لما بندوّر على الدفء بنلجأ دايمًا للناس اللي بنحبها عشان نترمي في حضنهم ونحس بأمان. وفي علاقتنا الاجتماعية دايمًا بندوّر على الأرواح الطيبة ونبعد عن الشريرة.. ولو مرة تعثّرنا في طريقنا بروح شريرة بنخاف وبنقلل احتكاكنا بالناس، خوفًا من إننا نقابل أرواح شريرة تاني. لما بقول كلمة روح طيبة مش قصدي بيها شخص مثالي قد ما أقصد بيها حد شبهي وقريب مني. ولما بتكلم عن روح شريرة مش قصدي بيها خالص شيطان أو عفريت.. لا أنا أقصد بيها حد مختلف عني بس بدرجة كبيرة.. هحكي قصة:
في مرة اتعرفت على سحابة كان شكلها حلو أوي ومختلف، كانت مغرية بدرجة كبيرة، وبالصدفة عرضت عليّ أطلع معاها رحلة لفوق وبدون مقابل كمان. طلعت معاها وقضيت معاها وقت لطيف جدًا وحبيتها أوي.. حبيتها بجد. بس هي كانت بدأت تزهق وتتعب وحست إنها شايلة حمل، لأنها متعودة تكون لوحدها، فقررت إنها تسيبني، ولما طلبت منها تخليني معاها على طول لأني بحبها رفضت وسابتني فعلاً من غير ما حتى تنزلني على الأرض.. فوقعت واتكسرت مية حتة وما زلت بتعافى.
أي حد طبيعي هيقول إن دي سحابة شريرة.. بس بما إني أعرفها كويس فأنا ممكن أقولكم إنها مش شريرة خالص، وإنها طيبة جدًا بس للأسف هي مختلفة. هي فوق وأنا تحت، هي اتعودت تكون لوحدها وتتحرك بحرية وأنا قيّدتها. باختصار كان لازم أفهم طبعها من الأول، خصوصًا إن كل خصائصها كسحابة واضحة ومفهومة. عشان كده مش لازم نكون متطلبين في علاقتنا بالناس ونفهم خلفياتهم ومرجعياتهم قبل ما نطالبهم بحاجة مستحيلة.
مرة صديق قالي إن العلاقة بين أي اتنين تشبه علاقة القفل بالمفتاح، ومش معنى إن معايا مفتاح نوعيته جيدة يبقى أنا هقدر أفتح أي قفل.. فعليًا أنا مش هقدر أفتح غير قفل واحد بس. يعني لازم يكون المفتاح مناسب لقلب القفل، بغض النظر عن مدى جودته. التوافق هو الأساس في أي علاقة ناجحة.
فيه مقولة لجيفارا بتقول “لا تعشقي يساريًا؛ سينساكِ ويفكر بالعمال والكادحين.. سيحدثك في ليالي الرومانسية عن الثورة والأرض والخبز والسلام”. يعني لو فكرتي تحبي الثوري لازم تشاركيه اهتمامه، وتنسي بقى حوار الخروجات والفسح ومتنكديش عليه عشان ترفّهي عن نفسك.. ده مش معناه إنه مش بيحبك، بالعكس، هو بيحبك فعايز يصلحلك الوطن اللي هتعيشي فيه إنتي وولادك.
ولو طلبتي منه كل شوية يعبرلك عن مشاعره يبقى إنتي بتجهديه وبتجهدي نفسك. قبل ما نحكم على الأرواح ونضيّع وقت في الزعل والغضب والحزن، ونفقد الثقة في أرواح ملهاش ذنب.. محتاجين نرجع خطوة ونتعرف على الناس من جوة.. عشان منتعبش.
