بقلم/ غدير أحمد
كل شهر زي دلوقتي ببقى مقريفة، ومخنوقة، وعفاريت الدنيا قدامي بتطلع لسانها وتتنطط.
من غير سبب ومن غير ما حد يدوسلي على طرف، مش طايقة حد، حتى نفسي.
عندي رغبة في العياط والنهنهة وميل شديد للخناق والزعل.
لحظة ما بحس إن المود ده ملوش سبب ولحظة ما ببدأ أحس بوخز في أسفل بطني بقول أهلًا.. نورتي.
وبعد أول كام يوم من دورتي الشهرية بيبدأ مزاجي يرجع طبيعي.
الفكرة إني كل شهر بقول هرتّب نفسي وأتحدى هرموناتي ومتضايقش من غير سبب.
لقيتني بضغط على أعصابي أكتر وبتعصب أكتر.
بس هي أنصح مني برضو، أنا فجأة بحس إني جوة المود ده ومبلحقش أعمل احتياطي إني مدخلوش.
وبيبقى الحل إني أستنى شوية لحد ما مزاجي يتعدل لوحده، خاصة إني مبحبش الشيكولاتة.
بس أنا بقى لقيت حل سحري حلو.
أنا قسمت الشهر 3 أجزاء، كل جزء 10 أيام.
أول جزء بيكون عادي وبكون طبيعية ودرجة استجابتي للأمور طبيعية ومفيهاش مبالغة.
تاني جزء وهو مزاج ما بعد الدورة الشهرية، والميل العاطفي لأي فيلم رومانسي أو أغنية حلوة. مزاجي بيكون رايق وببقى هادية ومبسوطة ومرتاحة.
تالت جزء وهو الأهم، هو مزاج ما قبل الدورة الشهرية، وده بيكون قبل نزولها بـ10 أيام على الأكثر.
وده بيستمر قبلها ونص مدة نزولها تقريبًا.
أنا بعد تقسيمة الشهر بقيت أعرف امتى هبقى عادية، وامتى هتزيد حساسيتي وعاطفيتي، وامتى هيكون مودي وحش فببعد قدر الإمكان عن كل حاجة تضايقني وتضغط أعصابي زيادة.
لقيتني ببقى متفهّمة مشاعري وهي حساسة، ومبحسش إن عينيا كلها قلوب.
وبتفهم مشاعري وهي عادية، لا مزقططة ولا متضايقة، وعفاريتي بتلعب معايا ملك وكتابة.
وبتفهمها وهي متضايقة وعايزة مساحة تكون فيها حُرة، وبشر يقدّروا إحساسها في الوقت ده.
—
أكتر حاجة بتحتاجها البنت في الفترة دي هي الهدوء.
حاولي تبعدي عن كل مصادر الإزعاج والعصبية، وحاولي تفكري في حاجات بتخليكي مرتاحة شوية.
قرّبي من ناس بتتفهمّك في لحظاتك دي وابعدي عن الأشخاص اللي مش فاهمين أوي.
انزلي شغلك ودراستك وإنتي عارفة إن مزاجك وحش، بس محدش له ذنب يزعل على زعلك.
وخليكي عارفة إن دي طبيعة جسمك، وهرموناتك وتقلباتك المزاجية جزء منك.
افهميه وادّيله مساحته في حياتك، مش هنقدر نخلي مزاجنا وحش، بس نقدر نفهم إن ده وقت المزاج الوحش،
وساعتها حاجات كتير هتختلف.نون
