للقهوة عشاقها اللي ميقدروش يبدؤوا يومهم من غيرها.. ريحتها قادرة تمامًا على تغيير حالتهم المزاجية. عشاق القهوة مش بيلتفتوا لكل الكلام الكتير اللي بيتقال عن مخاطر الإفراط في تناولها. عشاق القهوة دايمًا ليهم طقوس يومية مرتبطة بيها.
عشان القهوة كل يوم بتتفتح لهم كافيهات، وكل كافيه بيحاول بقدر الإمكان يجذب أكبر عدد من محبي القهوة وعشاقها عشان يبقى ولاؤهم للكافيه ده أكتر من غيره. وفي سبيل اكتساب الولاء ده بدأنا نشوف طرق مختلفة لتحضير القهوة، مكانتش معتادة لمحبي القهوة في مصر.
النهارده هنخترق سر الصنعة اللي بيحتفظ بيه كل كافيه عشان يخلّي قهوته هي الأكتر تميزًا، وهنتعرف مع بعض على الفروق ما بين اَلإضافات اللي بيتميز بيها كل نوع قهوة عشان يختلف عن النوع التاني.
السبريسو
بتتكون من بن ومية، وبتتعمل بماكينة معينة بتحدد كمية المية وكمية البن، وطريقة عملها بتعتمد على ضخ المية من خلال البن في درجة حرارة منخفضة وضغط معين، مما يؤدي لتكون السبريسو في الإناء المخصص له.
غالبا ما تقدم في فناجين صغيرة ذات سمك كبير. والسبريسو يعتبر الأساس اللي كل أنواع القهوة اللي بتتقدم في الكافيهات معتمدة عليه.
السبريسو موكياتو
هو فنجان السبريسو العادي مضاف إليه رغوة الحليب، بنسبة واحد إلى واحد. يعني قدام كل مقدار من السبريسو مقدار مساوي له من رغوة الحليب.
السبريسو كون بانا
هو فنجان السبريسو العادي مضاف إليه كريمة مخفوقة، بنسبة واحد إلى واحد. يعني قدام كل مقدار من السبريسو مقدار مساوي له من الكريمة المخفوقة.
كافيه لاتيه
هو فنجان السبريسو العادي مضاف إليه لبن مبخر ورغوة الحليب، بنسبة واحد إلى واحد ونصف إلى نصف. يعني قدام كل مقدار من السبريسو مقدار ونصف من اللبن المبخر ونصف مقدار من رغوة الحليب.
كابتشينو
هو فنجان السبريسو العادي مضاف إليه لبن مبخر ورغوة الحليب، بنسبة واحد إلى نصف إلى واحد ونصف. يعني قدام كل مقدار من السبريسو نصف مقدار من اللبن المبخر ومقدار ونصف من رغوة الحليب.
كافيه موكا
هو فنجان السبريسو العادي مضاف إليه شراب الشيكولاتة واللبن المبخر والكريمة المخفوقة، بنسبة واحد إلى واحد إلى واحد إلى واحد، يعني قدام كل مقدار من السبريسو مقدار من شراب الشيكولاتة ومقدار من اللبن المبخر ومقدار من الكريمة المخفوقة.
أمريكانو
هو فنجان السبريسو العادي مضاف إليه ماء مغلي بنسبة واحد إلى اثنين، يعني قدام كل مقدار من السبريسو مقدارين من الماء المغلي.
لاتيه موكياتو
هو فنجان السبريسو العادي مضاف إليه لبن مبخر بنسبة واحد إلى أربعة، يعني قدام كل مقدار من السبريسو أربعة مقادير من اللبن المبخر. مع ملاحظة إضافة اللبن المبخر قبل إضافة السبريسو في فنجان التقديم.
وبكده نبقى عرفنا سر فناجين القهوة المميزة، ونقدر وإحنا بنطلب نطلب اللي بنحبه وإحنا عارفين مكوناته إيه.
