زماااااان..
إحم.. لأ الحقيقة مش زمان قوي، من سنة واحدة تقريبًا، قبل تضاعف الأسعار، كان الدلع مفيش أسهل منه.
العالم يقفل في وشي أروح أشتري قلم روج أحمر يفتح أبواب العالم. الدنيا تسود أنزل أجيب فستان مليان ورد يرجَّع للدنيا فرحتها. كنت مهشتكة نفسي ومدلعاها، وإشي كريم لليل وكريم للنهار، وكريم للهالات ومنظف وتونر ومواويل كتير.
بس فجأة كل حاجة غليت بشكل جنوني، سواء المنتجات المحلية أو المستوردة. وبقينا بنقتصد جدًا في استخدام المنتجات دي، ولو حاجة خلصت بنتردد كتير قبل ما نجيبها تاني، خصوصًا لو حاجة مش أساسية. أو بندور على بديل أرخص.
عشان كده النهارده معانا مجموعة من الطرق لبدايل طبيعية وموفرة لأغلب منتجات البشرة والشعر والدلع كله.
بدائل طبيعية للعناية بالبشرة
غسول للبشرة
المكونات:
- ربع كوباية صابون طبيعي مبشور (زي الصابون النابلسي أو صابون الغار).
- نص معلقة زيت لوز أو زيت جوز هند.
- عشر نقط زيت عطري (زي زيت شجرة الشاي أو زيت البرتقال).
- تلتين كوباية مية.
الطريقة:
اخلطي المكونات كلها وقلِّبيها كويس لحد ما الصابون يدوب، واحتفظي بيها في إزازة نضيفة واستخدميه يوميًا نفس استخدامك للغسول.
وطالما اتكلمنا عن الغسول يبقى لازم نتكلم عن التونر
اقرئي أيضًا: أهم 10 نصائح للصيف: العناية بالبشرة في فصل الصيف
التونر
التونر هو الخطوة اللي بعد الغسول، بيرجّع مسام البشرة لحالتها الطبيعية، وبيعيد التوازن للبشرة. فيه مكونات طبيعية كتير ممكن تستخدم كتونر. جربيها وشوفي إيه منها مناسب لبشرتك.
الشاي الأخضر المُركَّز: بسيطة خالص، فنجان شاي أخضر تقيل حبتين (يعني ضاعفي كمية الشاي أو قللي المية لنص الكمية اللي متعودة تستخدميها). بعد ما يبرد تقدري تستخدميه بعد الغسول. وممكن يفضل في التلاجة لحد أسبوعين.
تونر ماء الورد: طبعًا مشهور جدًا، ماء الورد سعره معقول وسهل تلاقيه، يُفضَّل تجيبيه من أماكن مضمونة عشان تضمني تركيزه.
جيل الصبار: سواء جيل الصبار المعبأ أو جيل الصبار الطبيعي.
ترطيب البشرة
الحقيقة استجابة أنواع البشرة مختلفة للمرطبات المختلفة، لكن فيه زيوت كتير معروفة بفاعليتها للبشرة، زي مثلاً:
زيت الزيتون، زيت اللوز، زيت جوز الهند، زيت الجوجوبا.
وبالنسبة للبشرة الدهنية ممكن تستخدم جيل الصبار مضاف له نقط بسيطة من زيت خفيف زي زيت اللوز مثلاً، وتبعد عن الزيوت التقيلة زي زيت الزيتون.
وفي كل الحالات مينفعش نتعرض للشمس والزيوت دي على بشرتنا، فيُفضَّل إنها تتحط قبل النوم.
ممكن كمان نستعمل كريم مرطب طبي، فيه أنواع رخيصة زي البانثيونول مثلاً.
تعرفي على: إزاي تعملي spa في البيت
ترطيب الجسم
بالنسبة للجسم ممكن برضو تستخدمي الزيوت دي أو زبدة الشيا، وممكن كمان تستخدمي زيت الأطفال الموجود في الصيدليات وسعره معقول، وضيفي عليه نقط بسيطة من زيت عطري بتحبيه.
جل تعقيم اليدين
جيل تعقيم اليدين من الحاجات المهمة في شنطتك، ومؤخرًا الأنواع المستوردة منه أسعارها بقت مستعبطة على الآخر. دي طريقة بسيطة لصناعة جيل معقم الإيدين:
المكونات:
- ربع كوباية جيل الصبار
- معلقة كبيرة كحول
- 10 نقط زيت عطري زي (زيت شجرة الشاي، أو زيت النعناع، أوزيت اللافندر أو زيت القرنفل)، مش بس عشان الريحة الجميلة المنعشة، لكن الزيوت العطرية ليها خواص مُطهِّرة ومضادة للفطريات.
- نص معلقة جلسرين (عشان نحمي إيدينا من الجفاف اللي بيسببه الكحول).
الطريقة:
هنخلط المكونات كلها كويس ونحفظها في إزازة أو برطمان معقم.
تعرفي على: 5 خلطات تجميلية قد تُدمِّر صحتك
مزيل الماكياج
المكونات:
- كوباية ونص مية
- معلقتين شامبو أطفال
- معلقة كبيرة زيت جوز هند
الطريقة:
اخلطي المكونات كلها كويس واحفظيها في برطمان معقم، وممكن تحطي في البرطمان قطع القطن المدورة ويبقى بديل للوايبس.
تنظيف الشعر
عشان تنضفي شعرك كويس، وتتخلصي من الترسبات وقشرة الشعر، استعملي خل التفاح المخفف بالمية بنسبة 1:1 في شطف الشعر
جيل الشعر
جيل الشعر أو مثبت الشعر أحيانًا بيسبب جفاف الشعر بسبب الكيماويات المستخدمة فيه، وعشان كده ممكن تعمليه من مواد طبيعية.
المكونات:
- ربع كوباية بذر الكتان (وده سهل تحصلي عليه من العطار)
- كوبايتين مية
- نص معلقة صغيرة زبدة شيا أو زيت زيتون (اختياري)
- 10 نقط زيت عطري
الطريقة:
- حطي بذر الكتان والمية في حلة على النار وابدئي اغليه، وسيبيه على النار 10 دقايق يغلي مع التقليب المستمر، ولحد ما يبقى قوامه سميك وشبه الجيل.
- اطفي النار وصفيه بمصفاة ضيقة أو بشاش عشان تتخلصي من أي شوائب فيه.
- ضيفي عليه زبدة الشيا أو زيت الزيتون.
- بعد ما يبرد ضيفي عليه الزيوت العطرية.
- حطيه في برطمان نضيف واحتفظي بيه في التلاجة لحد أسبوعين.
برايمر الماكياج
البرايمر بيستخدم قبل الماكياج عشان يديكي بشرة خالية من الشوائب وملمسها متساوي، ويخفي مشاكل البشرة زي المسام الواسعة مثلاً، واللي بتخلي الماكياج شكله مش حلو، وغالبًا بيبقى أساسه من السليكون.
– بديل البرايمر: حاجة بسيطة جدًا، جيل الصبار، بدون أي إضافات. حطي طبقة رقيقة من جيل الصبار، وبمجرد ما تنشف ابدئي حطي الماكياج بالطريقة المعتادة.
منتجات طبيعية مفيدة للبشرة
فيه منتجات طبيعية بتلعب في حياتنا أدوار كتير، ووجودها في البيت خير وبركة الحقيقة، زي مثلاً:
زيت جوز الهند: ده بيلعب أدوار كتير قوي، ترطيب بشرة شغال، مزيل ماكياج شغال، مرطب شعر شغال، بس خدي بالك.. مش كل أنواع الشعر بيتناسب معاها، فيه شعر بيستجيب معاه زي السحر، وشعر تاني بينشفه جدًا، أنا بناتي الاتنين واحدة كان رائع معاها وواحدة نشف شعرها، مع إن طبيعة شعرهم تبان قريبة من بعض.
زيت الزيتون: مرطب للشعر والبشرة، بس تقيل شوية على البشرة الدهنية.
زبدة الشيا: مرطبة للجسم، خصوصًا المناطق الجافة اللي بتحتاج ترطيب تقيل زي الركبة والكوع والقدم. بس حاولي تجيبيها من مكان مضمون عشان تكون أصلية ومش مضاف ليها كيماويات.
صحيح الدلع ممكن يكون محتاج فلوس وروقان، بس محتاج أكتر تصميم وإصرار. أي نعم!
صممي إنك هتدلعي نفسك، وإنك هتعملي ده مهما كانت الظروف، حتى لو الميزانية بقت مزنَّقة، ومش هتقدري تجيبي المنتجات اللي متعودة عليها، فيه بدايل طبيعية، وفيه حاجات كتير ممن نعملها ، المهم الرغبة في إننا ندلع نفسنا ونحبها ونصمم نعمل ده في أي ظروف.
ميرسي جدا علي تعبك، الموضوع فادني جدا