عزة
تم نشرة في 09/15/2013
وقت القراءة : 1 دقيقة
“كلميني عن نفسك”.. جملة في ظاهرها ساذجة ونمطية وملهاش أي تلاتين لازمة، جملة ممكن تتقالك من أي حد عارفك من فترة قريبة وبيحاول يتقرب منك، وطبعا بيبقى الرد تقيل وعمرك ما هتلاقي إجابة شافية وتكون حقيقية أوي يعني، لكن كتير أوي الكلمة دي بتتقال علشان فعلا البني آدم اللي بيحاول يعرفك ده اتجه للسؤال المباشر كدة علشان مش قادر يوصل للزتونة لوحده، ف لجأ لطلب الشرح والتفسير، لأن مفيش أي دلالات على الشخصية اللي قدامه، ولا أي إشارة.
شيء صعب جدا إنك تحاول تفسري نفسك بالكلام وتشرحيها. بس إنتي اللي بتدفعي الناس للطلب ده! فلما أقولك كلميني عن نفسك ده مش سؤال يترد عليه بأي كلمتين فارغين كل الناس بترد بيهم، كلميني عن نفسك عشان إنتي مش واضحة، مفيش أي حتة شفافة أنفد منها لجواكي وأعرفك بسهولة.
عشان كدة مهم تسهّلي على اللي قدامك مهمة معرفتك ومتخليهوش مضطر للسؤال النمطي ده اللي عمرك ما هتلاقيله رد شافي، جاوبي السؤال من قبل ما يتسأل، ومن غير ما تتكلمي وتقولي أي رد كمان، جاوبي السؤال بشكلك، بمظهرك، بـ”تون” صوتك، بالمزيكا اللي بتسمعيها.
إنتي جميلة بطريقتك، إنتي بجد مفيش منك اتنين، ربنا مخلقش أصلا اتنين زي بعض، بيّني ده بقى بالطاقة اللي بتشعّيها. متبقيش غامضة، خليني أما أشوفك أعرفك من هيئتك ولفتاتك وكلماتك، نوري جمال شخصيتك.
يعني مثلا عمرك شفتي واحدة فرحانة تبقى لابسة كحلي ف بني وشبشب بصباع وقاعدة تسمع ظلموه؟ أكيد لأ، عشان فرحتها بتبان عليها، هتلبس بمبي وتسمع سيرة الحب.
بالظبط كدة، ملامح شخصيتك زي المود اللي بتعيشيه بتبان خطوطها العريضة م المظهر والتفاصيل الصغننة اللي بتعمليها.
خلي بقى كل حاجة بتعمليها وكل لفتة وكل مظهر بيعبّر عنك، الأغنية اللي بتسمعيها.. ألوانك.. برفانك.. يعني مثلا مش هتلبسي أسود ولا كحلي وإنتي تكوني رايحة فرح ومبسوطة ومنشكحة.. البسي بمبي.
لما اتقال زمان تكلم حتى أراك، كان مقصود بيها تكلم وريني بتناقش القضايا إزاي ومهتم بإيه وبتبص للأمور من أنهي زاوية، مش تكلم عن نفسك!
خليني استغنى عن السؤال الوجودي وأبطّل أقولك “كلميني عن نفسك”.
