ملحوظة: بحكم استناد المقال على تجربتي الشخصية فهو مركز بشكل خاص على نموذج الأمهات العاملات من المنزل، لكن طبعا أتمنى إن النصايح دي تكون مفيدة للجميع.
المشاكل الأساسية اللي بتواجهني في الشغل من البيت هي عدم وجود وقت وروتين ثابت للشغل، وبالتالي مفيش مواعيد محددة يتحدد حواليها إيقاع اليوم، بالإضافة لإحساسي الدائم بالتقصير في حق نفسي وفي حق الشغل وفي حق عيلتي، باختصار كنت بحس إني محبطة ومش عارفة أحقق نجاح حقيقي في حاجة لا في شغل ولا في البيت.
المقال ده نتاج للأربع سنين اللي فاتوا ولنقاشات متعددة دارت بيني وبين مجموعة من الصديقات اللي مروا بظروف مشابهة.
1- حددي وقت ومواعيد ثابتة للشغل، حتى لو هتقسميه على مدار اليوم، والزمي نفسك بيه، التحديد ده مش بس هيساعدك إنتي لكن كمان هيساعد أطفالك، الأطفال إحساسهم بالأمان والاستقرار بيزيد لما بيكون فيه روتين ونظام ثابت يسهل التنبؤ بيه. حاولي في الأيام اللي معندكيش فيها شغل يكون فيه وقت ثابت لنفسك للقراية أو المذاكرة أو تأمل السقف، مهم جدًا إن ولادك وأسرتك يتعودوا من صغرهم على احترام الوقت الخاص بيكي.
2- يفضّل تبدئي يومك بإنك تجهزي كأنك رايحة الشغل، لو مش حابة تلبسي لبس خروج البسي لبس مريح، بس غير لبس النوم، سرّحي شعرك كويس ولو بتحبي الماكياج ممكن تحطي ماكياج خفيف؛ الاستعداد الجسدي هيفرق معاكي نفسيًا في الإنتاجية.
3- أحيانًا بيبقى عندي شغل كتير متأخر ومفيش وقت لرقم 2 فبفوّت رقم 2 عادي جدًا وبقوم من النوم أشتغل بسرعة قبل ما بنتي الكبيرة ترجع من المدرسة والصغيرة تصحى. متُحبَطيش لو النظام اللي إنتي مقررة تمشي عليه اختل على أي مستوى، خليكي مرنة ومتسامحة مع نفسك.
4- اتعلمي ترتجلي، مش لازم تمشي على الخطة اللي إنتي حاطاها بحذافيرها، دايمًا فيه خطط بديلة بتوصلنا ﻷهدافنا بأقل قدر من الخساير.
5- العمل من المنزل بيتيحلك خيارات مرنة لقضاء الوقت مع الأطفال، إنتي مش مضطرة تقفلي الباب عليكي، ممكن تشتغلي وهمّ موجودين معاكي في نفس المكان، خصوصًا المهام اللي مش محتاجة منك تركيز كتير، وتسيبي المهام اللي محتاجة تركيز لوقت نومهم أو وجودهم في المدرسة.
6- الخيار التاني إنك تحطي حدود صارمة لوقت شغلك ميقاطعهاش الأطفال ويتعلموا إن في وقت شغل ماما مش مسموح يقاطعوها، بس في المقابل حطي لنفسك حدود في الوقت اللي بتقضيه معاهم، مفيش مكالمات ولا إيميلات شغل، مفيش دعبسة على النت ولا موبايل ياخدك منهم، وقتهم ليهم همّ وبس.
7- جهّزي نفسك لأن فيه مهام مينفعش تتأجل وممكن تتقاطع مع وقت الشغل، واتعلمي إزاي تقومي بمهام متعددة في نفس الوقت (على سبيل المثال أنا بكتب المقال ده وأنا برضَّع).
8- الجداول وقوائم المهام صديقتك الصدوقة، مشكلتي الكبيرة مع النصيحة دي كانت إني دايمًا أعمل جداول وأنساها، فبقيت أعلقها في مكان ظاهر، على التلاجة أو مراية الحمام أو قدام المكتب أو ريمايندر على الموبايل أو أبعته لنفسي على الميل، خلي جداول تنطلك من كل حتة عشان متنسيش.
9- خلي قوائم المهام والجداول منطقية وبسّطيها لأقصى حد، وخليها محددة ومتفصّلة لنقط صغيرة،عشان تحسي بالإنجاز.
10- خلي البيت دايمًا منظم، البيت المنظم أسهل في تنظيفه والعناية بيه وبيحتاج مجهود أقل، والبيئة المنظمة عمومًا بتساعد على زيادة الإنتاجية.
11- اعرفي أولوياتك وادّيها الجزء الأكبر من وقتك واهتمامك، نظّمي حياتك وقللي قدر الإمكان من الحاجات اللي بتضيع وقتك وتشغلك عن أولوياتك.
12- متجريش ورا فكرة المثالية، وخلي توقعاتك واقعية عشان متحبطيش، حبي نفسك وكافئيها واحتفلي بانتصاراتك الصغيرة.
