بعد ما خلصنا موسم العزومات والواجبات الاجتماعية اللي بتاخد النص الأول من رمضان، وكمان اتعودنا على الروتين الرمضاني وظبطنا الساعة البيلوجية واتعودنا على مواعيد الأكل، يا دوب نلحق نتفسح مرة ولا اتنين مع العيلة قبل ما تخلص الأجواء الرمضانية المميزة.
مشكلة الخروج في رمضان إن الوقت ضيق، بنفطر ونرتاح شوية ونصلي التراويح نلاقي اليوم انتهى، ولو فكرنا نفطر برة بنلاقي الأماكن زحمة جدًا وأسعار المطاعم عالية جدًا في مقابل الجودة والخدمة المقدمة، وعشان كل الناس بتروح الحسين في رمضان جبنالك أفكار مختلفة لخروجات مفعمة بالأجواء الرمضانية المناسبة للعائلة.
بما إن المطاعم زحمة وغالية وأكلها مش حلو، جهزي وجبات خفيفة في البيت وعبيها في أطباق فويل أو علب بلاستيكية م اللي بنحوشها طول السنة، عشان تخلصوا أكل وترموا الأطباق اللي فضيت. الصواني وورق العنب والكفتة والبانيه أكلات مناسبة جدًا للأكل برة.
هتاخدوا الأكل وتروحوا مكان من دول:
الأزهر بارك: مكان مهما ازدحم هتلاقي مكان واسع تقعدي فيه، ممكن على الباب تسيبي بطاقتك الشخصية وتاخدي حصيرة تقعدوا عليها. بعد الفطار والنوم على النجيلة العبي مع أطفالك بعيدًا عن الكيدز إيريا.. بتكون زحمة ومزعجة وبتضيع فرصة لعبك وقربك من أطفالك، ابتكروا ألعاب سوا واجروا في الهواء الطلق. المكان مناسب لكل الأعمار والحمامات نضيفة وبياعين المية والعصاير منتشرين في كل الجنينة.
كارفور المعادي: “الفود كورت” في كارفور المعادي افتتح مكان مفتوح للهواء الطلق بأجواء رمضانية، هتلاقي تخت شرقي وبائع عرقسوس، وأمن المكان بأزياء مزركشة برسومات الخيامية. فيه هناك مطاعم فاست فود ممكن تاكلوا منها، لكن يُفضَّل تصبروا لبعد الفطار بشوية عشان الزحمة أو تاخدي أكلك معاكي برضو.
جوار الأوليا: بما إن كل الناس بتتوجه للحسين خلينا إحنا نتآنس بجوار الأوليا في السيدة زينب أو السيدة نفيسة، والأخير أنسب لو أطفالك أصغر، لأن فيه ساحة كبيرة مبيمرش منها العربيات، وممكن تقعدوا على قهوة بلدي تشربوا الشاي والعصاير وأطفالك يختبروا تجربة جديدة مع مراجيح المولد. المكان بالطبع غير مناسب لكل الأذواق لكنه قطعًا مناسب للي يحبوا العودة للقديم ويختبروا تجربة مميزة في منطقة شعبية، ومناسب كمان للخروجات وقت تعب الميزانية.
شارع المعز: طبعًا مبقاش مميز زي زمان بسبب استيلاء المقاهي على الشارع كله والأغاني المزعجة في كل مكان، لكن لسة الشارع فيه كنوز مش كل الناس عارفينها.
هتاخدي فطارك معاكي زي ما اتفقنا وبعد الشاي والبيبسي والصور المميزة، هتلاقي بيت الشعر بيعمل أمسية شعرية من الشعر الصوفي كل يوم أحد، وبيت العود بيقدم حفلة عزف وغناء كل يوم ثلاثاء وخميس، أما بيت السحيمي فحفلاته متنوعة ما بين العزف والغنا وعروض الأطفال. تقدري تتابعي الحفلات من هنا: https://www.facebook.com/MoezLedinAllah/posts/433905343454813
كمان لو السهرة طوِّلت فالسحور هناك على عربيات الفول هو السحور المصري الأصيل بعيدًا عن أي ادّعاءات وأجواء مزيفة.
دار الأوبرا: ممكن تفطري هناك، تجربتي كانت مع كافيتريا الهناجر وجبة شيش طاووق مشبعة كان سعرها 100 جنيه، والمشروبات الساخنة مش بتزيد عن 20 جنيه. يمكن البعض له تجارب سيئة مع الأكل هناك لكن على الأغلب الفريق اتغير أو طوروا من خدماته، وخدي بالك الدخول من الباب اللي جنب الهناجر، لإن الباب الرئيسي بيكون مقفول ساعة الفطار.
بعد الفطار بيعملوا عرض الليلة الكبيرة من الساعة 9 مجاني، ومن الساعة 10 عروض فلكورية مجانية برضو، والعروض مستمرة لحد 22 رمضان. الأهم إن المكان المفتوح والجناين مناسبة جدًا للأطفال من كل الأعمار بعيد عن الملاهي اللي بتشغل الأطفال عن اكتشاف الطبيعة أو التعارف على أطفال أخرى.
الأماكن دي كلها مُجرَّبة ومميزة بالأجواء الرمضانية بعيد عن الزحمة والمصاريف اللي ملهاش مقابل.. لسة فيه وقت تلحقي تخرجي مع أطفالك وتعيشوا رمضان بشكل مختلف.
خروجات رمضانية برة الحسين
