بقلم/ مي فتحي
الفرينش توست يعتبر فطار صحي ولذيذ، وكمان محبب للأطفال. لكن الوصفات دي هتخليه أكلتكم المفضلة في أي وقت في اليوم.
قبل ما أقولكم على الوصفات المدهشة والجديدة هنعرف الأول طريقة عمل الفرينش توست الأساسية.
Original French toast
المقادير:
كوب حليب – بيضة – 2-3 معلقة كبيرة سكر بودرة – معلقة صغيرة قرفة – ½ معلقة فانيليا – مقدار من الزبدة – عيش توست.
الطريقة:
– بنخلط كل المكونات اللي فوق دي كويس جدًا، وفي نفس الوقت نكون بنسيّح الزبدة على النار في إناء تيفال.
– بنبدأ نغمس شرائح التوست في الخليط وبعدها بنحطها بسرعة في الزبدة السخنة.
– أول ما تبدأ تكتسب اللون الدهبي أو البني الفاتح بنقلب الشرائح للوش التاني.
وبكده يكون عندك توست لذيذ تبدئي بيه يومك.
نيجي بقى للطرق والإضافات الجديدة اللي هتخلي طعم الفرينش توست مختلف ومتجدد في كل مرة.
Peaches & Ice cream french toast.
موسم الخوخ هيبدأ خلاص، وهي دي فرصتك.
اعملي الفرينش توست بالطريقة العادية، أول ما تشيليه من على النار فورًا تضيفيله قطع خوخ وفوقيهم كورة آيس كريم بنكهتك المفضلة.
ممكن تستخدمي أي فاكهة براحتك، بس المزازة اللي في الخوخ مع حلاوة الآيس كريم هتعملك مزيج مختلف مبهج في الطعم.
Nuttela stuffed french toast
بين كل شريحتين توست هندهن طبقة كبيرة وسميكة من النوتيلا العزيزة.
وبس كده.. عيشوا بقى جوة الطعم واللذاذة.
Honey & Nuts french toast
يمكن يكون الطبيعي إننا نضيف العسل على الفرينش توست، لكن الجديد إننا نضيف الأول مكسرات وبعدين نضيف العسل، ومفيش مانع من بعض قطع الفاكهة أو حبات الكرز.
Orange Creamsicle french toast
في الطريقة دي هنحتاج ندهن بين كل شريحتين توست طبقة كريم شانتيه، وبعدين نسقي قطع التوست بقطرات من عصير البرتقال.
Banana Split Brioche French Toast
بعد تجهيز التوست بالطريقة المعتادة، بتدهني واحدة بجبنة كريمية، بتضيفي عليها قطع من الموز والتوت، وبعدين بتغطيهم بشريحة توست تانية.
ممكن تضيفي هنا بعض العسل أو صوص الكراميل مع معلقة كريم شانتيه، وزيّني الطبق بباقي قطع الفاكهة اللي عندك.
جربوا كل الطرق دي ومتنسوش تدعولي.
