الحب اللي حكولنا عنه في الروايات كتير مننا عاشوا وماتوا ومقابلوهوش، واللي قابلوه بيقع منهم ف لحظات الحيرة والضغوط والعصبية، واللي موقعش منهم بيحتاجوا أجازة يشحنوا فيها روحهم عشان يعرفوا يواصلوا ف وسط كل المتاعب والتحديات.

ولأننا مش عايشين جوة رواية، ولا عاوزين حبايبنا يقعوا مننا، وكمان رفاهية الأجازات مش متاحة ف أي وقت وسط العيشة الطاحنة اللي إحنا جواها، هنخلق أجازتنا بأقل الإمكانيات.. هنخلقها بالسحر وبالشغف اللي جوانا. هناخد أجازة قصيرة ونرجع منها كمان بهدية للي بنحبهم.

لأن كل واحدة جواها سحرها الخاص، ففيه مننا مثلاً جنية الكلمات اللي بتقدر بعصايتها السحرية تطوع الحروف وتخلق من قاموسنا العادي تعابير جديدة أول مرة توصف اللي جوانا، وفينا جنية الماكياج، اللي بتعرف تخبي أي وجع وسهر ناضح على وشوشنا بشوية خلطات متبانش، وعندك كمان جنية القماش، اللي تقدر تخلق من دولابها اللي فيه ست سبع قطع عشرين طقم لعشرين مناسبة مختلفين.

والجنية اللي كانت ساكناني ومكنتش أعرف بوجودها، هي جنية المطبخ، اللي اكتشفت وجودها لما اتحطيت في مواجهة مع مطبخي بعد الجواز.. دولاب مليان حلل وتلاجة مليانة خضار ولحوم ودرج سحري مليان بودرة سحرية، كل واحدة لون وريحة قادرة تاخدك من بيتك تسفّرك لأي مكان، الهند، إيطاليا، فرنسا، وترجعك طفل صغير في الريف على طبلية تيتة.. درج التوابل.

تقرا التعويذة وتسمي وتبارك، تنوي النية خالصة لملك قلب الحبيب وكسر غرور العاصي وهدى المفارقين.

بيقولوا أقرب طريق لقلب جوزك معدته.. رأيي إنه أقرب طريق لأي قلب، حتى لقلبك إنتي شخصيًا.

لما ترمي همومك جوة تسبيكة ولا تقطعي حزنك مع السلطة أو تدوبي التجارب القاسية جوة التتبيلة تبات فيها لحد ما تختفي وتدوب، هتعرفي إنه فعلاً شغل جنيات.

وعشان تتعلمي السحر ده وتكتشفي جنية الطبيخ جواكي، فيه أساسيات لو عرفتيها تقدري تكملي من عندها تجاربك وتخلقي سحرك وتعويذاتك الخاصة.

البودرة السحرية (أو التوابل)

أي أكل مصري أصيل بياخد ملح وفلفل. لكن لو بنعمل أكل إيطالي بنضيف التوابل العطرية زي الزعتر أو الريحان أو الروزماري، وده بيمشي مع الوايت صوص والباستا بأنواعها وتتبيلة البيكاتا.

لو زودنا الشطة.. الكركم والكاري.. التوابل الزاعقة بألوانها الناصعة هياخدنا لبلاد الألوان والعجايب.. المطبخ الهندي، وده بيليق مع التندوري وفراخ بالكاري ورز بالكاري وأي حاجة فيها كاري وأصناف كتير من الرز.

لو عاوزين نروح للمطبخ الصيني والآسيوي عمومًا السر في الثوم والزنجبيل وصوص الصويا، وبيليق مع التتبيلات المسكرة ورز الريزو.

تسبيكة أي خضار

بصلة مفرومة – صلصة أو عصير طماطم – شوربة – توابلك المفضلة.

لو هترضي بقك وتحمري البصلة هتزعلي معدتك، ولو ريحتي المعدة، هتلاقي طعم ماسخ ومفيش ريحة مميزة. ارضي بقك ومعدتك وارضي البصلة نفسها وحمريها نص تحميرة، وانزلي فوقها بالصلصة، ثم بسكينتك الحامية على كل همومك بقرار قاطع لمفارقتها، تخرطي خضارك وف التسبيكة، قلبي واوزني بإحساسك مقدار الشوربة المطلوب.

معاكي كده وصفة صينية البطاطس والكوسة واللوبيا والبسلة والتورلي والفاصوليا البيضا.. لو فاصوليا خضرا هنزود ثوم مفروم ف الآخر.

أساس المطبخ المصري الأصيل

الوصفة اللي محتاجة ساحرة عشان تعملها، اللي بيقيسوا بيها شطارة ست البيت الأصيلة، اللي مبتخلاش منها عزومة من أول الطبلية لحد الأوبن بوفيه فايف ستارز، اللي اكتشفت إن كل الوهم اللي عشناه ده عمر ضايع وإنها سهلة جدًا.. خلطة المحشي.

بصلة نص تحميرة ثم عصير الطماطم وقصقصي الخضرة بالمقص واظبطي توابلك المفضلة، حطي الرز المغسول وزيت وسنة شطة تصحصح الخلطة شوية.. بس خلاص.

رصي حلتك بالمعقول من غير ما تكبسيها ولا تسيبيها فاضية، وحطي الشوربة دافية واستمتعي بالبخار السحري اللي ريحته هتجوعك مهما كنتي واكلة.

جوجل صديق ست البيت

دوري على الوصفات اللي نفسك تعمليها، هتدوري مثلاً على “طريقة عمل كذا” أو “وصفات جديدة لعمل كذا” وممكن تكتبي “فراخ على الطريقة الهندي. رز على الطريقة الصيني، شوربات من المطبخ الفرنسي” هتتفتحلك أبواب المغارة وتطلعي بكنوز.

اقري على أكتر من موقع وتابعي أكتر من شيف.. وف الآخر حطي التاتش بتاعك اللي هيميزك عن غيرك، متسلميش ودنك لحد وخليكي مبدعة، كل الوصفات وكل الشيفات بيدوكي الباترون بس إنتي اللي هتشتغلي عليه بنفسك، إنما لو إنتي مش مستعدة تكوني مميزة كل قنوات المطبخ مش هتقدر تساعدك.

فرّغي كل همومك وقلقك في التجهيز، غامري وجربي واخلطي وزودي النكهات بالمعقول لحد ما تطمينيلها وتعرفي كميتك المفضلة. حطي اختراعك ع النار وسيبيه يخوض تجربة النضج بوجعها وحروقها لوحده، زي ما بتربي طفلك وتراقبيه من بعيد، من غير ما تقلقيه بسؤالك كل شوية.. فتح الفرن كتير بيبوظ الأكل وكشف الحلل ميت مرة بيطيّر البركة ويبطل مفعول التعويذة.

المطبخ ساحر.. متحرميش نفسك من التجربة وتقنعي روحك إنك مش موهوبة، اكتشفي الساحرة اللي جواكي واعرفي إن “الكل يقدر يطبخ.. بس اللي قلبه جامد هيبقى عظيم”.. زي ما قال الشيف أوجست جوستو في فيلم خلطبيطة بالصلصة.