ميزانية البيت موضوع مناقشته متكررة كل يوم في كتير من بيوتنا. الحقيقة إن فيه نصايح كتيرة جدًا عشان نقدر ندير ميزانية البيت، وجزء كبير من إدارة حياتنا بيتوقف على إدارة اقتصاديات كل يوم، الاقتصاديات البسيطة الصغيرة اللي ساعات كتير مبناخدش بالنا منها، لكنها بتأثر على حياتنا بشكل يومي متكرر. عشان كده بشارك معاكم مجموعة من الملاحظات الصغيرة المستخبية اللي ممكن تحسِّن اقتصادنا اليومي.
1- بيع الحاجات اللي ملهاش لازمة عندك: لو دوَّرت في البيت هتلاقي حاجات كتير ملهاش لزوم، سواء اشتريتها أو جتلك هدية، زي طقم القهوة اللي جالك هدية بعد الجواز وإنت أصلاً مبتشربش قهوة، البونبونيرة الزيادة، مكواة الشعر اللي مرتحتش معاها بعد أول استخدام ليها، الترابيزة اللي كل شوية بتتخبط فيها ونفسك في واحدة أصغر، كرسي الأكل والمرجيحة بتاعة ابنك وهو عنده 6 شهور ومبقتش بتستخدمها، الجاكت اللي اشتريته استخسار عشان عليه خصم كبير، والجزمة بكعب 12 سم بتاعة الفرح، والفستان السواريه اللي اتلبس مرة واحدة.
2- شد الفيشة: في الفترة الأخيرة انتشرت عادة عند ناس كتير، العادة دي هي إننا بننسى الأجهزة الكهربائية في حالة عدم استخدامها في الكهرباء، سواء المشترك الكهربائي أو شاحن الموبايل أو شاحن اللابتوب، وبنكون فاكرين إنها مبتفرقش في الاستهلاك، لكن الحقيقة إن كل الأجهزة بتسحب كهرباء مهما كانت قليلة، ومجموع الطاقة دي بشكل يومي بيفرق في الاستهلاك الشهري بنسبة كبيرة.
– افصل الكهرباء عن أي جهاز مش محتاجه.
– افصل اللمبات في الأماكن اللي إنت مش قاعد فيها.
– نَظَّم استخدام المكواة: مثلاً تجميع الملابس وكويها مرة واحدة في وقت محدد من الأسبوع، بيقلل استهلاك الكهرباء وبيقلل المجهود اللي بتحتاجه في كي كل قطعة لوحدها.
– استخدام اللمبات الموفرة بيقلل 30% من الطاقة الكهربية المستهلكة للمبة العادية.
– حفظ الأكل في الثلاجة لازم يتم بعد ما يبرد، لتقليل الطاقة اللي بتستهلكلها التلاجة وبيطول عمرها.
– تجميع الملابس اللي محتاجة غسيل وفرزها وتوزيعها على يومين في الأسبوع. لتنظيم أيام الغسيل في البيت، وبيقلل استهلاك الغسالة والكهرباء والمياه ومسحوق الغسالة.
3- الغي الاشتراكات اللي ملهاش لازمة: زي اشتراكات الجرايد والمجلات، لأن أحيانًا مبتلحقش قراءتها أو قرائتها أون لاين بقت من عاداتك.
4- حاول تقلل من نفقات صيانة المنزل: من خلال إنك تتعلم مبادئ بسيطة للصيانة، زي إنك تتعلم إزاي تغير لمبة أو إزاي تصلح حنفية أو إزاي تنضف البيت من غير مساعدة، في حالة توافر الوقت والمجهود.
5- اشتري مستعمل: جرَّب ودور على جروبات الفيسبوك وعلى المواقع المتخصصة للمستعمل، واسأل أصحابك وقرايبك وزمايلك، هتلاقي حاجات بجودة كويسة بتكلفة أقل بكتير من الجديد.
6- لما تيجي تشتري هدوم: اشتري اللي إنت محتاجه مش اللي إنت عاوزه أو اللي عليه عرض، اشتري اللي لايق على طريقة حياتك والأماكن اللي بتروحها بشكل متكرر والغرض اللي إنت عاوزه.
7- راجع فاتورتك لو عندك خط تليفون أرضي: هتكتشف إنك مشترك في خدمات مختلفة بتزود فاتورتك كل مرة، زي خدمة المباشر وخدمة إظهار رقم الطالب والخدمات اللي مبقالهاش أي أهمية مع وجود الموبايل.
8- راجع فاتورة موبايلك: فكر في إمكانية تحويل الخط لكارت أو الاشتراك في باقات محددة، وده هيخليك تتحكم أكتر في مصاريفك الشهرية وتبقى متوقعها كل شهر.
9- اشتري مج حراري: اعمل قهوتك في البيت وخدها معاك مشاويرك، بدل ما تشتري قهوتك كل يوم من برة البيت.
10- جهز وجبات للغداء تاخدها معاك الشغل: هيوفر عليك جزء كبير جدًا من الميزانية اللي بتدفعها شهريًا على الأكل.
11- حضر قايمة المناسبات: اللي محتاج تجيب فيها هدايا في الشهر جهزلها هديتك، لأن لما بننسى مناسبة معينة وبنحاول نلحق نجيب هدية، عادة بندفع أكتر من الميزانية المحددة للمناسبة لشراء حاجة لايقة ع المناسبة، أو بنشتري حاجة في حدود الميزانية لكن مش لايقة ع المناسبة.
12- فكر في الهدايا اللي ممكن تقدمها من صنع إيديك في المناسبات المختلفة: سواء نوع أكل إنت محترف في صنعه، فن يدوي زي كروشيه، تريكو، كانافاه، رسم. نوعية الهدايا اليدوية بتعكس اهتمام وحب أكبر، وبتوفر في الميزانية.
13- حدد ميزانية مع أسرتك للأجازات والمناسبات: زي رمضان، الأعياد، الكريسماس، المصيف، شم النسيم… إلخ، ده بيخلي أفراد الأسرة كلها على خط واحد، وبيخلي فيه أولويات حتى للاستمتاع.
14- بدِّل العزومات لديش بارتي: سواء عازم أو معزوم. في ظل الظروف الاقتصادية وضيق الوقت والانشغال، مبيكونش أفضل شيء إن يبقى فيه عازم واحد فقط.
15- استخدم فيديوهات التمارين: ممكن تعمل مجموعات مع أصحابك للتمرين والمتابعة، بدل من الاشتراك في جيم مبتروحوش.
16- جمّع زيارات السوبر ماركت: بحيث تكون أسبوعية، أو نصف شهرية أو شهرية، لأن ده بيقلل من احتمالية شراء حاجات ملهاش أهمية.
17- الهايبر ماركت: أوقات كتير بيكون أغلى من البقال اللي جنب البيت، وبيقدم عروض خادعة كتير، حاول تعرف سعر الوحدة اللي بتدفعها ومتنخدعش بالعروض، في أوقات كتير كنت بشوف في الهايبر ماركت سعر الوحدة أعلى من سعرها وبيقدموا سعرها الأصلي على إنها عرض لفترة محدودة.
18- تسوق بذكاء لتموين البيت: اعمل ليستة الأكل اللي بيطبخ أسبوعيًا، اكتب احتياجاتك للأكل ده، اعمل ليستة للتسوق، تابع عروض المحلات، متتسوقش للأكل وإنت جعان، ونصايح أكتر اعرفوها من مقال آيات جودت.
وأخيرًا وليس آخر.. اتعلم إن مش أي حاجة تعجبك لازم تقتنيها، ومش أي حاجة تعجبك هتليق عليك أو على نمط حياتك.
