هبه
في الوقت الحاضر شنطة السكاكين بقت من أهم قطع جهاز كل عروسة، ولما بنفتح الشنطة بنلاقي سكاكين كتير أشكال وأنواع.. اللي نصلها (الجزء المعدن) قصير واللي نصلها طويل. والحادة والمشرشرة. وفي أوقات كتير بنحتار وبنبقى مش عارفين استخدام كل واحدة فيهم إيه.
النهارده هنتكلم عن شروط السكين الجيد والاستخدام الأمثل لكل سكين.
شروط السكين الجيد:
أولاً: يكون ستانلس ستيل من نوع كويس، لأنه لو حديد أو فيه أجزاء حديد هيصدي بسهولة، والصدأ ممكن ينزل في الأكل ويسبب لنا أضرار صحية.
ثانيًا: تكون جهة التقطيع رفيعة جدًا وحادة جدًا ولامعة، فكلما قلّت حدة السكين تطلب مجهود أكبر في استخدامه.
ثالثًا: يكون نصل السكين بطول السكين كاملاً وأن تكون اليد مركبة فوقه.
دي شروط عامة من المفروض إنها تكون موجودة في كل السكاكين بشكل عام.
تعرفي على: استخدامات الميكرويف: 14 شيء لا توضع في الميكرويف
الاستخدام الأمثل لكل سكين:
لازم نعرف إن كل سكين اتصنعت خصيصًا علشان تقوم بوظيفة معينة، وإنها لو قامت بغير وظيفتها كفاءتها بتقل وكمان بتقطع بشكل غلط.
ودلوقتي هانستعرض أهم أنواع السكاكين والاستخدام الأمثل لكل نوع.
سكين التقشير:
سكين بيكون نصلها متوسط الطول وعرضه متوسط برضو، وبتستخدم في تقشير وتقطيع الخضر والفواكه.
سكين الستيك:
سكين بيكون نصلها طويل وعرضها وسمكها قليل، ودي بتستخدم في تقطيع اللحم لقطع الستيك الرقيقة لأنها سهلة الانزلاق ما بين ألياف اللحم.
تعرفي على: قطعيات اللحوم واستخداماتها
سكين متعددة الاستخدامات:
ودي أكتر السكاكين توفرًا في السوق، وفي الوقت نفسه أقلهم كفاءة، وأنا مش بنصح بيها خالص.
الساطور:
الساطور بيكون عادة مربع أو مستطيل، ووزنه تقيل، وحدّه عريض جدًا، وبيستخدم في تقطيع العضم، ولازم نحترس عند استخدامه لأنه بيسبب إصابات بسهولة للشخض غير المدرب على استخدامه.
سكين نزع العظم:
سكين بيكون حدّها عريض، ونصلها مدبب وحاد جدًا، ومناسب للدخول ما بين ألياف اللحم والعظم علشان تفصلهم من بعض.
سكين لقطع اللحم السميك:
سكين بتكون طويلة ونصلها عريض ومدبب، ومناسبة لتحمل كتل كبيرة من اللحم والفصل بينهم بكفاءة.
سكين الشيف:
ودي السكينة بتاعت كله زي ما بيقولوا. من الممكن استخدامها بدل كل أنواع السكاكين لكنها محتاجة شخص محترف يجيد اكتشاف كل قدراتها.
سكين لتقطيع الخبز:
سكين نصلها طويل جدًا وحدّها مشرشر علشان تقطع الخبز بدون ما يتفتت. مناسبة كمان لتقطيع الخضراوات الورقية زي الخس والسبانخ، وكمان الخضراوات اللي ليها جلد سميك زي الطماطم.
سكين الفيليه:
سكين طويلة ونصلها رفيع جدًا ومدبب، ودي مناسبة لتقطيع شرائح الفيليه، زي فيليه الدجاج والبفتيك، كمان بتستخدم لصنع الشرائح الرقيقة من كتل اللحم الكبيرة الناضجة، زي عرق الفلتّو أو صدر الرومي المشوي.
ولو راعينا الاستخدام اللي كل سكينة اتعملت علشانه هنحصل على أفضل نتيجة في التقطيع، واللي هتنعكس بشكل مباشر على جودة الأكل بتاعنا، وكمان هنحافظ على السكينة وهتعيش لفترة أطول معانا.
