كنت سعيدة الحظ إني أشوف جزء من كتاب “نور الشمس” اللي لسه تحت الإعداد، وقع تحت إيدي موضوع بيتكلم عن الزيوت العطرية وأثرها على الصحة النفسية للأشخاص، عجبني الموضوع جدًا خاصة إني من الناس اللي بيتعصبوا بسرعة وأعصابهم ما بتصدق تولع. قررت أبحث في الموضوع أكتر وأشوف إزاي نقدر نستخدم الزيوت العطرية بشكل عملي في البيوت، وكان إنه اتفتحلي بوابة علي بابا للاسترخاء، لقيت الكتير من استخدامات الزيوت العطرية للتنظيف وإبعاد الناموس والكتير من الاستخدامات التانية، لكن اللي هاعرضها النهاردة هي نتيجة بحثي عن استخدامات الزيوت العطرية لإراحة الأعصاب.
فيه بعض أنواع الزيوت معروفة إنها بتُستخدم تحديدًا لتهدئة الأعصاب والشعور بالانتعاش ورفع الروح المعنوية، من السهل إننا نجيبهم في عبوات صغيرة من عند العطار، ونعمل مزيج مميز منهم في البيت، وخلي بالك إنه غالباً بيتم استخدام الزيوت مع المياه ومش بيتم وضعها مباشرة على الجلد لإن تركيزها بيكون عالي جداً.
مع الاستحمام:
إملي البانيو بميّه دافية، وضيفي 9 نقط من الزيوت العطرية واللي ممكن تمزجيها مع معلقة عسل ومعلقة لبن. ممكن الـ9 نقط يكونوا من نفس نوع الزيت، أو يكونوا خليط من أكتر من نوع، بنقترح عليكي خليط من اللافندر والبرغموث. ضيفي المزيج ده قبل دخول البانيو مباشرة.
لعمل المساج:
سواء هتعملي المساج لنفسك أو حد هيعملهولك، جربي تحطي لحد 20 نقطة زيت وتخلطيهم بزيت المساج أو بالميّه، من المفضل استخدام زيت خشب الأرز واللافندر، المزيج ده هيفك تشابك العضلات ويهدّي الأعصاب.
للاستنشاق:
علشان تفتحي مسام البشرة ومجرى التنفس وتهدّي أعصابك، كل ده ممكن تعمليه في خطوة واحدة، حطي ميّه سخنة في وعاء، وضيفي عليهم زيت الليمون مع الكينا (الأوكاليبتوس)، مجموع الزيتين مايزيدش عن 7 نقط. حطي وشك بالقرب من الميّه وغطي دماغك مع الميّه بفوطة، وخلي الزيت يعمل مفعوله.
على الوجه:
ممكن بعد يوم مرهق جداً في الشغل في حالة إنك مش قادرة تعملي وعاء الميّه ولا تملي البانيو وتدخلي فيه، عندك حل سريع جدا. هاتي فوطة صغيرة وحطيها في وعاء مليان ميّه، ومعاه خليط زيوت من خشب الأرز والجريب فروت واللافندر، يكونوا حوالي 8 نقط، اعصريها وحطيها على وشك علشان تسترخي.
في الجو:
مش لازم الزيوت العطرية تستخدميها على بشرتك، ممكن تخليها في الجو والكل يستنشقها وبالتالي تهدي أعصاب كل الموجودين في البيت، ده ممكن تعمليه بطريقتين، الأولى إنك تمزجي حوالي 7 نقط من الزيت المفضل في بخاخة صغيرة وامليها بالمياه ورجيها كويس، ورشيها في الجو. تاني طريقة إنك تولعي شمع وتحطي نقط من الزيت على الشمع اللي بيسيح من فوق، بينشر ريحة الزيت في البيت كله.
ريحي أعصابك كل يوم أي وقت:
ممكن وقت الروقان تعملي كام خطوة تنفعك وقت ما تحتاجيلها، جهزي أكتر من بخاخة صغيرة اللي قلنا طريقتها فوق، تخلي واحدة ترشي بيها قاعدة الحمام، وواحدة ترشي بيها الملايات والمخدات والأغطية. حطي حوالي 6 نقط من مزيجك المفضل من الزيوت العطرية على اللوشن اللي على طول بتستخدميه (بشرط إنه يكون من غير ريحة)، وحطي قطنة عليها الزيت في أركان دولاب المطبخ وفي أركان المطبخ نفسه، ده كفيل بتهدئة أعصابك ويساعدك على الاسترخاء دايماً، غير إنه هيخلي ريحة البيت حلوة دايما وبطرق غير مضرة بالبيئة.
أشهر روائح الزيوت العطرية اللي بتساعد على الاسترخاء هي: الريحان، البرغموث، خشب الأرز، البابونج، السترونيلا، مريمية الكلاري، السرو، الكينا (الأوكاليبتوس)، الغرنوقي (إبرة الراعي)، الجريب فروت أو الليمون الهندي، الخزامي واللافندر.
بينما الليمون وحامض الليمون بيدوا إحساس بالبرودة والانتعاش.
تمت الاستعانة بكتاب (نور الشمس) قيد الإعداد
