منار حازم
كل سنة وإنتو طيبين، العيد ع الأبواب، لو إنتي كنتي زيي بتحبي تلبسي وتلبِّسي عيالك ماركات وتتشيكي فإنتي عندك مشكلة كبيرة زيي.
Zara وveromoda وmango بقى عيب أصلاً إنك تدخليهم، وH&M وpull&bear وbershka بقت أقل قطعة فيه بعد الخصم والذي منه 400 جنيه، وpayless ده مبقاش باي ليس خالص، بقى باي مور، ومش هحكيلكم بقى على مأساة أسعار ملابس الأطفال وmother care وkiabi والحاجات استغفر الله العظيم دي.. طيب الحل إيه والعيد خلاص قرب ورمضان جابنا على الحديدة ومبقاش فيه فلوس للهدوم ولا وقت للف؟!
أنا عملتلكم جدول على قد ما قدرت بالأماكن الرخيصة واللي ممكن ننجز منها ونجيب هدوم العيلة كلها ومندفعش كتير:
أول مكان سوق الخميس في المطرية
المحلات اللي في ضهر مستشفى المطرية جنب سجل مدني المطرية.. دول عندهم بواقي ملابس مستوردة ومحلي، بأسعار قليلة جدًا وموديلات حديثة، وهتلاقي رجالي وحريمي وأطفالي. السوق ده في العادي شغال يوم الخميس بس، لكن بيشتغل الأسبوع اللي قبل العيد كله وهيبقى شغال لحد يوم الخميس الصبح.. أكبر ميزة فيه إنك ممكن تفاصلي هناك وميهمكيش، ودوسي ع الآخر في الفصال، وأكبر مشكلة إن الموديلات مش متوافر منها مقاسات وألوان لأن دي بواقي محلات.. بس الحاجات جديدة وبالتيكت.
تعرفي على: كيف تشتري المايوة المناسب؟
تاني مكان وكالة البلح
المكان ده فيه كل حاجة، وماركات وموديلات السنة دي وطبعًا رخيص جدًا، عيبه إن معظم الحاجات مستعملة، فنصيحة دوري ع التيكت.. طبعًا فاصلي جدًا إلا لو فيه سعر متعلق، متتعبيش نفسك.. العيب التاني للمكان الزحمة، بس الميزة الكبيرة هناك بيتباع الملابس الداخلية والباديهات التوكيل زي كارينا وقطونيل ودايس بأسعار أقل كتير من التوكيل، وملحوظة صغيرة: خلي بالك من موبايلك ومحفظتك.
تالت مكان محلات البيع بالكيلو
نفس فكرة الوكالة بس التنوع أقل والزحمة أكتر، بنصح بيه بس لو المحل قريب قوي من البيت عندك.
رابع حاجة محلات بواقي التصدير
ودي نختصرها في شعبان وضجة وجاد غنيم ونايل ستوك، ودي ميزتها إن الخامات مصري، يعني قطن وفسكوز وكتان طبيعي، وتقفيل مستواه مش بطال خالص، وموجود منه في كل مكان في مصر، عيبه بس إنه مش مرضي لكل الأذواق، فلازم تدوري كويس عشان تلاقي حاجة حلوة وع الموضة.
خامس مكان المنصوري
في الأول كان متخصص في الجينز الرجالي بس، لكن دلوقتي بقى عنده كل حاجة رجالي وحريمي وأطفالي وملابس بيت كمان وأسعاره حلوة، عيبه إن ملوش فروع كتير، أنا اتكعبلت فيه عندنا في فيصل محطة المساحة بالصدفة، مكان منظم جدًا والناس هناك متعاونين جدًا.
فيه برضو سوق توشكى في حلوان
هتركبي المترو وتنزلي محطة حلوان وتاخدي توك توك للسوق، أو ممكن تتمشيها.
لو عاوزة تجيبي جينزات بسعر كويس جدًا فعندك بقى الشوارع المتخصصة في الجينز الصناعة المحلي، ودي زي شارع ضياء في محطة المطبعة في الهرم، وشارع الشواربي في وسط البلد، وشارع إسكندرية في المطرية، وممر الراعي الصالح في شبرا.
أما لو عاوزة تجيبي جينز بسعر متوسط وجودة عالية عليكي وعلى سيزارو، وده ميزته كمان إن له صفحة ع الفيسبوك مكتوب فيها كل فروعهم وأشكال البنطلونات وأسعارها.
ده لينك الصفحة بتاعتهم https://www.facebook.com/cizaro.clothes/
جبنا اللبس خلاص وعاوزين نجيب الجزم والفلوس خلصت والميزانية خرمت، عليكي وعلى دارك ستور، جودة عالية وسعر مناسب. https://www.facebook.com/drakestore.egypt/
وزيه محل 3m، وله فروع برضو في كل حتة، ولو محتارة في مكانه فين جنبك ادخلي على صفحته ودوري على أقرب فرع ليكي.https://www.facebook.com/3MStores/
ولو عاملة ميزانية معقولة للجزمة والشنطة ممكن تبصي بصة على كلاود سفن
https://www.facebook.com/cloud7eg/
أو شو رووم https://www.facebook.com/shoeroom.egypt/
جبتي جزمة ليكي وعاوزة تجيبي لولادك؟ بصي على ماركة بامبينو للأطفال في أي محلات ملابس أطفال، بجد سعرها كويس وموديلاتها شيك جدًا.. أنا بجيبها لـ”أمينة” بنتي من واحد فارش ع الرصيف في ميدان السيدة بيبعها أرخص خمسين جنيه من المحلات.
لو نزلتي السيدة ولسة مجبتيش ملابس داخلية أو بيجامة العيد ليكي وللولاد، يبقى عدي على سوق الميضة اللي ورا جامع السيدة على طول، ومتنسيش تبصي على لبس خروج لولادك كمان، عندهم حاجات بجد شيك.. بس خلي بالك السيدة زحمة فأمِّني على ولادك وعلى محفظتك، ويستحسن لو هتنزلي السيدة تفطري في الشارع في أي مطعم هناك، عشان تلحقي تلفي قبل زحمة التراويح.
Max هو آخر مكان ماركة أرشحه ليكي، أسعاره لسة معقولة، ولو إنها برضو زادت كتير عن زمان.. بس حاجة الأطفال لسة رخيصة وكمان جودتها عالية، وعندهم توك جميلة وشنط خروج.
ده اللي أنا عرفت أجمعه، ولو حد فيكم يعرف مكان أنا مكتبتوش يكتبه هنا في تعليق.
