شم النسيم من أقدم الأعياد اللي بيتم الاحتفال بيها على مستوى العالم، حيث يرجع تاريخه إلى أكتر من 4700 سنة. ومما يثير الدهشة إن عادات وتقاليد المصريين متغيرتش خلال الفترة الطويلة دي. فالمصريين متعودين إنهم يصحوا بدري يوم شم النسيم ويخرجوا للحدائق والمنتزهات أو يقضوا اليوم في مركب على النيل. كمان العادات الغذائية متغيرتش على مدار الفترة التاريخية دي، على الرغم من التغيرات الثقافية الكبيرة اللي مرت بيها مصر.
فطار يوم شم النسيم لازم يكون من البيض الملون والسميط، والغدا لازم يكون من الأسماك المملحة المحفوظة مع تشكيلة الخضراوات اللي بتظهر أول الربيع زي الخس والبصل الأخضر والملانة اللي هي براعم حمص الشام.
والنهارده هنقدملكم طريقة تحضير أكلات شم النسيم المميزة.
أولًا: الفسيخ
الفسيخ هو السمك البوري المملح وطريقة حفظه متغيرتش على مدار آلاف السنين.
إحنا دايمًا بنشتري الفسيخ الجاهز وهنقولكم تتعاملوا معاه إزاي.
أولًا هنفك الغلاف بتاعها لو جايبينها مغلفة ونفرش ورقة جرنان وفوقها صينية شاي كبيرة وتحطي فوقها الفسيخة، ونجيب معلقة من معالق الشاي ونشيل بيها القشر.. زي ما بنشيل قشر السمك العادي.
وبعدين نشيل الزعانف ونقطع الراس بمقص ونفتح البطن وتشيلي كل الأحشاء اللي جوة بطرف معلقة أو بسكينة، وننضف كل البطانة السودا ونجيب منديل ورق ونسمح، وممكن نبله على خفيف.
وبعدين هنفتح السمكة من الديل لحد مكان الراس بالسكينة، بحيث تبقى مفتوحة زي الكتاب كده وبإيدينا وبالراحة نشيل السلسلة اللي في النص.
وبعدين هتجيبي سكينة وهنفصل الجلد عن اللحم بالراحة خالص، بحيث يبقى عندك نصين سمكة مخليين من الجلد والعضم والشوك.
هناخد اللحم المخلي في طبق ومعاه زيت ولمون وطحينة -حسب الرغبة- وجنبهم طبق بصل أخضر وخيار وطماطم مقطعة وبالهنا والشفا.
ثانيًا: الرنجة
هنقدملكم النهارده طريقة جديدة لعمل الرنجة، وهي الرنجة بالزيت والبصل.
المقادير:
2 سمكة رنجة مدخنة.
2 كوب زيت نباتي.
2 ثمرة بصل أحمر مقطع شرائح رفيعة.
عصير لمون.
شطة (حسب الرغبة).
الطريقة:
1ـ نشوي جلد الرنجة فوق النار عشان نقدر نشيل الجلد بسهولة.
2ـ نشيل الجلد والراس والديل ونفتح السمكة ونتخلص من كل الأحشاء والشوك.
3ـ نقطع الرنجة قطع متوسطة.
4ـ نخلط الرنجة والبصل ونحطهم في إناء زجاجي عميق ونملاه بالزيت لحد ما نغطي الرنجة والبصل.
5ـ نسيب الخليط في التلاجة طول الليل.
6ـ قبل التقديم بثلاث ساعات نطلع الخليط من التلاجة.
7ـ عند التقديم نصفي الزيت ونتبل الرنجة بعصير اللمون، والشطة لو بنحبها.
ونقدم الرنجة مع خضراوات الربيع زي الخس والبصل الأخضر والملانة.
وكل سنة وكل المصريين بخير وسعادة.
