أفتكر أول مرة أشوف فيها قواقع على الحقيقة انبهرت، كان مصيفنا دايمًا هو إسكندرية، لكن لأول مرة وأنا في إعدادي طلعنا على مطروح، وكانت أول مرة أقابل الصَدَف، بدأت أجري هنا وهنا أجمعهم في كيس. أول مرة جمعتهم كانوا حبة قليلين. بعد كده بكذا سنة سافرنا راس البر، ودي كانت كنز القواقع، القواقع كانت على الشاطئ بالآلاف، ساعتها كنت مجنونة بتجميع القواقع. بعدها بسنتين تقريبًا سافرت راس سدر، هنا بقى جمّعت حوالي كيلو قواقع، وإخواتي جمّعوا كمية مقاربة، وفي الآخر ادوهاني، والبيت بقى مصنع قواقع.
في مرة كنت عند العطار لقيت كيلو القواقع بـ100 جنيه، وسألت بيعملوا بيها إيه قالولي ماسكات، أنا زعلت أوي إن تحت إيدي ثروة وأنا مش واخدة بالي، وزعلت إن القواقع الجميلة دي الناس بتتطحنها وتستخدمها ماسكات، ساعتها قررت إني أدوّر على طرق لاستغلال القواقع اللي عندي في أعمال تزينية.
في أثناء بحثي عن كده لقيت إن فيه طريقتين رئيسيتين لاستخدام القواقع، الأولى باللزق والتانية بعمل حفرة أو ثقب في القوقعة، ودي بتحتاج شنيور وبالتالي هي مستوى أعلى، عشان كده هكتفي بالمستوى الأول من الديكور بالقواقع عن طريق اللزق، وبتمنى إني أفيدكم معايا.
1- تصميمات السفرة الحديثة بقت بتحتوي على فراغ ممكن يتملي بحاجات كتيرة ومختلفة، ممكن تمليها بأشكال وأحجام مختلفة من القواقع، وممكن كمان تحطي معاها زلط أو زجاج ملوّن.
2- هاتي بولة زجاجية وحطي فيها رمل وثبتي فيها شموع، ومتنسيش تزينيها بالقواقع في القاع.
3- ممكن كمان نستخدم القواقع كحامل للصابونة في الحمام أو حامل للخواتم والأكسسورات الصغيرة، هنا هنحتاج قوقعة كبيرة ومفتوحة، وقوقعة تانية أصغر تعمل كقاعدة للحامل. الزقي ضهرهم ببعض بغراء قوي (زي الأمير) ولفيهم ببعض بأستك على ما الغراء ينشف.
4- ممكن تزيين برواز مراية أو برواز صور بالقواقع، بس حاولي تعملي تصميم بالقواقع قبل ما تلزقيها عشان تتأكدي إنها هتكون راكبة حلو. طبعًا لازم البرواز يكون مسطّح، ويا ريت تكون خامة البرواز رخيصة لأنك كده كده هتغطيها.
5- ممكن عمل البرواز نفسه على حرف وتلزقي عليه القواقع، البرواز ممكن تعمليه عمولة عند أي نجار بخشب رخيص أو بنفسك بفرخ كارتون أو ناصيبيان (تشتريه من من المكتبات الكبيرة)، وتعلقيه على الحيطة.
6- مش هنخرج لسه من البراويز، لكن المرة دي القواقع نفسها هي اللي هتكوّن العمل الفني، ممكن تلزقيها على خشب رخيص أو ناصيبيان، وساعتها بيكون فيه نوعين من الفن بتقدري تبروزيهم، إما إنك ترصيهم بشكل عشوائي جميل، أو إنك تكوني فنانة وتقدري ترسمي لوحة سواء من خيالك أو بتشفّيها من رسمة تانية، وتطعميها بالقواقع.
7- لمحبي الشموع، تقدري تجددي الشموع اللي عندك بنفسك في البيت، لو عندك شمع قديم فككيه وسيحيه في حمام مائي سخن على النار، طبعًا شيلي الفتلة منه ومترميهوش. قيسي الفتلة على ارتفاع أطول من القوقعة شوية، امسكي الفتلة من فوق وخلى طرفها اللي تحت نايم جوة القوقعة، صبي الشمع وهو سايح جوة القوقعة وافضلي ماسكة الفتلة لفوق أو ثبتيها بحاجة عشان متقعش في الشمع السايح، افضلي على الوضع ده لحد ما تجمد وكرريه زي ما إنتي عايزة في باقي القواقع. ممكن كمان تسيّحي أكتر من شمعة لها أكتر من لون مع بعض عشان تخلقي لون جديد ومختلف ومتداخل.
8- لو بتحبي الرسم على القماش أو عندك لبس أو طقم ملاية سادة، ممكن كمان تزينيه برسومات القواقع المميزة، ادهني القوقعة باللون الأكريليك اللي إنتي عايزاه وبعدين اطبعيه على المكان اللي إنتى عايزاه، يُفضّل طبعًا تكوني عاملة تصميم تمشي عليه قبل ما تبدأي في الشغل.
بما إن القواقع بتبقى غالبًا بتتحرك في نفس منطقة اللون، فإنتي ممكن تبدعي في تلوينها بنفسك، وقدامك لكده طريقتين:
يا إما تلوينها بفرشاة وألوان أكريلك، ودي بتدي طبقة قاسية للقوقعة، ميزتها إنك بتتحكمي بيها في المناطق اللي عايزة تلوينها في القوقعة أو لو عايزة تديها أكتر من لون.
الطريقة التانية هي إنك تنقعي القواقع في لون مخفف بالماء، سواء كان لون غذائي أو صبغة زي بتاعة القماش. الطريقة دي بتديكي نتيجة شبه طبقة رقيقة شفافة على القوقعة، بس في نفس الوقت بتخلي القوقعة كلها نفس اللون.
وطبعًا متنسيش قبل استخدام القواقع، إنك تغسليها عن طريق نقعها في كمية كبيرة من المياة ومعاها شوية كلور، أو ممكن تحطيهم مكان أدوات الطعام في غسالة الأطباق.
