هبه
في عرف الشعب المصري الفول هو أسمنت المعدة.. يدخلها وميخرجش. وإنت لا يمكن تجوع وإنت واكل فول.
عشان كده دايمًا بنبدأ بيه يومنا، ولو مفطرناش فول بنحس إننا مكلناش.. لكن في رمضان الوضع بيختلف شوية. بننهي بالفول يومنا ونتسحر بيه عشان نقدر نصمد ساعات الصيام الطويلة.
والنهارده هنقدملك 10 وصفات مختلفة لفول السحور.
1ـ فول بالبسطرمة والطماطم
تقطّع بصلة صغيرة وتحمّر في معلقة زيت ثم تضاف البسطرمة وتقلب. تضاف إلى الخليط صلصة الطماطم وتتبل بالملح والفلفل الأسود وتترك على النار حتى تسبك الصلصة. يضاف الفول ويقلب.
عند التقديم.. تقطّع قطعة من البسطرمة وتقلب في الزيت على النار حتى تقرمش.
يغرف الفول في الطبق وننثر على وجهه قطع البسطرمة المقرمشة.
2ـ فول بالتسبيكة والخضار
نقطع البصل والثوم ونقلبهم في معلقة زيت لحد ما يدبلوا، ونضيف عليهم فلفل أخضر مقطع ونقلب لحد ما يدبل، ونضيف طماطم مكعبات ونتبلها بالملح والفلفل الأسود والشطة والكمون، ونسيبها لحد ما تتسيبك.
نضيف لها الفول ورشة بقدونس مقطع ونقلب كويس. وبالهنا والشفا.
3ـ فول بالبيض العيون
في طاسة نحط الفول مع الزيت وصلصة الطماطم ونص معلقة خل، ونتبله بالملح والفلفل الأسود، ونسيبهم على النار لحد ما يسخن تمامًا، ونكسر البيض ونضيفه، ونغطي الطاسة ونوطي النار، ونسيب البيض لحد ما يستوي، ونرش البقدونس المفروم على الوش. ونقدمه وبالهنا والشفا.
4ـ فول بالسلطة
نقطع البصل والطماطم والفلفل الأخضر حتت صغيرة، ونضيف عليهم الفول وعصير الليمون ومعلقتين زيت، ونتبلهم بالملح والكمون والشطة، ونقلب كويس. وبالهنا والشفا.
5 ـ الجلاش بالفول
دي وصفة جريئة شوية، بس طعمها المميز بيخليها من أفضل الأفكار الجديدة للسحور.
تفرد نص لفة جلاش في صينية وتدهن الأوراق بالزبدة. نخلط كوب من الفول المهروس مع فصين ثوم مهروس، ومعلقة كبيرة من البصل المقطع وحبة طماطم مقطعة، وحبة فلفل أخضر حامي مقطعة قطع صغيرة وربع كوب بقدونس مقطع ويتبل الخليط بالملح والفلفل الأسود والكمون. يفرد خليط الفول على الجلاش ويفتت فوقه نص قطعة من الجبن القريش، ثم توضع باقي أوراق الجلاش فوق خليط الفول مع ملاحظة دهنها بالزبدة.
تدخل فرن ساخن لمدة نصف ساعة أو حتى يصبح لون الجلاش ذهبي، وتقطع وتقدم. وبالهنا والشفا.
6ـ فول بالسجق
نقطع البصل ونقلبه في معلقة زيت لحد ما يدبل، ونضيف طماطم مكعبات ونتبلها بالملح والفلفل الأسود ونسيبها لحد ما تتسبك. بعد ما تتسبك نضيف عليها السجق ونغطيها ونسيبها لمدة عشر دقايق، لحد ما السجق يستوي، وبعد كده نضيف الفول ونقلب كويس. وبالهنا والشفا.
7 ـ فول بالثوم والنعناع
ندق الثوم كويس ونقلبه في معلقة زيت على النار، وأول ما ريحة الثوم تظهر نضيف عليه رشة نعناع ناشف مطحون، وأول ما يبدأ الثوم يتحمر نضيف عليه الفول ونتبله بالملح والكمون ونقلب كويس. وبالهنا والشفا.
8 ـ فول بالبيض
نقطع البيض المسلوق ونقلبه في معلقة سمن على النار، ويفضل لو كانت سمن بلدي، ونضيف عليه الفول ونتبله بالملح والفلفل الأسود ونقلب كويس. وبالهنا والشفا.
ملحوظة:
من الممكن استخدام البيض الطازج بدلًا من البيض المسلوق في هذه الوصفة.
9 ـ فول بالطعمية (الديناميت المصري)
نقطع الطعمية حتت صغيرة ونضيف عليها الفول، ونتبلهم بالملح والكمون والشطة والزيت ونقلب كويس. وبالهنا والشفا.
10 ـ فول بالطحينة
نضيف الطحينة البيضا للفول ونتبله بالملح والكمون والشطة والزيت ونقلب كويس. وبالهنا والشفا.
وكل سنة وكلنا طيبين وبخير.
