بقلم: هبة محمد
لماذا ينتحر الناس؟! هل الشخص واعٍ بأنه سيتخلص من حياته إن لم تكن للحياة معنى مع الألم والوجع والعجز. الشخص الذي يحاول الانتحار هو شخص يحاول أن يجد مخرجًا للأزمة التي يمر بها في حياته، أو يحاول الهروب منها. والأشخاص الذين يحاولون الانتحار هو بالنسبة إليهم وسيلة ليس إلا، للتخلص من المشاعر المحبطة والألم والوجع والقهر والعجز والخذلان والخزي.
هل نقص دين؟ هل عدم فهم؟ هل إحساس بالوحدة وفقد الغير؟ هل كل ده؟!
ليه وصلنا لمرحلة إننا مش بنسمع بعض؟ ليه وصلنا لمرحلة إننا عايزين نغير بعض على مزاجنا؟ ليه منقبلش الشخص اللي قدامنا زي ما هو بحلوه ومره؟
العيب فينا ولا في مين؟
التقصير مننا ولا جاي علينا.
هل الحالة وقتية وخلاص المولد هيتفض وخلاص وكل واحد يروح لحاله، ونفوق من تاني في كارثة تانية، انتحار برضو.. نعمل إيه طيب؟
ممكن الخطوات دي تساعدنا إننا ناخد بإيد شخص للعلاج ونهون عليه:
إننا لو قابلنا شخص في مرحلة من مراحل الاكتئاب، سواء في البداية أو مرحلة متأخرة، نساعده ونحاول نقرب منه ونسمعه ونقبله زي ما هو ونحاول نقنعه إنه يلجأ للعلاج، ولكن من غير نصيحة أو وصم وتنظير، من غير ما نقوله إنت كده بتستسلم أو إنت كذا أو كذا؛ الناس دي بتبقي على حافة الهوية، ممكن كلمة صغيرة منك تكون القشة التي قصمت ظهر البعير وإنت مش واخد بالك، الناس دي بتعافر مع نفسها جدًا وتعبت جدًا ومشاعرها انتهكت بما فيه الكفاية. دورنا نكون السند هنا.
وفيه حاجة مهمة، إن مش كل الناس مؤهلة تسمع، فيه ناس بتتأثر وحياتها هتبوظ، غرقان بينقذ غرقان، فبيموِّتوا بعض بدون قصد، مش كل الناس ده حلها. شوية فضفضة أو دعم أو رد على سؤال. مش كل الناس حلها الدعم، وفيه ناس بتحب ترمي مسؤولية حياتها على الناس، اعتماديين وعمرهم ما هيتغيروا غير لما يواجهوا نفسهم ويقرروا يتغيروا ومش هيعرفوا يعملوا ده غير مع متخصص.
آسفة لكل وجع حس بيه إنسان على الأرض!
آسفة لإحساسك بالعجز وقلة الحيلة!
آسفة لوجع أب وأم فاقدين ومصدومين دلوقتي!
آسفة لكل شاب وجعه صحي!
آسفة لكل حد خاف من نفسه وعلى نفسه!
آسفة لكل ده!
آسفة ليك نيابة عن اللي جرحوك وآذوك نيابة عنهم وعن كل العالم!
أرجوك قدم مساعدة على قدك، متوعدش وتخلي، متتصرفش من رد فعل عاطفي لن يدوم. فكر في خدمة تقدر تقدمها على مدى طويل وتقدمها صح وبجودة عالية، وتنقذ إنسان مستعد، أو وجِّه إنسان مش مستعد للي يساعده. من كان له قلب يتألم للإنسانية، فلتكن له رسالة يخدمها.
وجودكم بيفرق في حياتنا.
اقرأ أيضًا: انتحار هانا بيكر
