رزان
لما بنروح آيكيا وبنلاقي حاجاتها متوضبة جدًا وشيك، بنحب إننا نشتري من عندها. لكن بعد الظروف الاقتصادية الأخيرة، أثاث آيكيا بقى أغلى من متناول الإيد.. لكن محدش يغلبنا.
اتعودنا في كل الأوض تقريبًا إن يبقى فيه دولاب وحدة مقفولة من الخشب، من فوقيه لتحتيه، وأدراج بقى وأبواب جرّارة وكميات خشب عملاقة، وآلافات لازم تتدفع عشان الدهان والخشب يبقى من نوع متين، عشان محدش يقول حاجة. لكن فيه اتجاه حاليًا نحو: البساطة.
عواميد معدن مثبتين في الحيطة أو نازلين من السقف، بين اتنين منهم عمود بالعرض عشان يتعلق عليه الهدوم اللي محتاجة شماعات، وبين العمودين اللي جنبه رفوف عشان تحطي عليها الهدوم اللي بتتطبق، درجين تحت للشرابات والملابس الخاصة، وحواليه ستارة خفيفة فيها جليتر مثلاً أو نجوم بتلمع، وخلصت. عندك دولاب بأقل من 1000 جنيه.
الشطارة بس إنك تلاقي حدّاد فاهم شغله وممكن يفكّر برة الصندوق. ما تنسيش كمان تجيبي أفرخ اللباد اللي بتتباع في المكتبات (شكرًا لمدرسات الأعمال الفنية) عشان تقصي منها دواير مثلاً تخبي بيها المسامير، عشان الأطفال أو القماش ما يشبكش فيها. فوالا! عندك دولاب شيك جدًا ومبتكر، ومش عند حد غيرك.
2- هي لازم المكتبة تبقى خشب تقيل وأبواب إزاز تحبس الكتب؟
الحقيقة لأ. أنا بحب إن كتبي تتنفس، يعني هي لو جوة أبواب إزاز مقفول عليها هقوم بالليل مخنوقة أفتحلها تتنفس. أيوة أنا مرتبطة بكتبي جدًا أعمل إيه؟!
دلوأتي في آيكيا، وفي غيرها من محلات الأثاث اللي هتلاقيها في ميدان الجامع مثلاً في مصر الجديدة، فيه حوامل معدنية لرفوف بتتركب على الحيطة. اعملي مكتبة من الرفوف.
افتكري كمان إنك لما تعملي الرفوف مكشوفة، تقدري تحطي بين الكتب تحفة صغيرة أو فازة إزاز زرقا من خان الخليلي، أو صورة لقمم الجبال وعليها تلج، شيء مناسب للأجواء الحالية. متخليهاش كتب وخلاص، لأ حطي بين الكتب ووسطها وقدامها حاجات ملونة كتيرة، الحياة محتاجة شوية شخلعة.
نصيحة: بالنسبة للأطفال الحلوين، متحطيش أي كتب في رفوف سفلية خالص. تقريبًا كلهم قبل سن 5 سنين بيتحولوا لقوارض، وبياكلوا الكتب ويقطعوها ويبصولك ببراءة بقى إيييه.. شيء تحتاري معاه تزعلي ع الكتاب النسخة الأصلية ولا تحاولي تفهّمي الطفل/ القارض ده إن الكتب مبتتاكلش.
3- لأن الحياة بحاجة للمزيد من الألوان:
فيه اتجاه تلاقيه عبر كتالوج آيكيا كله، نحو الاحتفاء بالأطباق الخشبية، سواء الملونة أو بلون الخشب العادي. مش هتعجزونا على فكرة!
فيه مكان مستخبي كده، محدش يعرفه قوي، يقع إلى جوار محطة الزهراء على المترو القديم، اسمه “البساتين”. ده بقى إيه، كنز حقيقي: أطباق ملونة ومزخرفة، مشغولات خشبية ويدوية، أباجورات، وكلها ملونة وتفرح القلب. قريت مرة في مقالة إن “عندما يحيط الإنسان نفسه بالأعمال الفنية، يشعر بأنه غني” وحسيت إني مش المجنونة الوحيدة اللي بتفكّر كده. لما أجيب طبق مثلاً مليان رسوم نباتية لونها أزرق، وعدة أطباق خشبية للسلطة والتقديم وكده، أكيد هحس إن الجمال مخلوق لهدف، وإن أكيد الإنسان اتخلق عشان يستمتع بالجمال ده.
4- مين اتريق على الاحتفاظ بالبرطمانات؟!
عادي والله البرطمانات ليها استخدامات كتير، آيكيا نفسها بتحط فيها ورد ملوّن!
الفكرة في البرطمان إنه مش مكلّف، وممكن تستفيدي منه إنك تحطي أفرع زرع بلاستيكي ملوّن، أو طينة وزرعة، كده يعني.
البرطمانات الصغيرة بقى، ممكن تحطي فيها أي شيء ملون: زراير أو بلي أو أعواد القرفة أو حبوب القرنفل. التوابل على فكرة فيها سِحر محدش واخد باله منه، حطيها في برطمانات إزاز شفافة وانبسطي بيها كل ما تدخلي المطبخ.
5- التخزين:
أ- آيكيا فيها أفكار عبقرية للتخزين، زي الصناديق الشفافة البلاستيكية. من ناحية هي بتعرفك الصندوق فيه إيه، ومن ناحية برضو سهلة الغسيل وتستحمل الشيل والحطّ. على فكرة بقى، موجودة في الهايبر ماركت الكبير أو برضو من ميدان الجامع، وبنص التمن تقريبًا.
يعني تحطي جوة الدرج علب صغيرة جدًا ملهاش غطا، عشان تفرق بين كل مجموعة حاجات واللي جنبها، مفيدة في الماكياج أو أدوات المطبخ. لطيفة جدًا خصوصًا للناس اللي بتلاقي نفسها شبه مونيكا جيلر من مسلسل “Friends” اللي بتحب النظام والترتيب. دي سهلة تعمليها عند النجار.
جـ- سِلال التخزين القماشية:
دي برضو عملية جدًا، للعب الأولاد مثلاً أو الغسيل اللي محتاج يتطبق، أو حتى للأطباق والحِلل. سهلة برضو تتعمل عند أي ترزي شاطر، بس افتكري إنك تطلبي منه إن القاعدة تكون بسوستة سهلة الفتح والقفل، عشان تحطي فيها كارتونة كنوع من الصلابة، ولما تيجي تغسليها تشيلي الكارتونة. سهلة مش كده؟
6- عايز الكبيرة بقى؟ تاخد الكبيرة؟ خد عندك:
أقل خشب مطبخ دلوقتي بكذا ألف، ده غير صيانته وفكه وتركيبه وحمايته من الحشرات الزاحفة… إلخ. هو آه شيك، لكن مين قال إن الشياكة مقتصرة على الدواليب؟
في آيكيا رفوف من السلك أو المعدن غير القابل للصدأ، عليها كل حاجة: الحِلل والأطباق والكوبايات ورفوف التوابل… إلخ. كل حاجة باينة كده؟! آه الحقيقة، معندناش حاجة نخبيها.
الفكرة في حاجتين:
1- استغلال الحوائط، عشان لو المطبخ صغير ميساعش كل ده، يبقى الحيطان تشيل.
2- متكلفيش نفسك في دواليب تعيش معاكي حتى بعد ما تزهقي منها ومتقدريش تغيريها عشان مدفوع فيها.
بس كده.. كل اللي محتاجاه تصميم يناسب مطبخك، وتشتري الحوامل المعدن والرفوف المعدن، وهوب عندك مطبخ شيك ومبتكر ومش مكلّف جدًا.
ملحوظات ع الماشي:
– متنسيش تضيفي الزرع في كل الأماكن المتاحة. زرع ضل أو حقيقي أو صناعي، هاتي لون أخضر وألوان كتيرة بتحبيها، حطي في كل حتة.
– انزلي بنفسك واتفرجي. فيه أفكار جديدة كل يوم، يعني مثلاً ممكن باتنين متر قماش ملوّن وخفيف، تجددي أباجورة كانت عندك، أو فرع نور تحطيه ع الحيطة، كده يعني.
– مخدات الفايبر الصغيرة (الخداديات) مريحة جدًا ولطيفة، انزلي برضو ميدان الجامع واطلبيهم يتعملوا، أنا عملت 2 بالأكياس بتاعتهم بأقل من تمن واحدة من آيكيا.
أهم من ده كله:
إحنا مش بنعمل كده استرخاص أو إننا منستاهلش نشتري الغالي، إحنا بنعمل كده عشان حقنا نعيش في مكان جميل وملوّن ومريح، عشان إحنا نستاهل، ومش شرط نجيب أغلى حاجة عشان ننبسط. ممكن بالفلوس اللي وفرناها نجيب إكسسوارات جديدة مثلاً أو هدوم حلوة للأولاد.
هاتي خامة حلوة وتعيش، وفي نفس الوقت مش تقيلة على الجيب. الستات دايمًا تقدر، أيوة على فكرة!
