بقلم/ وفاء مرزوق
قعدت في ركنها المُفضل عينيها متعلقة ع الحيط، وكأنها قدام شاشة عرض سينمائية بتتفرج على شريط ذكرياتها، حبها الأول، الرسائل، الشوق، الكلام المعسول، الوعود… وسألت نفسها هو كل ده راح فين؟! ليه بقيت غريبة عن الشخص اللي حلمت بالارتباط بيه؟! بقوا غرباء تحت سقف بيت واحد! ليه بقوا وكأنهم ميعرفوش بعض؟! ليه مبقاش فيه لغة حوار بينهم؟! ليه كل ما يقعدوا يبقى الخناق تالتهم؟! راح فين الاحترام اللي كان بينهم؟
بقت تشحت منه الحُب اللي ميعرفلوش مكان إلا السرير.. مش ده اللي هي عايزاه!
دموعها سبقتها أول ما افتكرت أقوى ذكرياتها، وجع بالنسبة لها، حسِّت بألم في كل جسمها لما افتكرت أول مرة جوزها مد إيده عليها، الوجع اللي حست بيه مش وجع جسمها، لكن وجع نفسها وكسرة قلبها. والحقيقة قلبها اتكسر مرتين، المرة التانية لما عرفت خيانته ليها، وحست بخزي جواها كأن ناقصها حاجة كأنثى.
معقولة تكون اتجوزت الشخص الغلط؟! وإن كان ده سؤال متأخر قوي.
اقرئي أيضًا: قصة فيلم ولا عزاء للسيدات قصة كل مطلقة في عيون السينما
حضنت بنتها بقوة وهمست في ودانها، وإن كانت متأكدة إنها مش هتفهم حاجة من اللي هتقوله ليها، بس كانت عايزة تنقش جواها وصيتها، حبت تسيب جواها رسالة، وابتدت تكلمها فعلاً وتقولها:
فكري.. فكري مليون مرة قبل ما تقولي آه هو ده الراجل اللي هتجوزه، هل هو ده الراجل اللي إنتي عايزة تقضي معاه الباقي من عُمرك؟ اسألي نفسك هو ده الراجل اللي هتشاركيه أدق تفاصيل حياتك؟ هو ده الراجل اللي هتقدري تتكلمي معاه في كل حاجة تخصك؟ هو ده الراجل اللي هتشاركيه أحلامك وطموحك ورؤيتك؟ هو ده الراجل اللي قدامه هتكون دموعك وابتسامتك متقدرين؟
هو ده الراجل اللي هيشاركك الطفلة اللي جواكي براءتها، والشابة اللي جواكي انطلاقها، والعاقل اللي فيكي لما يطلع وقت ما تحتاجوا تفكروا في قرار كبير في الحياة؟ ده الشخص اللي هيحترمك ويتفهم كل ده! ده الشخص اللي هتفتحي عينيك عليه كل يوم؟ ده الشخص اللي لما تحضني طفل منه تحسي بدفء وفخر؟
هو ده الراجل اللي مهما كنتي قادرة على اتخاذ قرارات هتبقي مرتاحة إن هو في دور القيادة للحياة؟ ده الراجل اللي مالي عينيكي بمعنى مالي عينيكي؟ ده الراجل اللي هتعجزوا مع بعض وتفضلوا برضو تحبوا بعض وتبتكروا في طرق الحُب دي؟ هو ده الراجل اللي فاهم معنى الرجولة الحقيقية إيه؟ ده الراجل اللي له رؤية في الحياة؟ ده الراجل اللي وجودك معاه مش صدفة ولا قدر ولا ضغط، لكن وجودك معاه قرار حُر إرادي واعي؟ هو ده الراجل اللي هتكونوا مع بعض اتنين متناغمين ولسة متميزين؟
اعرفوا بعض كويس قوي، عشان الرجوع وإنتو ع البر أسهل من بعد كده بكتير.
بصت في عيون بنتها بعمق وكأنها عايزة تتأكد إنها استقبلت كل كلامها اللي قالته.
قرار صعب إنها تطلب الطلاق وقرار أصعب إنها تكمل.. وصمة كلمة “مطلقة” قدامها زي الكابوس، المُطلقة نغمة نشاز وسط نوتة ماشية زي بعضها. وسط ناس استسلمت للوضع اللي هي فيه.
مُطلقة يعني فنجان قهوة وسيجارة، يعني واحدة سهلة لكل عابر، مُطلقة.. هي خافت تكمل باقي أفكارها.. خافت من الكلمة.. وقررت تكون مُطلقة بس في عصمة راجل.
لأن مطلقة يعني واحدة سهلة
