بقلم/ دينا خليل
غير كل المناسبات اللي بنفرح بيها على مدار السنة، فرحة العيد بيبقى ليها طعم تاني، وبالرغم إن كلنا بنفرح بالعيد وبنحبه، بس معنى العيد وطريقة الاحتفال بيه بتختلف من حد للتاني، وخصوصًا بالنسبة للستات! ليه؟! عشان بعيدًا عن الفرحة والبلالين وصلاة العيد كمان، فخلينا نقول إن الستات دايمًا بتحب التفاصيل وتحب تبقى مسؤولة عن كل حاجة من الألف للياء، وده بيبدأ من الاهتمام بالبيت ونظافته واختيار لبس جديد للأطفال لو متجوزة، وكمان الاهتمام بفكرة هتفسح الولاد فين، وطبعًا ترتيب أي تجمع عائلي والإشراف على كل حاجة بما فيها مثلاً تحضير الأكل لو عزومة غدا.
والنهارده قلت أقولكم على شوية حاجات تعملوها قبل العيد وأثناء العيد عشان تدلعوا نفسكم شوية..
1- ابدئي عملية تنظيف البيت من بدري، وكمان اطلبي من أفراد بيتك يساعدوكي، وقسّمي المهام على كل واحد. كده هتحسي إنك قبل العيد عندك وقت لحاجات تانية كتير.
2- إنك تشتري لبس العيد أكيد.. حتى لو متجوزة وكل اهتمامك لبيتك وزوجك وأولادك، خصصي لنفسك وقت كده حتى لو في يوم واحد، وانزلي لوحدك أو مع حد من صاحباتك أو مع جوزك، واشتري حاجة جديدة للعيد.
3- اهتمي بنفسك، يعني ماسكات للوش عشان ترجَّعيله حيويته ونضارته، تعملي باديكير ومانكير لرجلك عشان تحافظي على نعومتها، تريحي إيدك شوية وتعملي ماسكات مرطبة لإيدك.
4- مفيش حاجة ممكن تخليكي تحسي إنك فريش وعندك طاقة إيجابية قد الساونا والمساج، احجزي في أي سبا وروحي استجمي لمدة ساعة أو ساعتين ودلعي نفسك.
5- لو إنتي من العظيمات اللي بتربطي شعرك كحكة طول الوقت عشان الدنيا حر ومبيبقاش عندك وقت تهتمي بيه زي حالاتي، يبقى العيد ممكن يبقى فرصة كويسة قوي عشان تبدئي روتين خاص للعناية بشعرك. اعملي ماسكات وحمامات كريم وكمان ممكن تروحي تعملي قصة جديدة أو تسريحة مُختلفة عند الكوافير قبل العيد بيوم أو يومين.
6- ابدئي اظبطي نظام أكلك، متندميش على اللي فات، يعني لو لخبطي في رمضان خلاص اللي حصل حصل، استغلي آخر رمضان إنك تظبطي أكلك عشان تلاقي معدتك مرتاحة في العيد، وتكملي بعد العيد على نظام أكل صحي.
7- حلويات العيد من ضمن طرق الدلع برضو، هاتي اللي بتحبيه من حلويات العيد ووزعي على اللي بتحبيهم عشان تحسوا كلكم بالفرحة.
8- متنسيش تشتري بيجامة جديدة، لأن بيجامة العيد أهم من لبس العيد نفسه.. هتحسسك بفرحة وإنك لابسة جديد حتى في البيت عشان العيد.
9- جهّزي زينة العيد لأنها حاجة مهمة قوي برضو، اشتركي مع أهلك وممكن تعملوها بنفسكم أو حتى تشتروها جاهزة، المهم تزينوا البيت.
10- آخر حاجة إنك تستقبلي العيد وإنتي مرتاحة ومبسوطة، وارمي أي مشاكل ورا ضهرك.. حتى لو لوقت مؤقت.
عشان تقضي العيد مبسوطة
