بقلم/ ندى عصفور
الحياة بقيت صعبة. المدير بتاعي في الشغل تعبني جدًا، وواحد من زملائي عمال يوقع بيني وبين زملائي التانيين؛ خلاص زهقت وتعبت. جوزي مش بيساعد في البيت وكل شغل البيت عليّ والولاد مجننيني في المذاكرة ومطلعين عيني، والصغيرة في عز الليل تقومني عايزة تغير وترضع وتلعب، ومعنديش وقت أنام. الوحدة مجنناني، مفيش جديد في حياتي، صحابي انشغلوا بعد التخرج عني، ولا فيه عريس ولا خطيب يسأل عني، فيه فراغ كبير في حياتي.
كل دي شكاوى بنشتكي منها كل يوم أو بنسمعها ونتمناها تختفي من حياتنا.. طيب ممكن أقولكم حاجة؟ هي الدنيا كده، حلاوتها في صعوبتها ومشكلاتها، بس الحلو فيها إننا ممكن نستمتع بيها طالما عايشين فيها. طيب أقولكم على فكرة أحلى؟ ممكن نرمى الكلام اللي فات ده كله ورا ظهورنا؟ ما تيجوا نتجنن، نخرج برة إطار الرسميات اللي عايشين فيه طالما مش هنعمل حاجة عيب ولا حرام، نتجنن ونغير المود، نخرّج كل الطاقة السلبية اللي جوانا ونرجع تاني لحياتنا بشكل أكثر إيجابية وسعادة.
طيب إزاي؟
إليكم 15 طريقة للجنان، وادعولي بعدها:
1- لو عندك عجلة مركونة في بيتكم طلعها، حتى هتبقى رياضية، وفي جو المطر الجميل ده اركبها وانزل اتمشى في الشوارع، وروح بعدها كل ذرة أو بطاطا مشوية، أو روح كل برونى بالآيس كريم وعليها صوص شوكولاتة سخنة ومعاها كوباية نسكافيه سخن، واستمتع.
2- لو العيال مطلعين عينك وتاعبينك ومش عارفة تخرجي برة البيت بيهم، اتجنني معاهم، البسي ألوانات ملهاش علاقة ببعضها، انكشي شعرك عادي جوزك هيقول عليكي اتجننتي متقلقيش، كملي وحطي ميكاب متلخبط زي البلياتشو وغيري صوتك وادخلي العبي معاهم بالبالونات أو بالدقيق والعجين اعملوا أشكال، اتجننوا وخلاص، بجد هتتبسطي وهم مش هينسوا اليوم ده طول حياتهم.
تعرفي على: 4 خطوات لدهان الشقة بنفسك
3- لو مخنوقة ومش لاقية حد يتكلم معاكي اقعدي كلمي نفسك بصوت عالي، سجلي كلامك على موبايلك، شخبطي في الورق وقطعيه وطلعي كل جنانك في الورق، انكشي شعرك، اصرخي، طلعي كل اللي جواكي، ساعتها هتحسي براحة نفسية جامدة، ومتقلقيش لو الجيران قالوا عليكي مجنونة، المهم إنك مبقتيش مخنوقة.
4- لو زهقانة إنتي وجوزك من روتين الحياة ومللها والعيال وزنّهم، ودّوا العيال عند حماتك أو مامتك، المهم تسربوا العيال، وخدوا بعضكم سافروا وقضوا يوم كامل مع بعض، هتحسوا إنكم اتولدوا من جديد.
5- لو أصحابك مش فاضيين وزهقانة البسي وانزلي روحي ادخلي سينما أو روحي كُلي أحلى أكل بتحبيه، أو روحي عند الكوافيرة غيّري لون شعرك عادي يعني مش هيحصل حاجة.
6- طيب أقولك على حاجة تانية، لو بابا وماما رفضوا، ادوشيهم شغّلي أغنية شعبي من الموجودين اليومين دول وانكشي شعرك، لأن ده سر الجنان، واقعدي غنّي وارقصي بصوت عالي، متقلقيش، ساعتها هيندموا على رفضهم ده، وممكن الحاجة والحاج يشاركوكي الجنان.
7- خدلك يوم راحة أجازة من المسؤولية.. سافر.. اطلع سفاري.. خد يخت أو مركب واطلع رحلة صيد مع أصحابك، أو لوحدك مش مشكلة، المهم تستمتع وتنسجم وترجع آخر روقان للمدام والولاد وللشغل.
8- لو زهقت من استايل حياتك ومودها كلها على بعضها، شايفة دولابك ده؟ جيبي كيس كبير وفضي كل اللي فيه واتبرعي بيه، وروحي اشتري لبس جديد بألوان جديدة واستايل جديد، المهم إنك تكوني مبسوطة وتلاقي حد يدفعلك.
9- ممكن تنزل في عز البرد ده وتقعد على النيل/ على البحر/ على الرصيف، وتربع وتلعب ألعاب ثلاثية الأبعاد، هتستمتع ومش هتحس بالوقت.
10- زهقان من لبس الشغل والبِدَل؟ هيحصل إيه يعني لو لبست بنطلون كاجوال فاتح وقميص كاجوال وفوقه جاكيت كاجوال، مش بنطلون وقميص وجاكيت؟ يعني بدلة! صح ولا إيه؟!
11- لو ليك في الخيل، في الجو الجامد ده تطلع الجبل وتاكل آيس كريم، ويا سلام بقى لو ليلة قمرية!
12- جيبي دهان أبيض وادهني حيطة في الشقة واقعدي ارسمي، هيحصل إيه يعني؟ شقتك وحيطتك وإنتي حرة فيهم.
13- امشي في وسط الشارع وغنّي بصوت عالي وحطي السماعة على ودانك عشان متسمعيش رد فعل الناس.
14- روح كُل أكل صيني أو ياباني حتى، أكل غريب عنك متعرفهوش.
15- غيّري ترتيب عفش الشقة كله أو لونه، عادي مش هيحصل حاجة.
اتجننوا واستمتعوا وبصوا للنص المليان بسعادة ورضا وإيمان.
