هبه

الباستا (2)

نيجي بقى لأسماء الباستا اللي بنلاحظها دايما في الوصفات الأجنبية وبنبقى عايزين نجربها بس الاسم بيخضنا زي الفيتوتشيني والتروفي والمانيكوتي والفارفريللي والفيوزيلي.  بشكل عام كل اسم من دول ليه معني بالإيطالي زي الشريطية والأنبوبية والخيطية.

*كل أشكال الباستا على إختلافها ممكن تنقسم لعدة مجموعات:-

– باستا الخيوط String Pasta

 تحت النوع ده نلاقي أسماء زي الفيرماتشيلي, السباجيتي، الكاباليني، الفيديليني، آنجل هير (الشعرية).. إلخ.

كل الأسماء دي على شكل خيوط، الفرق بينهم بيكون في الطول والسُمك وفي قطر الخيط المكون للواحدة.

والنوع ده يمشي بشكل ممتاز مع الصوصات اللي أساسها زيت زيتون أو أي صوص خفيف ناعم يعني بدون قطع كبيرة. كل ما كان الصوص أقوى الباستا اللي تمشي معها مفروض تكون أسمك.

 -الباستا الشريطيه Ribbon Pasta

 زي الفيتوشيني، التاجلاتيلي، اللينجويني.. البارباديلي، البافيتتي.. إلخ.

الفرق بينهم بيكون في الطول وفي عرض الشريط المكون للواحدة والنوع ده يمشي بشكل حلو مع صوصات الزبدة والكريمة.

– باستا أنبوبيه Tubular Pasta

زي البينني (المكرونة القلم)، الريجاتوني، التورتيليوني، زيتتي، تابيتتي، ميزي (الصغيرة اللي بنحمرها).. إلخ.

النوع ده بيمشي مع الصوصات الخشنة، الفتحة اللي فيها هايدخلها الصوص ويتعلق فيها.

– باستا الأشكال Shape Pasta

 زي فيوسيلي (السوستة)، فارفاريللي (الفيونكة)، كونكليوني (الصدفة)، تروفي (المبرومة).. إلخ.

الشكل هنا هو النجم بس عموما كل ما كان الشكل فيه فتحات أكثر كل ما تعلق الصوص فيها أكثر.

– مايكرو باستا Micro Pasta

 الباستا اللي بتكون صغيرة جدا زي الأورزو (لسان العصفور) أو باستا الحروف أو الترس الصغير جدا.  

الباستا دي أكثر استخداماتها كإضافه للسلطات والشوربات أكثر من كونها تتقدم مع صوص.

– الباستا المحشيه Stuffed Pasta

 زي الكانيلوني، تورتيلوني، رافيولي، اللازانيا.. إلخ. 

 في الغالب الحشوة هنا هي النجم، الصوص مفروض يكون شيء بسيط ويحسن الحشوة بس.

– ملحوظة :-

– كلمة “ريجاتي Rigate “

تعني إن الأطراف خشنة، مثلا عندنا بينني ريجاتي وعندنا بينني سادة.. البينني ريجاتي لها زي التضاريس من برا عكس البيني السادة والبينني دي اللي هي المكرونة القلم.

*** 

في قاعدة عامة لاختيار الشكل المناسب مع كل صوص والقاعدة دي بتقول إن الصوصات القوية بتكون مع الباستات الكبيرة أحسن.

يعني مثلا البارباديلي (نوع من الشريطية) عريضة ومسطة تمشي مثلا مع صوصات اللحم عكس الآنجل هير (الشعرية)  اللي لو حطيناها مع صوص لحمة تضيع فيها. في المقابل لو حطينا الآنجل هير مع صوص زيت زيتون وبارمزان مثلا هاتكون مناسبة عكس البارباديلي اللي هاتطغى على طعم الصوص في الحاله دي.