دايمًا كان عندي مشكلة مع المثل ده “بعد ما شاب ودوه الكُتاب”، زي لما المدرس كان يدخل الفصل زمان ويقول “اللي ذاكر ذاكر”. الجملتين بيدوني إحساس فوات الأوان، فات الأوان تحبي، فات الأوان تخسي، فات الأوان تتعلمي. بس النهارده عايزة أحكيلك عن تجربتي مع ممارسة و تعليم الرياضة.

لايف ستايل

طول عمري بحب البنات اللي بتمارس رياضة، قوام ممشوق وفورمة مفيش بعد كده، بس آخري أتفرج عليهم بس. عمري ما حبيت أمارس أي نوع من أنواع الرياضة، لغاية ثانوية عامة مثلاً، ده غير طبعًا إني من صغري بعمل دايت أو ريجيم عشان أخس، لأني كنت طفلة تخينة ممتلئة، وطبعًا ده كان مسببلي خزي وإحراج من جسمي طول الوقت، “أكيد شكلي مش هيبقى حلو وأنا بلعب، أنا بقرة متحركة، اللعب مش للبنات اللي زيي وفي حجمي” وأفكار سلبية كتير جدًا، فمشيت في دوامة الدايت.

لدرجة إني أوقات كنت بحس إن لو جسمي قادر يصرخ فيَّ كان ضرخ من زمان، من كتر نقصان الوزن وزيادته! لغاية ما وقفت مع نفسي واقفة من حوالي سنة وأكتر، وأدركت إن الحل في اللايف ستايل (أسلوب حياتي) من أول ما بفتح عيني الصبح لغاية النوم بالليل. بعد سنة من التفكير والحيرة ومحاولات باءت بالفشل، قررت أروح الكروس فيت cross fit مع واحدة صاحبتي، وأجرب، على الأقل أتفرج وأشوف الناس دي بتعمل إيه، وإزاي قادرين يواظبوا على الشيء اللي اسمه تعليم الرياضة !

الحجم في الكتلة يساوي الزمن بالكيلو

أول يوم رُحت فيه الكروس فيت، دخلت لقيت الناس مرحبين بيَّ، ما أنا زبون جديد برضو. دخلت ألعب والكابتن قاللي اجري، اتصدمت في الأول، وبعدين عاد الكلام تاني، غالبًا آخر مرة جريت كان في حوش المدرسة في ابتدائي. اليوم عدى على خير ولعبت ومحستش إني تعبانة، لكن كنت حاسة إني أتخن واحدة في المكان، كان عندي إحساس بتقل في رجلي وأنا ماشية، كأني سامعة خطواتي، لدرجة إني كنت بقول كده للكباتن.

بصراحة مكانش عندي أي أمل إني ممكن أواظب على اللعب، بالأخص إنى كنت بحس إن المدربين بيضغطوا عليَّ، وإنهم عايزين يتعبوني وبس. حاليًا كملت 6 شهور، بلعب تقريبًا كل يوم، والأيام اللي مش بقدر أنزل فيها بحس بحاجة ناقصة في اليوم.

افرد ضهرك انفخ صدرك (بصوت حسن حسني)

إنما اللي لاحظته بعد كام أسبوع من اللعب، لما الكابتن كان بيقوللي افردي ضهرك أو أي تعليمات لجسمي عشان ألعب التمرين مظبوط، كان ردي إني “مش حاسة بجسمي”، وكانوا المدربين بيستغربوا إزاي مش حاسة؟ موجوعة؟ تعبانة؟ الإجابة: مش عارفة! بس مع الوقت واللعب عرفت. أنا كنت بتعامل مع جسمي على إنه كتلة واحدة، شوال فول سوداني متحرك.

مكنتش بحس بجسمي غير لما برقص زي أي بنت قدام المراية، لكن آخر سنة من كتر ما كرهت جسمي بطلت حتى أبص في المراية، بطلت أقيس أي هدوم من السيزون اللي فات، كنت بحس دي لعبة خسرانة مع المراية، بلاش أهزأ نفسي وأدخل فيها. وده كان أهم درس اتعلمته، إني مش كتلة واحدة، أنا عندي جسم ينفع يخضع لعقلي، مش العكس، ينفع أخليه ياكل اللي محتاجه ويتدرب وقت كافي.

أنا ضميرك يا رمضان (بصوت محمد هنيدي)

غالبًا كتير مننا أول ما بتقرأ أو تسمع كلمة دايت ورياضة، بيجي في بالها الشعور بالذنب، وممكن تحسي بتنميلة وتقل في صدرك. أنا كنت بكره الكلمتين دول، لأن المواظبة عليهم تعني تأنيب ضمير طول الوقت. لكن أنا من موقعي هذا أمام شاشة اللاب توب، بقولك لو عكيتي في الأكل اهدي خالص، خدي نفَس، متفكريش في العك والدهون، وفكري نفسك إن محدش مستعجلك على الخسسان أو الفورمة اللي نفسك تعمليها، وإن لقب ملكة جمال الأرجنتين ملهوش ديدلاين، وإنك بكرة هتنزلي تلعبي رياضة وهتتعبي وتعرقي وتحسي بالإنجاز من تاني.

وخليني أفكرك ببداية حكايتي، وهي إن الفكرة مش وقت محدد تخسي فيه ويخلص، ونرجع نلف تاني، لكن ده أسلوب حياة. يعني هنبسط الأمور، هنبدأ واحدة واحدة، طبعًا أنا مش خبيرة تغذية، لكن هقولك على النصايح العامة اللي أولها إنك لازم تتابعي مع دكتور أو خبير تغذية، لأن طبائع الجسم مختلفة، واللي نفع معاكي مش لازم ينفع معايا.

7 حاجات مش بيعملهم تعليم الرياضة

1. أولها إن جسمك مش هيعضل

مش هنبقى شبه لاعبات المصارعة الحرة، لكن عضلاتك هتقوى، فمش هتحتاجي البواب ولا شيال المحطة يشيلولك الأكياس والشنط، لأنك هتقدري تكفي نفسك وتخدمي نفسك.

2. ممارسة الرياضة مش هتقطع نفَسَك

آينعم هتتعبي شوية وقت التمرين، وده مش طول الوقت، لأن فيه تمارين للعضلات وتمارين للنَفَس، لكن هتروحي قادرة تتنفسي بشكل أحسن وتلعبي مع ولادك من غير ما تنهجي، وتطلعي السلم وتربطي الكوتشي وتنامي وتمارسي الحياة كلها وإنتي قادرة تاخدي نفَسك.

3. الناس اللي بتلعب رياضة بتمشي على الحيط

وده بيديكي إحساس إن كل التمارين صعبة وإنتي مش هتقدري تعمليها، ودي مش الحقيقة، الحقيقة إن التمارين بتتدربي عليها واحدة واحدة، وإنك عشان تنطي الحبل أو تعملي ضغط أو حتى تشيلي حديد، ده مش بييجي من أول مرة، لكن مع الاستمرار في التمرين، وإن أي تمرين مش مستحيل إنك تعمليه، مهما كان وزنك، لأن فيه ناس رفيعة وجسمها حلو، ومعندهاش ليونة.

4. ممارسة الرياضة مش هم وروتين

بالعكس، الرياضة أنقذتني أوقات كتير من يأس وإحباط وأفكار الاكتئاب والقلق المزمن، لأنها بتخليكي تهدي وتفكري بشكل أحسن، ولأنك هتحبيها هتملي وقتك الفاضي بيها، مش بعلاقات مسيئة.

5. ممارسة الرياضة مش هتحرمك من الأكل

تعليم الرياضة هيساعدك إنك تقللي الدهون وتشربي مية أكتر، عشان تقدري تلعبي بشكل أحسن، ومتتعبيش زيادة في التمرين، وبالتالي الدهون اللي داخلة جسمك هتقل، لأنك إنتي اللي هتقدري تحددي نسبتها.

6. الرياضة مش هتخليكي تزهقي

بالعكس، هتحسي إنك مبسوطة، لأنها بتساعد الجسم إنه يفرز هرمونات السعادة، ده غير طبعًا إحساسك بالإنجاز مع كل جرام أو كيلو بتخسيه، وهتتبسطي لما تبدئي تشوفي شكل جسمك وهو بيتطور وبيتحدد ويظهر، وهتحسي إنك بتعملي حاجة لنفسك ولجمالك إنتي.

7. الرياضة مش هتخليكي مفلسة

فيه أماكن كتير قوي ممكن تلعبي فيها، وبتقدم عروض كويسة، زي النوادي اللي تبع الحكومة مثلاً. أهم حاجة إنك متلعبيش لوحدك أو تروحي الجيم لوحدك. روحي العبي في مكان فيه ناس معاكي تشجعك، حتى لو مش عارفين بعض، أو كلمي ناس مهتمين بممارسة الرياضة واتفقوا تلعبوا في نادي معين، أو ثبتوا أيام معينة وسط الأسبوع وانزلوا اتمشوا بمواعيد ثابتة.

وأخيرًا مفيش وقت اتأخر، ينفع تبدئي دلوقتي. مش مهم الناس تقولك خسيتي، المهم إنك تاخدي نفَسك وتمارسي حياتك بشكل أفضل، لأنك محتاجة لنفسك.

اقرأ أيضًا: أنا أخيرًا رحت الجيم