بقلم/ منى مجاهد
أنا وكل اللي حواليّ بقينا على طول مهمومين، ومهما حاولنا نسعد نفسنا مش بنكون سعداء.. ففكرت إيه ممكن يكون السبب، لحد ما وصلت لخمستاشر سبب بيحجبوا عننا السعادة.
1- حب السعادة للنفس
لما بنيجي نفرح بنحب نفرح لوحدنا، مبقاش عندنا ثقافة إن الفرحة بتزيد بالناس.. اعرف إن الحزن بيقل كل ما العدد اللي شاله أكبر والسعادة بتزيد برضو كل ما العدد اللي حسوا معاك كتر وزاد.
2- خط السعادة
مش عارفة ليه الكل حاطط خط عريض للسعادة لازم يوصلّه وإلا يبقى تعيس. طيب ولو موصلناش نموت يعنى من القهر ع الأحلام اللي انهارت؟!
3- الخوف من الحسد
بقينا نخاف نحكي على حاجة فرحتنا أحسن نتحسد، فبقى عندنا ثقافة نحكي الحاجة اللي مضايقانا بس. اللي منعرفهوش بقى إن إحنا كده بنزود الطاقة السلبية من كتر الشكوى اللي بنقولها وبنسمعها، أصلك مش لوحدك اللي بقيت تخاف من الحسد، فتخيلوا بقى الكل بيشتكي يبقى حياتنا عاملة إزاي!
4- عدم وجود بدائل
يعني ليه لما بنكون حاطين هدف قدام عينينا منحطش كذا سيناريو متوقع حدوثه، وبدايل متاحة بحيث لو فيه حاجة احصلتش نلاقي غيرها اتحققت.
5- بنمشي في مشوار طويل
مشكلتنا إننا بنفضل نمشي في مشوار طويل وننسى نفسنا، لكن لما تقسم مشوارك بعد كل خطوة هتحس بالإنجاز والسعادة، وقتها خد ريست واحتفل، بالظبط زي ما تكون مسافر وبتحتاج ريست تريح فيه نفسك وجسمك، خد أجازة، سافر أو اخرج مع أصحابك، واليوم ده كافئ نفسك وافرح بيها أوي.
6- نسينا نتنفس
آه والله زي ما بقولك كده! فممكن تدي لنفسك حق إنها تتنفس، لأن ده الوقود بتاعها، مش محتاج بس إلا خمس دقايق في اليوم متعملش حاجة فيهم إلا إنك بتتنفس صح.
7- اعتبرناها حاجات تافهة وثانوية
مين قال إن لو اشتريت لنفسك شوكولاتة دي حاجة تافهة؟ ومين قال إنك لو دخلت أغلى محل هدايا واشتريت هدية قيمة واديتها لنفسك ده مرض نفسي؟ طيب بذمتكم كده في حد أغلى من نفسك تجيبلها هدية غالية.
8- بنتكلم بس عن السلبيات
مبقاش عندنا طولة بال وشايفين بس السلبيات، لو جرّبنا نبص على الجزء الإيجابي هتلاقي نفسك مع الوقت بقيت سعيد وإيجابي، لأن دماغك اتبرمجت على كده وعينك اتعودت تشوف الإيجابيات بس.
9- غريب أوي طبعك
يعني بتبقى مبتحبش السعادة للناس وبتتنح كده ويملا قلبك الحقد لما تلاقي حد فرحان وعاوز تبقى سعيد؟! نضفوا قلبكم من الحقد وحب لأخيك ما تحبه لنفسك.
10- نسينا نرفع إيدينا للسما
البعد عن ربنا هم، اتكلم مع ربنا واطلب منه دايما إنه يسعدك.. قرب منه وهو هيفرحك، وفيه دعاء سحري اسمه “اللهم إني أعوذ بك من الهم والغم والكسل” جرّب تقوله كل يوم الصبح وآخر النهار، وكن على يقين إن يومك هيتغير للأفضل.
11- بنعمل الغلط
اوعى تكون بتعمل حاجة حرام وغلط ومنتظر تبقى مبسوط؛ الفرحة في راحة البال ونظافة القلب من الذنوب.
12- لازم ابقى هيرو
إنت مش هيرو، ومش لازم تبقى كل حاجة وشخصية فظيعة، بس خليك زي ما إنت، إنت حلو ومميز بكل ما فيك، واعمل اللي بتحبه وبترتاح وإنت بتعمله.
13- رافعين شعار 111
وشك نسي الضحكة؟ طيب عمرك قابلت ناس تفرحلهم أوي من أقل حاجة حلوة تحصلهم؟ عارف ليه بتحس بكده؟ لأنهم دايمًا بيفرّحوا الناس بضحكتهم وروحهم الحلوة، فالناس دايمًا بتتمنالهم الخير وتدعيلهم إن ربنا يسعدهم، خليك واحد من دول.
14- حاطين قتب فوق ضهرنا
طول الوقت إحنا بنيجي على أعصابنا وصنعنا فوق ضهرنا، قتب أصحاب بيتعبونا أكتر ما بنفرح معاهم ونرتاح في حضنهم، خلي أصحابك هي الناس اللي بتبقى مرتاح وعلى طبيعتك وإنت قاعد معاهم، وابعد عن الناس اللي بيبقوا سبب في تصنعك. الدنيا صغيرة؛ استمتع بيها مع ناس تحبهم من قلبك.
15- قلة الرضا ونقص المال
نظرنا بقى ضعيف ورابطين السعادة بالفلوس وبس. ارضى بنفسك ورزقك اللي ربنا قسمهولك، وافهم إن الرزق ده صحة وأصحاب وعقل ووقت وولاد وراحة بال وطيبة وأسرة… وحاجات كتير أوي.
ويا رب دايمًا قلوبكم تتملي بالحب والسعادة وراحة البال.
