الشوبينج الشوبينج الشوبينج.. كل البنات بتحب الشوبينج.. لو مودك وحش أسهل حاجة عشان تغيريه جزمة وشنطة جداد، لو سبتي شغلك اللي بتحبيه أسهل حاجة عشان تنسي بلوزة جديدة، لو زعلتي مع حبيبك اشتري فستان جديد وغيري قصة شعرك ولونه على طول.
الشوبينج أكتر حاجة ممكن تبسطك وتغير مودك، بس عشان استمتاعك بالشوبينج يكمل من غير أي حاجة تعكر مزاجك، وكمان عشان تشتري أكتر حاجات في أقل وقت، فيه كام حاجة كده لازم نتفق إنك هتخلي بالك منها:
أولاً: جزمتك هي طريقك إلى عالم تسوق أفضل
آه والله زي ما بقولك كده.. الجزمة هي أول حاجة وأكتر حاجة ممكن تعكر مزاجك في الشوبينج وتتعبك وتبوظلك اليوم، وعشان الجزمة متعملهاش معاكي لازم تكون أرضي، ويفضل تكون أكتر جزمة بتريحك في اللبس، ونضفيها كويس قبل ما تلبسيها، وخصوصًا لو هتشتري جزمة جديدة.
ثانيًا: شرابك يعكس صورتك أمام المجتمع
الشيء بالشيء يذكر، وما دام جبنا سيرة الجزم لازم نجيب سيرة الشربات، وما دام هنقيس جزم يبقى لازم نلبس شراب نضيف مش مقطوع، والفردتين شبه بعض. هتقوليلي إيه ده؟ مين اللي بتعمل كده؟ مش ممكن! هقولك كلنا عارفين إن الجزم ياما بتداري.
ثالثًا: بلاش مكياج بيسيح أرجوكي
عشان البلوزات اللي بقعتيها بالروج دي وإنتي بتقيسيها هتجري وراكي يوم القيامة، وعشان إنتي مش هتشتري البلوزة اللي كانت عجباكي قوي عشان بقى فيها بقعة آي لاينر أو كريم أساس. بلاش مكياج بيطلع في الهدوم لأن ده حرام والله، دي فلوس ناس.
رابعًا: من أجل طابور أقصر أمام البروفة
البسي بلوزة واسعة من غير زراير ولا سوست عشان تبقى بتتلبس وتتقلع في وقت قليل، تحتيها توب كت، ويفضل يكون مايوه عشان يبقى مشدود ومتقعديش تظبطي فيه، ويا سلام لو كان البنطلون أو الجيبة بأستك.. فيه ناس كتير واقفة برة عاوزة تدخل تقيس، متضيعيش وقتهم ووقتك.
خامسًا: التظبيط خَسَّرنا كتير
أي حاجة بتحتاج وقت كبير في التظبيط بعد اللبس تجنبيها، عشان مراية البروفة مش بتاعتك لوحدك، وفيه طابور برة طويل وفيه وقت بيضيع، يعني مثلاً لو مش محجبة لمي شعرك عشان متضطريش تقعدي تظبطيه بعد كل مرة قياس، وكمان عشان الشعر بيمسك في السوست، ولو محجبة يبقى بلاش تلبسي كذا إيشارب فوق بعض عشان بياخدوا وقت مضاعف في التظبيط، وحاولي تلبسي إيشارب مش بيتزحلق بسهولة، كمان حاولي متلبسيش فساتين أو سالوبتات؛ بتحتاج وقت كبير عشان تظبطي مكان الوسط بتاعها، وإحنا اتفقنا إن فيه وقت بيضيع.
سادسًا: الشنطة.. الشنطة.. الشنطة
شنطتك ممكن تكون السبب في إنك تتعصبي.. أنا لو شنطتي مش مريحة وأنا بعمل شوبينج بيبقى زي لو جزمتي مش مريحة بالظبط. هتسألوني إزاي ممكن تكون الشنطة مش مريحة.. ده سؤال ذكي.
أول حاجة دراع الشنطة، لازم دراع الشنطة يكون طويل كفاية إنك تعرفي تشعلقيها في دراعك بإيد واحدة، عشان لو شايلة حاجات في إيدك التانية متضطريش كل شوية تدوري على حد يمسكهالك لحد ما تلبسي الشنطة أو تفتحي الشنطة، وكمان عشان الشنطة اللي دراعها قصير بتقع كل شوية من على كتفك. تاني حاجة لازم تكون كبيرة عشان تشيل الحاجات اللي اشتريتيها الصغيرة، عشان متبقيش شايلة عشر حاجات في إيدك، وكمان لازم تكون سوستتها مش معصلجة ولا بتتفتح بصعوبة عشان تعرفي تطلعي المحفظة وتدخليها بسهولة.
سابعًا: متنسيش تدلعي نفسك
الشوبينج ده فسحة حلوة ولازم تتبسطي فيها جامد، فمتنسيش تشتري لنفسك واحد آيس كريم أو شوكولاتاية كبيرة.. ونتمنى لكم تسوقًا رائعًا.
