موجة برد ورا موجة برد، وتخلص واحدة يقولوا التانية جاية في ديلها، ناس بتتخانق وتقول هو إنتو شفتوا شتا؟ روحوا أوروبا، وناس مش عارفة ترد عليهم من كتر ما صوابعهم اتجمدت.
والناس اتقسمت نصين، نص بيقول إن الشتا هيبقى بارد جدًا زي ما الصيف بيكون حر جدًا وده سببه الاحتباس الحراري، وناس بتقول هو طول عمره كده بطلوا دلع.
سواء كده أو كده، إحنا قدامنا حقيقة واحدة بس، إننا في الشتا ومتلّجين ومش عارفين نعمل إيه في نفسنا، نسيب بقى الناس بتشد في شعر بعض وتعالوا نحاول نتغلب على الإحساس بالبرد ده ونشوف إزاي نقدر نعمل نشاطاتنا اليومية من غير كسل.
طرق التخلص من برد الشتاء
الاستحمام
كان نفسي أقولك بلاش استحمام في الجو ده، بس ما دام لازم ولا بد، يبقى استحمي بميّة دافية قبل النوم مباشرة. المياه الدافية ممكن تجفف البشرة شوية، وده تقدري تتغلبي عليه باللوشن والزيوت وبشرتك لسه رطبة ومسامك مفتوحة.
ممكن كمان تفتحي المياه الدافية وتملي الحمام بالبخار قبل ما تبدئي تستحمي عشان يشجعك على المغامرة المجنونة دي. وطبعًا متنسيش تجففي شعرك كويس على أد ما تقدري.
الدفاية
تقريبًا مش بنقدر نستغنى عن الدفاية في الشتا، بس فيه ناس زي حالاتي وحالات بنتي، الدفاية بتعملنا حساسية صدرية، فالحل لحاجة زي كده إنك تشغليها قبل ما تدخلي الأوضة بفترة كافية عشان تدفيها، وتقفليها قبل دخولك الأوضة بـ5 دقايق، بكده هتديكي قدر جيد من الدفا من غير حساسية لعينة متعرفيش تنامي بسببها.
تعرفي على: كيف ترتدي الشال الصوف الملون؟ ومن أين تشتريه؟
نشر الغسيل
زيه زي الاستحمام فرض ولازم نعمله آسفين، هنا قدامك حلين، يا إما تنشري على منشر خارجي وساعتها تلبسي كأنك نازلة بالظبط، واقفلي وراكي البلكونة كويس جدًا عشان الناس اللي قاعدين في البيت ملهمش ذنب يتجمدوا وهم قاعدين في مكانهم.
مش هفكرك طبعًا بإنك تنشريه في وقت الضهر ويا سلام لو كنتي سعيدة الحظ وطلع لليوم ده شمس، وأكيد متنسيش مشمع بلاستيك تفرشيه على الغسيل عشان لو الدنيا مطرت الغسيل ميتبهدلش.
الحل التاني هو منشر داخلي، ده بيحل مشكلة مواجهة الصقيع، بس بينقلّك الصقيع لجوة البيت، اللبس المبلول مع الهوا بيخليكي تحسي إن المكان بقى أسقع، فحاولي تنشريه في أوضة مش بتستخدموها كتير، ومتنسيش إنه ساعتها بيقعد حوالي 3 أيام عشان ينشف، أو ممكن تشغلي معاه الدفاية.
تعرفي على: كيف تجهزي ملابس الشتاء؟ ملابس الشتاء للنساء، والرجال والأطفال
الستاير الستاير
دي أهم عنصر في الشتا، اقفلي منافذ الهوا، مش مهم يدخل شمس هو كده كده الشمس مستخبية، افتحي النور الصناعي واقفلي الستاير والشيش لو موجود.
غسيل المواعين
وده ممكن بفضل الشتا يتحول لاستفادة مش لضرر، ادهني إيدك باللوشن أو الكريم المفضل، والبسي الجوانتي وافتحي المياه السخنة واغسلي المواعين، تقلعي بعدها الجوانتي وهتلاقي إيدك من أنعم ما يكون.
تنضيف الشقة
استخدمي أقل كمية ممكنة من المياه، واشتغلي أوضة أوضة، وإنتي بتشتغلي فيها افتحي الشباك واقفلي الباب، خصوصًا لو فيه حد معاكي في الشقة. ولما تخلصي اقفلي الشباك والستارة وافتحي الباب، وامشي بالشكل ده أوضة أوضة عشان لو حبّيتي تريّحي تلاقي مكان دفا.
اشغلي وقتك
التفكير في الفراغ بيسبب الإحساس بالبرد، اعملي نشاط بتحبيه، سواء كان قراءة أو كروشيه أو الفرجة على أفلام، لكن متفضليش فاتحة صفحة الفيسبوك تتفرجي ع الفراغ. لو لا مفر من إنك تستخبي تحت البطانية، يبقى اعملي المكالمات المتأخرة والمجاملات اللي مش بتلاقي وقت تعمليها، انشري فكرة خير على الإنترنت أو اقري في الفيزيا وحاولي تفهمي الحاجات اللي مقدرتيش تفهميها في فيلم “إنترستلر”.
الحركة بركة
في حالة إنك سمعتي الكلام وخرجتي من تحت البطانية، بس في نفس الوقت مش عايزة تعملي شغل في البيت وعايزة تتحركي، ساعتها بنصحك تعملي رياضة، ومفيش أحلى من ممارسة الرياضة في الشتا لأنها من غير عرق وتلزيق وبتدي دفا. لو مش بتحبي الرياضة فبيفضل قدامك خيار الرقص، طبعًا الرقص الشرقي من مفضلاتنا في البيوت، بس ظهرت مؤخرًا رقصة الزومبا، ودي ممكن ترقصيها إنتي وأي حد لأنها مش بتهتم بسن ولا بنوع، واعملي في بيتك مهرجان الرقص للجميع.
خليكي مع الناس
اللمة بتحلى في الشتا، اتجمعوا كأصحاب سواء في نادي أو في البيوت، ولو الخيار ده مش متاح اتكلفتي تحت البطانية إنتي وجوزك/ أولادك/ إخواتك/ الناس اللي معاكي في البيت، قووا مشاعر الحب بينكم، اسألوا بعض عن الأحوال والتفاصيل اللي مش بيبقى فيه وقت تعرفوها.
التسالي والمشروبات
الشتا بيحب التسالي، أو إحنا بنحب نتسلى بالأكل في الشتا، مش فارقة مين فيهم اللي صح المهم إننا بناكل، فحاولي تستغليه صح، اعملي مشروبات الشتا اللي بتدي طاقة زي قرفة باللبن والزنجبيل أو السحلب، علياء كمان كانت قالت على مشروبات شتوية هنا: مشروبات الشتاء الساخنة بالصور
انقعي حمص من اليوم اللي قبله والصبح اغليه على النار مع بصلة مشقوقة وتوم وصلصة طماطم مع الملح والفلفل والكمون والليمون والشطة، وهتلاقيه اتحول بقى أحسن كوباية حمص شام (حلبسة). متنسيش كمان الذرة المشوية أو الذرة المسلوقة السخنة وعليها حتة زبدة مملحة، أو البطاطا المشوية في الفرن، طبق الفيشار السخن بالملح والجبنة أو بالكراميل.
الشوربة
الشوربة حبيبة الشتا، فنني بقى في عمايل الشوربة ومتكتفيش بشوربة العدس وشوربة الخضار، واستثمري في هاند بلندر تساعدك في عمايل الشوربة في الشتا وترحمك من مراحل الخلاط اللي بتخلي عمايل الشوربة عذاب. وكنصيحة شخصية، حورية زنون أو الشهيرة بحورية المطبخ عاملة في كتابها أكتر من 30 وصفة شوربة، أغلبهم رائع الجمال بنصحك تجربيه.
تعرفي على: شوربات الشتاء.. المشوية
استخدمي الفرن
حورية زنون بتقول إن البيت اللي بيتخبز فيه العيش بيت فيه بركة، وأنا أحب أضيف إنه بيبقى فيه دفا. ومش بس الخبز، استخدام الفرن عامة في عمل المخبوزات بيعمل جو جميل في البيت، ده غير الريحة اللي تجنن. اعملي كوكيز وبسكويت وكيك وعيش، خلى فرنك يشتغل ويبعت دفا وحب لكل أهل البيت، وبالمرة تضمني جودة المخبوزات ونضافتها.
في الآخر افتكري دايمًا إن حل أي حاجة بيبقى في إيدينا، ولو كان البرد بيتلّجنا وبيخلينا مقرفصين، فهو برضو بيفتح قدامنا فرص لعمل حاجات كتيرة مش بنعرف نعملها في فصل الصيف، فحاولي تستغليها.
