هبه

كباب الحلة من الأكلات المصرية العريقة واللي كلنا تقريبا بنعملها في بيوتنا، بس مؤخرا مابقيناش نعملها على أصولها. دلوقتي هانقدم وصفة كباب الحلة على الطريقة المصرية الأصيلة زي ما وردت في كتاب أبلة نظيرة..

المقادير 

لحم مكعبات، ولو خالي من الدهون يكون أفضل.

سمن، ولو مش بنحب الدهون ممكن نستخدم زيت. 

بصل.. كتير. 

شوربة أو مية. 

ملح .. فلفل إسود.. حبهان.. ورق لورا

الطريقة 

1 ـ نسخن حلة تيفال كويس قوي على النار وبعدين نحط فيها السمن ونسيبه لما يسخن.

2 ـ تحط مكعبات اللحم في السمن.. كل مرة 3 مكعبات ونحمرها كويس لحد ما يبقى لونها بني من كل الجهات.

3 ـ بعد تحمير كل مكعبات اللحم.. نقطع البصل مكعبات ونضيفه للسمن ونقلبه لحد ما يدبل ويبقى لونه شفاف.

4 ـ نضيف اللحم للبصل ونقلبه كله كويس لمدة دقيقتين، ونضيف التوابل ما عدا الملح ونقلب.

5 ـ نضيف الشوربة بحيث تكون مغطية اللحمة وأكتر كوبياتين، ونغطي الحلة كويس. 

6 ـ نبص على اللحمة كل ربع ساعة لحد ما تتشرب الشوربة كلها، ولو لقيناها ناقصة سوا نضيف تاني شوربة بس تكون سخنة بتغلي. 

7 ـ قبل ما نطفي على اللحمة بعشر دقايق نضيف الملح حسب الرغبة، ونتأكد إن المية نشفت كلها.

ملحوظة 

ممكن نضيف بالإضافة للتوابل الرئيسية اللي في الوصفة أي توابل حسب ذوقنا.

عشان ندي كباب الحلة الطعم المدخن بتاع المشويات، هانجيب فحمة ونسخنها على النار كويس قوي لحد لونها ما يبقى أحمر، ونحطها على ورقة فويل، ونحطها في حلة الكباب وننزل عليها نقطة زيت، ونقفل عليها غطا الحلة لمدة دقيقتين.

وبالهنا والشفا..