مفتتح
طلعت العجينة عشان تفك وأعمل البيتزا، حلو، نكتب المقال بقى.
متن
أنا اتجوزت، ألف مبروك، الله يبارك فيكو.. أنا بطبخ، ألفين مبروك، الله يبارك فيكو برضو، بس الموضوع ده مش بالساهل كده.
أنا اتربيت مع أم مدلّعة عيالها جدًا، حرفيًا أنا كنت مبعملش حاجة في حياتي غير إني بشتغل وبرجع البيت أبتدي وصلة الأنتخة لحد تاني يوم شغل، كان ناقص ماما تغسلي إيدي في السرير، كنت بعرف أطبخ زمان، لما ماما كانت بتشتغل كانت بتخليني أعمل الرز أو أحمّر بطاطس وساعات كنت بعمل الأكل كله أيام أجازات المدرسة، بس مش كتير بصراحة، شويت فراخ وعملت صواني بطاطس وعملت محشي، ده كان أيام زمان، لما كبرت واشتغلت علاقتي بالمطبخ انحصرت في إنه المكان اللي بعدّي عليه وانا داخلة الحمام.
مداخلة
في رواية “الحب في زمن الكوليرا” كان دكتور خوفينال أوربينو بيقعد على السفرة ويدوق الأكل ويقول “هذا طعام مصنوع بحب”، ولما الأكل ميعجبوش كان بيقول “هذا طعام مصنوع بلا حب”.
باقي المتن
أنا شخص بيحب الأكل جدًا، وبيعتبره اللذة الوحيدة الحلال في الحياة، والأكل الحلو بيخلي يومي حلو، وانتظار أكلة معينة كان ممكن يخليني أتحمل سخافات كتير أثناء اليوم عشان أوصل للحظة اللي هقعد فيها قدام الطبق اللي فيه أكل حلو يخليني أستمتع.
محمد جوزي -حلوة جوزي دي وجديدة- شخص طلباته بسيطة جدًا في الأكل، ومبيعترضش على الأكل اللي بيتقدمله، وبيحب أبسط الأنواع وأقلّها تكلفة، بس أنا من يوم ما عرفته وأنا بتعامل معاه على إن فايته كتير في الحياة، وإنه لو جرب أنواع معينة من الأكل حياته هتتغير، خاصة إنه شخص سهل الإرضاء جدًا في حوار الأكل ده، فقررت إننا لما نتجوز هطلع كل إبداعاتي المطبخية وأسخّر كل قوايا السحرية عشان أفرحه.
وقت كتابة المقال ده إحنا متجوزين بقالنا أقل من شهر، طبخت فيهم كتير، أنواع تقليدية وأنواع مبتكرة واختراعات ملهاش اسم، آينعم حرقت حلتين ستانلس وبقى جواهم سواد كده مبيطلعش مهما عملت، وصينية بقى جواها طبقة صفرا كده برضو مبتطلعش مهما اتشقلبت، بس بقينا بنقضي وقت حلو أوي ع السفرة، والحاجة الوحيدة اللي صرفت عليها فلوس كتير أيام تجهيزات الجواز كانت الأطباق، عندي أطباق كتير بأشكال وأحجام مختلفة، والحقيقة إني مش ندمانة خالص.
الطبخ حلو.. فكرة إنك تبذل مجهود وتركز في مقادير وتوقيتات عشان تسعد شخص ما فكرة نبيلة جدًا، وفكرة إنك تحوّل شوية روايح ونكهات مختلفة لحاجة واحدة حلوة ومفيدة فكرة عبقرية، الطبخ زي السحر والتعاويذ، بس من غير رجل هدهد يتيم ولا ريشة ديك أصفر.. الطبخ سحر طيب وحاجة بتخليك فخور بنفسك، حتى لو الأكل اللي وقفت في المطبخ ساعتين عشان تعمله هيتاكل في عشر دقايق، ده مش مجهود ضايع إطلاقًا، بالعكس، ده سحر مؤثر جدًا.
محمد -جوزي يا جدعان أخيرًا- جرب يدخل المطبخ، وعمل حاجة ملهاش اسم مكونة من بقايا الفراخ البانيه والجبنة المثلثات وشوية فلفل وطماطم وتوابل، وعملناها سندوشتات وأكلناها كلها لحد آخر لقمة.
الطبخ مش صعب، محتاج شوية ذكاء ومنطقية، خاصة لو إنت شخص بتحب الأكل، هتقدر تميّز إيه هيبقى طعمه حلو لما يتحط على إيه، واللي فاضل ممكن تكمّله بوصفة من ع النت أو بالتليفون من حد شاطر في المطبخ، وأهم حاجة إنك تحط التاتش بتاعك، ده هيفرق كتير في الطعم.
أنا مثلاً بطبخ بإحساسي، يعني لو فيه وصفة محتاجة بصل بودرة أو توم بودرة وأنا معرفش الفرق بين الاتنين بحط شوية من ده وشوية من ده، وأدعي ربنا إن الأكل يطلع حلو، وبيطلع حلو فعلاً، الكاري والكركم معرفش الفرق بينهم، أهي كلها حاجات صفرا، ربنا بيسترها وبتطلع وصفة الرز بالكاري محتاجة الاتنين فحطيت منهم وطلع رائع، الخضار السوتيه معرفش لحد دلوقتي بيتعمل إزاي بس أنا شويته في الطاسة التيفال مع شوية زيت صغيرين جدًا وملح وفلفل وكله طلع تمام، المشروم عبقري بيتحط على حاجات كتير وبيحولها من شيء عادي لشيء راقي جدًا ومتعوب عليه، أهم حاجة السينس، وبالمناسبة دي أحب أوجّه تحية خاصة جدًا لكريمة الطبخ وأقولها قد إيه من عمري قبلك راح.
اديت فرصة لمحمد أيام أجازة الجواز إنه يقف معايا في المطبخ، وقدرنا سوا نعمل محشي جميل، آينعم طلع مهري شوية عشان زوّدنا المية، بس أكلناه كله، وقدرنا سوا نعمل فول عبقري، وجمبري جميل، وأم علي طعمها حلو، واكتشفنا إننا سوا نقدر نخلق جمال جديد، حتى لو وجوده معايا في المطبخ بيتلخص في إنه بيناولني الملح أو يقطع السلطة أو يقلي البطاطس، كنا عارفين إن الأجازات الطويلة مش بتتكرر كتير وكان لازم نستغلها أحسن استغلال.
الطبخ حلو.. الطبخ أحد الأساليب الذكية جدًا للتعبير عن الحب، لما تحسي بحب للناس اللي إنتي عايشة معاهم أو بحب لنفسك أو امتنان للدنيا، سيبي اللي ف إيدك وقومي اعملي أي حاجة تتاكل، هتلاقي طعمها مختلف عن الحاجات اللي بتعمليها وإنتي ملكيش نفس أو مكتئبة، ده حتى ممكن الطبخ يحسّن حالتك المزاجية لما تكتشفي قدراتك السحرية الكبيرة.
أنا مبسوطة إني بطبخ، وأحب أوجّه الشكر لكل أصحابي من الحلل والطاسات والمعالق، وأعتذر عن أي إصابات غير مقصودة لصوابعي العزيزة، وأحب كمان أوعد البوتجاز إني أكيد هنضّفه قريب، وبأكّد إني مخدتش من اللي تحت الحوض.
خاتمة
زمان عجينة البيتزا فكّت!
