كاميليا
اليوم شبه الدوامة. مفيش وقت لأي حاجة والأيام كلها شبه بعض.
لأ مش بتكلم عن يومي ولا عن روتين الطبخ والغسيل والديدلاينات اللي بتجري ورايا.
أنا بتكلم عن يوم عيالنا الصغيرين اللي مطلوب منهم يصحوا 7 الصبح يفطروا ويجروا على باص المدرسة، ولو المدرسة بعيدة شوية ممكن يصحوا من 6. عشان يرجعوا 3 أو 4 يتغدوا بسرعة ويغيروا ويجروا على التمرين. وممكن يقعدوا يحلوا الواجب في النادي عشان مفيش وقت في البيت، وبعد التمرين ممكن يكون فيه كورس يوسي ماث أو كورس لغة أو دروس خصوصية. يروحوا البيت مهدودين يا دوب يذاكروا شوية أو يتنحوا قدام التليفزيون ساعة ويناموا على نفسهم وهما قاعدين.
وطبعًا لازم يتفوقوا في الرياضة ويحققوا فيها إنجاز، مش مجرد إنهم يبنوا جسمهم ولياقة وكده، لازم يحققوا إنجاز. ولازم يبقوا شاطرين في المدارس ويجيبوا درجات نهائية. ولازم يبقوا مؤدبين جدًا والبنات شعرها متسرح ومفرود.
وفي الوقت ده إحنا يا أمهات بنطلع وننزل ونتنطط عشان ننجح معاهم في كل المهام دي، وفي نفس الوقت إحنا لازم نبقى على سنجة عشرة والبيت نضيف ومترتب وناجحين في شغلنا ومحققين ذاتنا وإنجازاتنا وأهراماتنا.
إيه النقطة اللي اتحولت فيها كل حاجة كنا بنحاول نعملها لولادنا عشان نبسطهم ونساعدهم لضغط عليهم وعلينا؟ إمتى بقى اللعب الحر تضييع وقت؟ إمتى ولادنا عيونهم بقت مطفية رغم إن يومهم فيه 100 حاجة بتشغله؟
ليه منحاولش نعمل حاجات بسيطة تفصلهم من الدوامة دي شوية وترجعلهم الشغف بحاجات مختلفة؟
دي قايمة حاجات، منهم اللي جربته مع بنتي ومنهم اللي لسة مستني، مش كل النشاطات عجبتها. فيه حاجات حست إنها مملة أوي رغم إنها كانت ممتعة جدًا ﻷطفال تانيين بس كل طفل له طبيعة مختلفة.
1- ازرعوا سوا:
النتيجة مش هتظهر في نفس اليوم، هتحتاج أيام.
ابدؤا ببذور سريعة الإنبات زي الحلبة والفول، انقعيها يوم في المية وبعدين حطيها في علبة بلاستيك على منديل مبلول، واتأكدي إنك تبليه يوميًا. يومين تلاتة وهتبدأ تنبت. وممكن تستغلي الفرصة عشان تتكلموا عن النباتات وأجزائها وهما شايفينها قدام عينيهم، ده أحسن من دروس العلوم اللي في الكتب.
لو أطفالك كبار شوية وممكن يصبروا أسبوعين تلاتة ممكن تشتري من العطار أو المشتل بذور جرجير أو ملوخية أو فجل وتزرعيهم في إناء فيه تربة، ويساعدوكي في ريّه ومراقبته. هياخد فترة عشان ينبت بس بعد 40 يوم تقريبًا ممكن تقطفوه وتاكلوه.
2- اخبزوا:
الخبز عظيم وبيخرج الضغوط، وممتع جدًا للأطفال.
لو شايلة هم اللغوصة والدقيق اللي هيطير افرشي ورق جرايد على سطح العمل وتحت رجليكم على الأرض واتفقوا إنهم يساعدوكي في التنضيف بعد ما يخلصوا.
لو في سن تعلم القراءة دوروا على وصفة جديدة أون لاين، وخليهم يساعدوكي في قراية المكونات والطريقة (هيتعلموا مفردات جديدة).
ملحوظة: لو أطفالك ملولين متختاريش وصفة بتاخد ساعتين عشان تخمر مثلاً. اختاري وصفة سريعة ومنجزة قدر الإمكان.
3- مثلوا مسرحية:
قريب أنا وبنتي ارتجلنا مسرحية، هي لفت على وسطها إيشاربات ملونة ولعبت دور الأميرة وأختها الصغيرة مسكت مغرفة المطبخ وعملت دور الساحر الشرير.
مكانش فيه أي سياق درامي بس فصلنا وقعدنا نتنطط ونرقص ونجري ورا بعض.
4- روحوا متحف:
وأنا صغيرة كنت كل يوم جمعة بروح مع ماما متحف أو جنينة، مكانش المول والأماكن المقفولة هي اختياراتنا للفسحة. مصر مليانة متاحف متنوعة. حتى لو إنتي شايفة إن المتاحف مملة، جربي يمكن أطفالك يكون رأيهم مختلف.
5- اعملوا حفلة:
البسوا هدوم حلوة وملونة. لو بنات لبسيهم الفستان اللي بيلمع اللي مش بتطلعيه من الدولاب غير في المناسبات، وشغلوا موسيقى وارقصوا.
6- ابنوا خيمة:
بالملاية والمخدات وسيبي خيالهم يكمل اللعبة.
7- البازل:
البازل ممتع جدًا، فيه بازل صغير ولطيف في محلات 2 ونص (أو اللي كانت 2 ونص). وفيه بازل كبير بيبقى 100 قطعة أو أكتر ممكن العيلة كلها تشارك فيه.
8- حفلة تنكرية:
سيبي لخيالهم الحرية وسيبيلهم الدولاب يلبسوا هدومهم بالطريقة اللي تعجبهم ويتنكروا في الشخصية اللي يحبوها. وصوريهم وخلي الصور عندك هتبقى ذكرى لطيفة جدًا.
7- السينما في البيت:
اعملي حلة فشار كبيييييييرة، وطفوا النور وشغلوا فيلم لطيف واقعدوا شوفوه مع بعض.
8- مسرحية الشرابات:
أغلبنا بيعاني من وجود (جنية الشرابات) في الغسالة، ودي ظاهرة محيرة جدًا، بتحطي جوز شرابات في الغسالة بتطلعلك فردة واحدة.. استغلي فرد الشرابات اليتيمة وارسمولها عيون وبق ومناخير والبسوها في إيديكم واعملوا مسرحية.
9- روحوا جنينة وجمعوا ورق الشجر والزلط الملون:
متقوليلهمش متمسكوش الحاجات دي بإيديكم، ولا متجبيوش الزبالة دي في البيت. خليهم يعملوا لوحة بأوراق الشجر والزلط الملون.
10- ارسموا قصة:
اختاروا قصة مش مرسومة تخيلوا شخصياتها وارسموها.
11- ألعاب زمان:
العبوا كوتشينة أو بنك الحظ أو السلم والتعبان أو دومينو. العبوا الشايب وسيبيهم يحكموا عليكي.
12- انزلوا اركبوا عجل سوا:
أو أجَّروا عجل لو معندكمش عجلة.
ومتنسيش تتبسطي، وتشاركيهم في كل لحظة حلوة، خليهم يكبروا ومعاهم ذكريات جميلة يرجعولها وقت ما يحتاجوا.
