طبعًا العنوان ادانا كلنا الأمل، عشان نفسنا منحسش باللي بيحصل اليومين دول في مصر من جنون في الأسعار. كلنا نتمنى تكون فيه طريقة سحرية وسريعة تنسينا اللي بيحصل وتوقف مخنا من التفكير في اللي جاي. أصل الواحد مش بيدخل مكان فيه بني آدمين مؤخرًا غير وبيسمع حوار حزين مؤلم له علاقة بالأسعار.
في وسط كل ده بنلاقي مفهوم الاستمتاع بقى رفاهية، وبطريقة تلقائية بنلغيه ونجنبه قدام إلحاح الأساسيات والمطالب اليومية، بس لأن استمتاعنا بالحياة ميقلش أهمية عن الحياة نفسها مهما كانت صعبة، يبقى مهم ندوّر على طرق بيها ننبسط بأقل تكلفة، ودول 10 أفكار تساعدنا نعيش الـFun ونقضي مناسباتنا المختلفة بأقل التكاليف:
1- خروجة في البيت: بما إن الخروجات اليومين دول بقت مكلفة جدًا يبقى لازم نتجه لاستغلال بيوتنا كأماكن نستمتع فيها. ينفع أتفق أنا وأصحابي إن الشهر ده كل أسبوع هيكون بيت حد فينا هو مكان الخروج، أما الأكل فيتقسم تكلفته علينا، ويكون بسيط، زي جبن ولانشون وعيش، أو سندوتشات سوسيس وبطاطس محمرة نعملها سوا، أما الوقت فممكن نقضيه نلعب كوتشينة أو rummikub أو phase 10، وممكن مرة نجيب أدوات كروشيه ونبتدي نتعلم سوا من على اليوتيوب. بكده اتقابلنا وقعدنا براحتنا في جو صحي مش غالي ومليان دوشة ودخان.
2- سهرة سينمائية (Movie night): السينما من أمتع الخروجات، لكنها للأسف بقت مكلفة جدًا. لكن في نفس الوقت تطور التليفزيونات بقى في صالحنا، لأن دلوقتي نقدر نبقى قاعدين في البيت ونتفرج على الفيلم بنفس المستوى بتاع السينما أو بنسبة كبيرة قريب منه.
ممكن مرة أنا ومجموعة أصحاب نختار بيت حد التليفزيون بتاعه فيه خاصية الـ3D، ونختار فيلم مميز زي مثلاً “Inside Out” ونلبس نضاراتنا ونعمل فشار ملح وكاراميل، وتبقى ولا أجدعها سينما.
تعرفي على: اجمل هدايا للأم بمناسبة الولادة
3- يوم بيتوتي ممتع للأطفال: لو مش سهل دايمًا نخرَّج الأولاد ينفع يستمتعوا في البيت. ممكن نجيب فُرش وألوان ونفرش مشمع على الأرض ونلبس كلنا هدوم قديمة، ونبدع أحلى لوح فنية. كمان باللبس اللي مش محتاجينه ومقص وإبرة وفتلة ممكن نعمل شنط وحاجات كتير موجودة على النت. ممكن نعمل بالشرابات القديمة شخصيات صغيرة ونمثل بيها مسرح عرايس، وأفكار تانية كتير.
4- عيد ميلاد الأولاد: على قد ما عيد الميلاد برة البيت بيريح من الاستضافة والدوشة في البيت، إلا إن البيت ممتع للأولاد أكتر وكمان أوفر. وعشان تستمتعي مع ولادك مهم تختاري أقرب الناس لابنك من غير دوشة كبيرة على الفاضي، والأكل والزينة تبقى حاجة بسيطة، والأهم مساحة آمنة يلعبوا فيها الأولاد.
5- عيد الجواز- عيد الحب: في عيد الجواز وعيد الحب مش بنحتاج هدايا غالية قد ما بنحتاج وقت مميز وخاص نقضيه مع بعض. مهم في يوم زي ده أعمل مجهود في إن العيال تكون لوقت محدد عند جدو وتيتة أو حد من قرايبنا، وإن إحنا الاتنين مننشغلش بشغل أو مشاوير أو موبايل أو غيره، لكن نبقى بنقضي الوقت كله سوا سواء في خروجة أو في مكان جديد أو نقعد في البيت، المهم أولوياتنا تكون لعلاقتنا عشان ده عيدها.
6- عيد الأم: كتير بنشيل هم هدايا عيد الأم، خصوصًا لو ولادنا في مدارس، وبنحتاج نهادي مدرسات أولادنا، بنحسه حمل تقيل مكلف. عن تجربة ممكن نعمل بالخرز في البيت عقد أو حلق بسيط، ممكن بالورق نعمل أشكال للديكور، تكلفة الهدية دي بتكون مش عالية وفي نفس الوقت الولاد بيستمتعوا وهما بيعملوا الهدايا بإيديهم.
7- وقت الأعياد: دايمًا اللي شاغل الأطفال وساعات الكبار هو فكرة لبس العيد، اللي هي حاجة لطيفة ومبهجة. ينفع نركز مع ولادنا على متعة إنهم يدوا في الوقت ده زي ما بياخدوا، فنكون بنختار معاهم من لبسهم اللي يحبوا يهدوه لطفل مش هيقدر يجيب لبس العيد، ونغسله ونكويه ونغلفه معاهم، فيكون هدية جميلة لحد تاني. في نفس الوقت نكون إحنا قدوة ليهم في إن لبس العيد ده تعبير عن الفرحة مش واجب في حد ذاته، يعني ممكن أجيب قطعة واحدة جديدة مش لازم طقم كامل.
8- زيارة مريض: لما بنزور مريض بنفكر كتير ممكن نجيبله إيه، وبنلاقي نفسنا بنكرر اللي معظم الناس بتعمله، فبنجيب ورد أو شوكولاتة، ودي حاجات في الآخر بتترمي من كترها وقلة أهميتها. الأفضل نسأل هو محتاج إيه، ولو صعب نقدر نعمل حاجة عملية، نشتري كرتونة عصير وعلبة بسكويت تكون مفيدة في التقديم للضيوف. أما لو حد قريب ممكن نستنى لما يتحسن ونسأله هو يحب يجيله إيه. في الآخر وجودنا بجد جنب المتألم أهم بمراحل من اللي بنجيبه.
9- زيارة عرسان أو سبوع مولود جديد: طبعًا أهم حاجة نسأل لو فيه حاجة يحتاجوها، ولو لأ يبقى ممكن نديهم فلوس يشتروا اللي يحتاجوه، أو نتجمع كمجموعة ونجيب هدية غالية شوية، المهم بلاش طقم الكوبايات أو اللعبة الفرو اللي دايمًا بنجيبهم على آخر لحظة كنوع من سد الخانة.
10- تجديد ديكور البيت: أول حاجة واللي محتاجة بس حبة صحة هي تغيير نظام العفش، بيفرق في النفسية وبيحسسك إنك في مكان جديد. كمان ممكن تقرري تبيضي أوضة أو حتى بيتك كله بنفسك، الموضوع محتاج شوية تحضير ودراسة، لكنه مش مستحيل، بالعكس، ده إنتي هتلاقي جواكي قدرات عمرك ما عرفتي إنها فيكي.
تقدري برضو تتابعي صفحات الأثاث المستعمل وتختاري القطع اللي تناسب ذوقك وحالتها كويسة، وممكن تدوري على النت على طرق تطوير الموبيليا وإعادة استخدامها، فبدل ما تستغني عن قطعة عندك تقدري تطوريها وتجدديها.
