحتويات الغير مستخدمة ووقت الفرش بتبدأي بالعكس، افرشي وفرغي الأكثر استخدامًا ثم الأقل استخدام.
- بعد النقل بسلام، دخلي محتويات كل غرفة مكانها، وارتاحي أولاً مع دش دافي وأكلة حلوة وكوباية قهوة تعينك على تكملة الفرش والترتيب، وهنا بنصحك تستعيني بعاملة تنضيف ومساعدة علشان بتكون طاقتك وصلت للنهايات.
في النهاية أهم نصيحة هاقولهالك وانتي بتحضري خطوات النقل لبيت جديد، افرحي، فكري في البيت الجديد، المكان اللي لسة هتخلقي فيه ذكريات حلوة، التغيير وإنعكاسه علىروحك وأسرتك، التعب بيعدي ويتنسي ويخلص، متفكريش فيه.. بصي للكراتين وتخيلي محتواياتها في بيتك الجديد. تخطي مرحلة التكدير والكآبة، لإن العزال في الأخر عتبة جديدة برزق جديد.
