قبل فرحي اكتشفت من قعدات الرغي إن أهم حاجة تكون العروسة حاجزاها ومرتباها من بدري هي السبا أو مركز التجميل، بما فيه من
تجهيزات العرائس ومكياج العروسة يوم الفرح نفسه.
الحقيقة يعني أنا كنت عارفة إنه حاجة مهمة لأنها ليلة العمر طبعًا ولازم أكون ملكة في أحسن حالاتي، بس أكيد مش لدرجة إن حجوزات
مراكز التجميل تبدأ قبل الفرح بشهرين تلاتة، بأسعار يمكن أغلى من أسعار قاعة الفرح وفستان العروسة.. اللي هو "إيه؟! همّ هيعملوا إيه
يعني؟!". وبدأت طبعًا رحلة البحث عنSPA سعره معقول وخدمته جيدة وكمان متاح فيه معاد قبل فرحي.. خلاصة اللف هتلاقوها في
السطور الجاية.
الصيت ولا الغني
اكتشفت إن مراكز تجميل كتير جدًا وSpa بتكتسب شهرتها من الدعاية الكويسة على السوشيال ميديا وبس، إنما كخدمات فبتكون فعلاً أقل
من العادية، لكن عشان اسم صاحبة المركز أو كام عروسة شكروا في الخدمة بمستوي طبيعي، فالأسعار بقيت مرتفعة والرد دايمًا "ده
مركز تجميل وSpa فلانة". من واقع التجربة زُرت أكتر من مكان منهم قبل الحجز، واتأكدت بنفسي إن مستوى الخدمة ميستاهلش المبلغ
المطلوب، خصوصًا إن في وقت الهاي سيزون بيكون فيه كَرْوَتة كتير جدًا في التعامل.. عشان كده متحجزيش عمياني بناءً على صور
الفيسبوك وكلام الناس.. شوفي بنفسك.
الحمام البلدي
كان من ضمن الاختيارات طبعًا، بالنسبة لسعره يعتبر سعر معقول ورخيص جدًا، لكن بالنسبة للخدمات فبالرغم من جودتها الواضحة
لكن ينقصها الخصوصية والأدوات الحديثة اللي موجودة في مراكز التجميل المجهزة، تجربة ومغامرة تستاهل لكن مش قبل فرحك أكيد،
لو لوحدك ومش معاكي حد يخلي باله من حاجتك وخصوصيتك ونضافة الأدوات المستخدمة.
نحن نعمل في صمت
فيه مراكز تجميل وSpa أسعارها معقولة جدًا بس بتفضّل البعد عن الدوشة ومنافسات السوشيال ميديا، غالبًا هتلاقي العاملين فيها أجانب
من الفلبين والصين وأصحابها مصريين برضو، خدماتها مميزة وكمان زوارها فعلاً مبيتأثروش بموسم الأفراح والضغط، لأنها بتكتفي
بعدد محدود من الزباين ومش بتزيد عنه عشان تضمن جودة الخدمة.
بالنسبة لتجربتي الشخصية
اخترت وقت فرحي إن يكون مكان الـSpa فيه كمان المكياج والتجهيزات النهائية، ده صحيح أنجزني ف الوقت والجهد، لكن في الآخر
التكلفة كانت مرتفعة شوية بالنسبة للخدمة المقدمة، خصوصًا إني كنت في موسم الأفراح والصيف، فطبعًا الخدمة اللي بتاخد 30 دقيقة
اتحولت لربع ساعة وهكذا.
عشان كده خليّ بالك وإنتي بتقرري حجز مركز تجميل أو Spa من النقاط الآتية المهمة جدًا:
1- اتأكدي إن المبلغ شامل كل الخدمات المتفق عليها، وإنك مش هتتفاجئي بمبلغ زيادة وقت الخدمة، وده حصل معايا فعلاً وكان موقف
سخيف لأن الزيادة في الفلوس كانت كبيرة.
2- اتأكدي من دقة المواعيد وهل هتضطري تجيبي أدواتك معاكي ولا فيه أدوات مخصصة للاستخدام مرة واحدة -كده كده بتكون شاملة
الحساب، فلازم تطمئني إنها أول استخدام ليكي وبس- وتحديدًا في الحمام المغربي ومنتجات تنظيف البشرة.
3- اعرفي كل التفاصيل عن المواد والأجهزة المستخدمة خصوصًا لو بشرتك حساسة.
4- خصوصية المكان خصوصية المكان خصوصية المكان…
5- يُفضّل إنك تسمعي تجارب ناس راحت فعلاً المكان ويفضل إنك تروحي أكتر من مرة قبل فرحك أو مناسبتك عشان تشوفي مستوى
الخدمة على غيرك.
6- متنخدعيش بالمظاهر والكلام اللطيف ومتسكتيش عن حقك أيًا كان، لأنك في النهاية دافعة مقابل خدمة المفترض إن جودتها عالية.
وأخيرًا ركزي في الاختيارات وحاولي متخرجيش عن الميزانية المخصصة للجزء ده من ترتيبات الفرح، ولو عايزة توفري فعلاً تقدري
تعملي لنفسكSpa في البيت لو كان المكان والظروف تسمح، وهنا هتحتاجي:
– ليفة مغربية وصابون مغربي من عند العطار.
– دلكة سودانية (اختياري) للتعطير.
– زيوت عطرية.. اللافندر والياسمين والليمون ريحتهم رائعة.
– حمام مجهز بمياه ساخنة وفوط نضيفة.
– ماسكات للبشرة سواء للتقشير أو التفتيح والتنظيف -ممكن تعمليها من مكونات طبيعية وممكن تشتري ماسكات جاهزة من مكان موثوق
منه- وليكن ماسك الطمي المغربي.
– ماء ورد وقطن وكريم مرطب.
– زجاجة مياه للشرب منها.
الطريقة:
1- ينصح بإزالة الشعر الزائد قبل الحمام المغربي بيوم على الأقل، عشان البشرة ترتاح وميحصلش احمرار أو حساسية.
2- املي البانيو بالماء الساخن والحمام بالبخار اللي بيساعد على فتح المسام، استرخي في البانيو لمدة 15 دقيقة مع صبّ الماء الدافئ على
جسمك والتدليك بحركات دائرية من رجلك لراسك، لتنشيط الدورة الدموية. حاولي تغطي شعرك بفوطة أو كاب الحمام عشان البخار،
وامسحي بشرة وشك بمية الورد كذلك.
3- قومي بتدليك جسمك بالصابون بشكل دائري واتركيه مثلاُ 10 دقايق على جسمك بدون شطف، ثم قومي ببل الليفة وفرك جسمك ببطء
ورفق لإزالة خلايا الجلد الميت وشد البشرة.
4- ماسك الطمي المغربي: كسريه قطع صغيرة، ضيفي مقدار مياه ورد وزبادي ليكونوا عجينة سهلة الفرد، ضعيها على جسمك واتركيها
لمدة 5 دقائق ثم اشطفي بماء فاتر.
5- بعد شطف الجسم من ماسك الطمي، تقدري تملي البانيو مية دافية وتحطي نقاط من الزيت المعطر وتسترخي 10 دقايق كمان لحد ما
تحسي إن جسمك تشرب ريحة الزيت واللي هتدوم معاكي فترة طويلة.
6- متنسيش تشربي شوية مية كل شوية لتعويض الفقد من جسمك.
7- تقدري طبعًا تزودي ماسكات زي ما تحبي وممكن تقومي بالتجهيزات على يومين قبل الفرح مباشرة عشان جسمك يرتاح وبشرتك
تكون نقية.
وألف مبروك يا عروسة.
اقرأ أيضاً: الحب حلم.. والزواج حقيقة
اقرأ أيضاً: أنا إيه خلاني أتجوز؟!
اقرأ أيضاً: الطُرق المثالية لميزانية متخرّش المية
اقرأ أيضاً: ليلة الحنة – طقوس ومشاعر
اقرأ أيضاً: كيف ترخين أعصابك قبل يوم الزفاف
اقرأ أيضاً: الباقي من الزمن
اقرأ أيضاً: طالعة من بيت أبوها بدر منور
اقرأ أيضاً: 4 أفكار سريّة داخل كل فتاة
اقرأ أيضاً: التوقعات المرئية لزواج ناجح
اقرأ أيضاً: كيف تتعاملين مع غضب زوجك؟
اقرأ أيضاً: قبل الزفاف فرحة ولا قلق وحيرة؟
اقرأ أيضاً: ليلة الزفاف.. كل ولا تأكل
اقرأ أيضاً: حتى لو كانت حماتك ملاك
اقرأ أيضاً: ليلة الزفاف بين الحقيقة والخُرافات
