ما هي مقاسات البرا؟ دليلك الشامل لشراء حمالة الصدر بالأرقام والحروف

حمالة الصدر أو البرا، مشكلة كبيرة عند أغلب البنات والستات، رغم إنها أساسية في الدولاب، وبتتلبس بشكل يومي من أول مرحلة البلوغ وممكن من قبلها كمان. بس لسه مش بنعرف إزاي نشتري البرا، سواء الشكل المناسب لجسمنا أو حتى المقاس المناسب. دي كام خطوة أساسية في اختيار البرا.

البرا بيتكون من إيه؟

البرا بيتكون من 3 أجزاء، جزء “الكب” اللي بيحتوي الصدر، جزء الحمالة، وجزء الدوران.

عشان تعرفي إن مقاس البرا مناسب ليكي، لازم الـ3 أجزاء يكونوا مريحين، يعني الصدر مش خارج من الكب ولا إنه يكون فيه فراغ. الحمالة متكونش مشدودة على الآخر وفي نفس الوقت متكونش ضاغطة عليكي. أما الدوران فلازم البرا يكون بيقفل على أول كبسونة، لإنه بعد كده بيوسع وهتحتاجي تضيقيه، كمان لازم يبقى فيه فراغ يسمح بمرور إصبع بين ظهر البرا وظهرك.

البراهات عامة بتنقسم لنوعين: 

1. نوع wired بيبقى فيه سلك معدني، ده لزيادة الدعم للصدر.
2. نوع non-wired وده مفيهوش السلك المعدني.

مقاسات البرا بالحروف والأرقام

• الكب مقاساته بتكون بالحروف الإنجليزي حيث حرف A هو الأصغر: A, B, C, D, DD, E, F.
• الدوران مقاساته بتكون بالأرقام: 30، 32، 34، 36…

مثال على مقاسات البرا: 34 B, 38D.

تعرفي أيضًا على: أنواع المايوهات واشكالها: ازاي تشتري المايوه المناسب ليكي؟

انواع البرا المختلفة؟ وإيه اللي يليق عليكي؟

البرا له أنواع كتيرة جدًا، منهم الكلاسيكي ومنهم اللي لسه طالع السنة اللي فاتت، ودي أهم أنواع بيتم استخدامها في مصر.

Full cup Bra/ برا الكب الكامل

ده أحسن حاجة لأصحاب المقاسات الكبيرة، بتحوي الصدر بشكل كامل ومناسب، وأحسن اختيار للمحجبات. وممكن يكون wired وnon-wired، على حسب راحتك الشخصية. 

Minimizer Bra/ برا مصغّر

ده مخصوص لأصحاب المقاسات الكبيرة، بيوزع حجم الصدر بطريقة متضايقش وبتخليه يبان أصغر نمرة، وبيفادي مشكلة أزرار القميص اللي بتفتح.

تعرفي على: أسرار جمال البنت الفلات

Lined Bra/ برا ناشف

بيبان شبه البرا المبطن، ولكنه في الحقيقة مش مبطن لكن الكب بيبقى ماسك نفسه وناشف، بيعطي شكل متناسق للصدر، وهو مناسب لكل الأحجام لأنه لا يعطي حجم أكبر ولا أصغر، وبيعطي دعم زائد للصدر.

Padded Bra/ برا مبطّن

الكب بيكون مبطن، وده بيعطي مقاس أكبر نمرة واحدة وانتظام أحسن لشكل الصدر الصغير. وبيكون مناسب جدًا لأصحاب الدوران الكبير والصدر الصغير، بحيث إنه بيعمل تناسب في شكل الجسم.

Push-up Bra/ برا للرفع

ده نوع بيعطي دعم وحجم أكبر للصدر، عن طريق وجود مخدة صغيرة في الكب من تحت بيساهم في رفع الصدر. وهو مصمم خصيصًا لأصحاب الكب C أو أصغر.

Contoured Bra/ البرا المحدد

ده بيبقى ناشف جدًا ومبطن، بحيث إنه يفضل على شكله ده مهما كان شكل الصدر اللي جواه، أو حتى لو كان مش ملبوس.

Sport Bra/ البرا الرياضي 

بيحمي أنسجة الصدر من التأذي أثناء تأدية التمارين الرياضية. البراهات الرياضية العادية بينصح بها لأصحاب مقاس C أو أصغر، بينما صاحبات المقاسات الأكبر فينصح لهم بنوع مخصوص يغلف كل صدر على حدة لإعطاء المزيد من الدعم.

Mastectomy Bra/ برا استئصال الثدي

مخصوص للنساء اللي عملوا استئصال لصدر أو للاتنين، عشان متحسش بأي اختلاف في هدومها. بيبقى فيه كيس سيليكون وجراب لحفظ الكيس ده.

Maternity Bra/ برا الحمل

للحوامل، مصمم إنه يكون مرن وناعم، بحيث إنه يفضل محافظ على شكل الصدر ويكبر مع الصدر كل ما بيكبر في فترة الحمل.

Nursing Bra/ برا الرضاعة

مصمم خصيصًا للأمهات المرضعات، لسهولة إرضاع الطفل من غير ما تضطر إنها تقلع البرا.

وفيه طبعًا أنواع أكتر من كده بكتير، زي براهات الظهر المنخفض لو هتلبسي فستان ضهره مفتوح، وبراهات بدون حمالات لو هتلبسي فستان بدون حمالات، وفيه براهات بتبقى على حرف الـU ودي لو هتلبسي فستان مفتوح من الصدر. وفي جميع الأحوال، لازم تجربي كتير على ما توصلي للمقاس المناسب ليكي فعلًا، وممكن كمان تروحي المحلات الكبيرة اللي بيبقى فيها قسم متخصص للبراهات، اسألي البنت اللي هناك إنها تساعدك إنك تعرفي مقاسك المناسب. وطبعًا مش لازم كل مرة تشتري من هناك، المهم إنك تعرفي مقاسك، بعد كده عادي ابقي اشتري من محلاتك اللي بتحبي تروحيها.