كلنا عارفين المشهد ده، مع آخر بوسة على خد آخر ضيفة وهي ماشية وإنتي بتقفلي الباب، فيه حتة جواكي بتشيل الهم، بتخافي تعتِّبي المطبخ، مش لأنه مليان مواعين بس، لأنه مفيش مكان لرجل تقف فيه، بواقي صينية المكرونة هنا، وسلطانيات المهلبية اللي محدش لمسها هناك.. مأساااااة!
عشان عزايم السنة دي متبقاش زي عزايم كل سنة، وخصوصًا لو دي أول سنة ليكي تبقي صاحبة العزومة، فيه بتاع عشرين حاجة لازم تعرفيهم، أهمهم: الوصفة بتتاخد من ماما، الكمية لأ، عشان ماما كان عندها إنتو كفاءة تقوموا بأي بواقي، إنما إنتي محدش هيرجَّعلك تكاليف البواقي دي، ولا حد هيرضى ياكل أكل بايت لمدة أسبوع.
عشان تظبطي الكمية على قد العدد، فيه شوية حاجات بتتقاس بالمعلقة، وشوية حاجات بـ”السينس” ومدى معرفتك بضيوفك، خلينا في اللي بيتقاس بالرقم:
– المقبلات: السمبوسة والكبيبة والحاجات دي، خلي دايمًا فيه 4 منها لكل فرد.
– الأطباق الجانبية زي الخضار واللحوم اللي فيها صوص، كل فرد بيحتاج خمس ملاعق كبيرة.
– الأرز: نص كوباية رز مصري أو تلت كوب بسمتي من الأرز الني، لكل فرد.
– اللحوم: 225 جرام من اللحم لكل فرد، يعني الكيلو يكفي 4 أفراد تقريبًا.
– الشوربة: كوب ماء لكل فرد، لتر ماء يصنع شوربة لأربع أفراد.
– خمني الطبق اللي هيتنسف على السفرة، على حسب اللي ضيوفك بيحبوه، وخلي الكمية الأكبر منه، بدل ما تعملي أطباق كتير ومتتاكلش.
– للمكرونة والبطاطس والسلطة: كوب كبير لكل فرد.
– الحلويات: القوالب على شكل دائري من البسبوسة والكنافة وغيرها، تكفي من 6 إلى 8 أفراد، والأنواع التانية تتعامل معاملة المقبلات في الأول.
– القوالب زي صينية المكرونة، حضري قالب واحد لكل 6 أفراد.
تعرفي على: قطعيات اللحوم واستخداماتها
وعشان العزومة تعدي على خير، فيه شوية احتياطات لازم تتاخد:
– اعملي دايمًا حساب نفر أو اتنين زيادة في العزومة، عشان لو فيه حد جاب حد معاه أو حد شهيته مفتوحة شوية.
– اعملي حساب الأطفال، سواء في كمية الأكل، أو في نوعيته كمان، فكري زي الأطفال، ومتديهمش مكونات فيها سوائل يبهدلولك السفرة بيها.
– اسألي الناس عن ذوقها، شوفي لو حد عامل ريجيم، لو حد مبياكلش لحوم أو مبيحبش توابل معينة، الحاجات دي بتوفر جدًا في هدر الأكل، وبتخلي كل شخص حاسس إنه مهم عندك وإنك بتقدريه.
– خلي عندك أطباق فويل وفوم، عشان الباقي من الأكل يتعلب في ثواني ويتقدم للناس وهي مروحة، الطريقة دي بتدي انطباع عنك إنك كريمة، وبتخلصك من بواقي الأكل اللي هتكركب التلاجة لحد ما تحمض وتترمي.
– العصائر خليها متنوعة، بس النسبة الكبيرة للمكون المحبوب، يعني مثلاً الصودا الغامقة هي نص الكمية، والألوان الباقية إزازة واحدة من كل لون.
وأخيرًا: خدع وأسرار تزود كمية الأكل وتقلل تكلفته:
أوقات كتير قوي بتتصدمي بالعدد اللي جاي، بالسعر اللي زاد عن اللي توقعتيه، بإن الكمية أثناء التحضير شكلها قليل، مشاكل كتير بتظهر في يوم العزومة، عشان كده فيه شوية تكات، تزودلك كمية الأكل من غير ما تشتري زيادة:
– اللحمة المفرومة
لو اللحمة المفرومة اللي هتعملي بيها كفتة ولا هتدخليها في أي وصفة، طلعت أقل من اللي محتاجاه، جربي تخلطيها بفول الصويا، الفول ده اللي بيتعمل منه اللحم النباتي، وطعمه بياخد طعم اللحمة، وهيندمج فيها ويزود الكمية من غير ما تضطري تزودي لحمة تاني، الفكرة دي تنفع تزودلك نص كيلو اللحمة المفرومة لكيلو ونص كفتة.
– الشيش طاووق:
الفكرة دي هتنفعك في أي حاجة، اللحوم أو الفراخ فيها قطع، ضيفي بطاطس مقطع مكعبات، وسط اللحوم والخضار، سواء في الحلة أو السيخ بتاع الشيش، بتدي تنوع ألوان بيخلي شكل الشيش حلو، زي بتاع المطاعم، لما بيحطوا البصل القاورما في النص مع الفلفل والبطاطس بين كل قطعة لحم والتانية.
– الفاهيتا والشاورما:
قدمي الفاهيتا والشاورما إما في سندوتشات راب، أو في طبق مكرونة، بلاش أبدًا تحطيها في طبق لوحدها، ده بيدي وهم إن كميتها قليلة مهما كان وزنها الحقيقي، عشان متقطعة صغيرة، وكمان جوة السندوتش ممكن تعتمدي على المخلل والبطاطس في زيادة الكمية، وجوة طبق المكرونة، المكرونة هتعمل معاكي واجب.
حلول للأماكن الضيقة:
بيوتنا مبقتش زي بيوت زمان، دلوقتي بسهولة تشبي وتلمسي السقف، ولا شوية لعب هنا وفوطة على الأرض هناك، يحسسوكي إن شقتك مكركبة، عشان كده مبقاش فيه جو السفرة الأتناشر كرسي اللي بيقعد صاحب البيت على راسها دي، ودي مش حاجة وحشة قوي يعني، لو عرفنا نتكيف معاها ونستغل البيت كله صح وقت الأكل.
لو إنتي محظوظة وضيوفك على قد كراسي سفرتك:
وسعي على نفسك وعلى الأطباق، وانقلي المشروبات والأكواب الزيادة لترابيزة جانبية، والحلويات وكل حاجة ممكن تتقدم مرة واحدة وتتشال، وخلي دايمًا فيه استعداد إنك تشيلي السرفيز اللي يفضى من على السفرة للترابيزة دي.
– اعملي ترابيزة للأطفال لوحدهم، عشان متبقاش كل أم محتاسة بابنها، وبرضو تقدري تحجمي الخساير واللي هيتدلق، ممكن تبقى ترابيزة مذاكرة أو ترابيزة طفل، وممكن تبقى فرش على الأرض يعتبروه الأطفال لعبة.
– يا سلام لو نتخلص من عقدة السرفيز ونطلع الأطباق مغروفة جاهزة وكل واحد قدامه طبقه فيه كل الأصناف من المطبخ، مواعين أقل ودربكة أقل، بس نقول إيه!
لو عدد ضيوفك أكبر من عدد كراسي سفرتك:
استخدمي كل الحلول اللي فاتت، مع بعضهم، وزودي عليهم، إنك تحولي ترابيزة السفرة لبوفيه مفتوح، حضري عليه كل الأطباق مرصوصة جنب بعض، وجنبه أطباق فاضية، وكل ضيف يحضر طبق كبير لنفسه، وينتشر في أرجاء البيت، الأنتريه مع كراسي السفرة، هيكفي الكل، ويخلي الحوار أسهل، وترابيزات صغيرة منتشرة لكوبايات المشروبات.
وآخر حاجة قبل ما أسيبك لضيوفك، متنسيش “الطبق المحتار”، الطبق اللي بنبعته للجيران بحاجة من أكل البيت النهارده، ويرجع بكرة بحاجة من أكلهم، وهكذا يفضل محتار بيننا لآخر الشهر، حافظي على العادات اللي كنتي بتشوفيها في بيت جدتك، وطبق كمان للبواب، لأن اللي شاف الأكل طالع وشم ريحة الطبيخ طول اليوم، لازم يدوق منه.
خدع وأسرار تزود كمية الأكل وتقلل تكلفته
