أشهر اكليشيه نبدأ بيه المقال “في السفر سبع فوائد” والاكليشيه الأشهر إننا نكتب “ﻷ.. أكتر من سبعة”. آخ! وقعنا في فخ الاكليشيه من أول سطر، مع إن السفر تجربة بعيدة خالص عن الاكليشيه. تجربة بتفجر مشاعر وطاقات مكناش عارفين إنها موجودة، تجربة بتاخدنا لشوارع جديدة وبتفاجئنا في كل خطوة. أكتوبر اللي فات أتيحت ليَّ فرصة السفر لأوروبا. جزء من الرحلة كان في إطار ورشة مدفوعة التكاليف. والجزء التاني كان على حسابي. وطبعًا عشان أسافر على حسابي كان لازم أدور على أرخص طرق السفر.

لما كنت بقول إني ناوية أسافر بميزانية محدودة ناس كتير خوفتني وطلعولي عفاريت كتير، لكن التجربة كانت مختلفة، وعرفت إن السفر بميزانية محدودة خيار متاح، ومتهيألي إن حتى لو هبطت عليَّ ثروة من السماء في المستقبل ممكن برضو أختار أسافر بميزانية محدودة ﻷسباب كتير.

أهم حاجة في الموضوع هو التخطيط الكويس للسفر قبلها بفترة كويسة. اسأل نفسك وفكَّر. اعرف أولوياتك، مسافر ليه؟ مسافر تستجم ولا تتكحرت في الشوارع؟ مهتم بتجربة أكلات ومشروبات جديدة ولا مبيفرقش معاك الأكل؟ بتحب المتاحف ولا الطبيعة والبحر؟  لوحدك ولا مع أصحابك أو عيلتك؟ إجابة الأسئلة دي هتفرق جدًا في اختياراتك والطريقة اللي هتقسم بيها ميزانيتك.

دي أهم بنود ميزانية السفر وإزاي تخطط كل بند وتوفر فيه.

1. الطيران

الطيران من أكتر البنود المكلفة، لكن ممكن توفر فيه. احجز بدري عن معاد سفرك قدر الإمكان، قبل السفر من 6 لـ8 أسابيع على أقل تقدير. أهم المواقع اللي ممكن تدور عليها على تذاكر طيران رخيصة:

sky scanner

Momondo

Kiwi

المواقع دي بتتيح لك البحث بمرونة. ممكن تدور من غير ما تحدد الوقت، وممكن تدور من غير ما تحدد المكان، وده بيساعدك إنك توصل ﻷقل الأسعار. يعني مثلاً لو محدد إنك عايز تسافر إسبانيا، بس مش عارف امتى، هتدخل تعمل بحث عن الرحلات من البلد اللي إنت فيها لإسبانيا، من غير ما تحدد التاريخ، وهتظهرلك مواعيد وأسعار التذاكر المتاحة عشان تختار أقلها. أما بقى لو مثلاً عارف إن عندك أجازة في مارس لكن مش عارف تروح فين، فممكن تحدد التاريخ وتسيب خانة الوجهة فاضية، وهتطلعلك تذاكر الطيران المتاحة في مارس، وتشوف أنسبها.

النصيحة التانية: متحددش المدينة، سواء في البلد اللي هتسافر منها أو اللي إنت رايحها، اكتب اسم الدولة بس، عشان ممكن تلاقي تذاكر أرخص من مدن مختلفة، حتى مع إضافة تكلفة المواصلات الداخلية.

دور في شركات الطيران الرخيصة: زي شركات Easy jet، Ryanair، بس ركز وإنت بتقرأ شروط حجز التذكرة في المصاريف المستخبية.

فيه نصيحة كمان مهمة، وإنت بتبحث استخدم وضع التصفح الخفي incognito، اللي مبيسمحش للمواقع إنها تستخدم ملفات الكوكيز. ليه؟ ﻷن لما بتبحث أكتر من مرة عن أسعار الطيران لمكان معين، المواقع بتبدأ ترفع الأسعار اللي قدامك، عشان توحيلك إن الأسعار بترتفع ولازم تحجز بسرعة.

2. الإقامة

فيه اختيارات كتير للإقامة الموفرة

couch surfing

ده عبارة عن إن حد بيستضيفك في بيته، وبيقدملك كنبة تنام عليها (ببلاش). وأشهر موقع بيقدم الخدمة دي هو موقع couchsurfing، مميزاته إنه ببلاش، وإنه بيديك فرصة تتعرف على حد من أهل البلد. عيوبه في انعدام الخصوصية، وإنه مش دايما آمن 100%. وأنا شخصيًا مجربتوش.

Hostel أو بيوت الشباب

الاختيار اللي بعد كدة اللي أنا جربته هو Hostel أو بيوت الشباب بتتخلى فيها عن شوية الرفاهية والخصوصية اللي بتقدمها الفنادق الأغلى. الأوض فيها بتبقى مشتركة، وبعضها فيه أوض خاصة بس بسعر أعلى. الهوستل اللي قعدت فيه كلفني 20 يورو في الليلة لأوضة فيها سريرين بدورين، يعني أنا وتلات بنات تانيين. لكن مكنتش بشوفهم، ﻷن كله كان بيصحى بدري جدًا يخرج، ويرجع بالليل على النوم. مجرد مكان بنام فيه مش أكتر.

كان فيه أسعار كتير أقل، بس ده كان أنسب حاجة ارتحت للريفيوهات بتاعتها من حيث النضافة والأمان والقرب من وسط المدينة. وأشهر موقع تدور فيه هو hostelworld. اللي عملته وأنا بدور إني كنت أولاً بحدد نطاق البحث من حيث الميزانية، والحاجات المهمة بالنسبة لي، زي إنه يكون قريب من وسط المدينة، وفيه غرف سيدات بس، مش مشتركة، وفيه WiFi. وبعدين ببدأ أدور في النتايج وأقرأ ريفيوهاتها، وأرتب الريفيوهات من الأقل للأعلى ومن الأحدث للأقدم.

كل واحد له أولوياته، الريفيوهات اللي ممكن تكون سلبية لغيرك ممكن تكون إيجابية ليك. يعني الهوستل اللي نزلت فيه كانت التعليقات السلبية عنه إنه هادي ومفيهوش حياة اجتماعية، وإن النزلاء في حالهم، وده كان عز الطلب بالنسبة لي. عوامل تانية زي النضافة والأمان، لو لقيت أي تعليقات خصوصًا لو متكررة وبتواريخ حديثة أهرب. من ناحية الأمان أغلب الهوستلز بيبقى فيها خزنة صغيرة أو لوكر لكل واحد يحط فيها متعلقاته المهمة، وبيسلموك قفل أو كارت ممغنط لقفلها، أنا كنت جايبة معايا قفل من بلدنا زيادة تأكيد، وعمومًا كنت باخد معايا الحاجات اللي خايفة تتسرق (الباسبور والكاميرا والفلوس).

ملحوظة: اتأكد من مواعيد check in & check out إنها مناسبة لمواعيد سفرك. الهوستل اللي نزلت فيه مكانش فيه check in قبل 8 الصبح، وأنا وصلت الساعة 6 الصبح، والدنيا كانت بتمطر، حطيت شنطتي وفضلت قاعدة عليها لحد الساعة 8. بائسة وجعانة وبردانة.

شقة أو استديو صغير أو أوضة

الخيار التالت اللي مجموعة من أصدقائي استخدموه هو موقع airbnb، بيتيح إنك تأجر شقة أو استديو صغير أو أوضة في شقة. عادة بيبقى أرخص من الهوستل، خصوصًا لو إنتم أكتر من واحد، فالإيجار بيتقسم عليكم كلكم. برضو هتقرأ الريفيوهات كويس، وتتأكد من المكان، هل هو قريب كفاية من وسط المدينة؟ ولو بعيد حبة هل الانتقال في المدينة دي سهل ولا ﻷ؟ هل هي مدينة صغيرة سهل الوصول من مكان إلى آخر ولا كبيرة وهتضيع وقت كبير في المواصلات؟ هل الحي اللي هو فيه آمن كفاية؟ أصدقائي كانت تجربتهم في مرة هايلة، وفي مرة تانية كانت الشقة نفسها كويسة لكن الحي سيئ، وده مكانش واضح من الريفيوهات.

3. الأكل

الموضوع بيختلف من شخص للتاني. أوفر حاجة إنك تطبخ أكلك بنفسك. الميزة في خيارات الإقامة اللي ذكرناها إن أغلبها بتوفرلك مطبخ بكل أدواته. وبيبقى سهل تعمل أكلك كل يوم بالليل قبل ما تنام. الطريقة دي موفرة وبتضمنلك أكل صحي، ومش متعبة، يعني من أي سوبر ماركت هتجيب كيس مكرونة وكيس برجر أو سجق أو علبة تونة. فيه خيارات كتير سهلة وسريعة ومش مكلفة. وجبنة مثلاً أو بيض وعيش للفطار والعشا.

ده اللي أنا كنت مخططة أعمله، لكن للأسف اللي حصل في الواقع كان حاجة تانية. معرفتش أوصل للسوبرماركت بسهولة، في فرانكفورت اعتمدت بشكل أساسي على المحلات التركية وكنت باكل ساندوتشات شاورما وبيتزا. وفي براج حظي كان سيئ جدًا في كل الأكلات التقليدية اللي حاولت أجربها. وفي الآخر رحت للي أعرفه وسبت اللي معرفوش، وقررت آكل ماكدونالدز. وبرضو كان طعمه وحش.

لو إنت جزء من تجربة السفر بالنسبة لك هو سياحة الطعام، ومهتم تجرب الأكلات المختلفة للدولة اللي إنت مسافرها، فدور على جوجل على الأكلات المميزة للبلد دي، وأفضل الأماكن اللي بتقدمها، وخد فكرة عن أسعارها عشان تبقى عامل حسابك. واحتياطي برضو خد شريط فيلاجيل معاك وانت مسافر.

4. المزارات والفسح

فيه بلاد شوارعها متاحف مفتوحة، لدرجة إنك مبتحتاجش تدفع فلوس وتدخل متاحف. النصيحة المهمة هي إنك تدور وتشوف إيه المهم بالنسبة لك، مش إيه الشائع أو الأشهر. يعني ممكن يكون أشهر متحف في البلد دي متحف فني وإنت مهتم بالعربيات مثلاً، فبالنسبة لك متحف بيعرض تاريخ العربيات هيبقى أمتع مليون مرة من متحف بيعرض لوحات. والموضوع كمان متوقف على إنت مخصص فلوس قد إيه لبند المزارات. وإيه اللي مهم بالنسبة لك تروحه، وإيه اللي ممكن تكتفي إنك تشوفه في الصور.

دور على حجز التذاكر أونلاين قبل ما تسافر، ﻷنه بيجنبك الطوابير الطويلة، خصوصًا في المزارات الزحمة، وأحيانًا بيديك أسعار أقل. دور على City pass، وده عبارة عن عرض أو كارت سياحي بتدفع مبلغ على بعضه، وبيتيحلك تدخل بعض المزارات مجانًا، وبيتيح دخول الباقي بخصومات. جرب الجولات المجانية أو free city tour، ودي بتبقى جولات سياحية عاملها أفراد، سواء محترفين أو هواة، في مقابل إكرامية بسيطة بتدفعها في نهاية الجولة.

5. الانتقالات

في المسافات القصيرة امشي، إحنا جايين نشوف البلد ونتبسط بيها ومحدش بيجري ورانا، ولما تتعب اركب مواصلات عامة. لو هتستخدم المواصلات أكتر من مرة اشتري التذاكر اللي مدتها طويلة. فيه مثلاً تذاكر صالحة 24 ساعة أو أسبوع. والموقع ده والأبلكيشن بتاعه هيساعدك تعرف المواصلات من أي مكان ﻷي مكان Rome2rio. وللمواصلات بين الدول الأوروبية جربت أبليكيشن Omio، بيطلعلك كل خطوط الباص والقطر والطيران من دولة لدولة، وبيقارن بينهم من حيث السعر والمدة. وساعدني جدًا.

نصايح عامة

خط الداتا بيساعدك جدًا جدًا

أول كام يوم في السفر مجبتش خط وقلت هعتمد على الواي فاي في الفندق، لكن كنت كتير بحتاج أدور على حاجة وأنا برة، أو أعمل مكالمة أتطمن على أهلي، وأضطر أستنى لحد ما أروح آخر اليوم. في نص الرحلة اشتريت خط داتا للموبايل، وفرق معايا ﻷقصى درجة.

استخدم google translate

في فرانكفورت كنت عايزة أوصل للمطار، وتهت في المترو، كل حاجة شبه بعضها وشبكة المترو معقدة جدًا. لقيت ست جميلة كده ومعاها شنطة سفر كبيرة فوشيا، جريت عليها وحاولت أتفاهم معاها بالإنجليزي، مبتعرفش، قعدت أشاورلها على شنطتها وشنطتي وأعملها جناحات بإيديا، لحد ما فهمت إني عايزة أروح المطار، فخدتني في إيدها. في المترو طلعت الموبايل ودار بيننا حوار عن طريق جوجل ترانسليت. عرفت إنها برازيلية وراجعة بلدها.

تكاليف المعيشة

عشان تقدر تحط ميزانية واقعية محتاج تعرف تكاليف المعيشة في البلد اللي إنت رايحها، موقع numbeo بيساعدك في معرفة تكاليف المعيشة وأسعار الأكل بشكل تقريبي.

الشنط

متاخدش شنط كتير، شنطة واحدة صغيرة كفاية، عشان السفر الموفر معناه إن مفيش تاكسي، وهنركب مواصلات عامة، يعني باصات ومترو، يعني سلالم وبهدلة، وهيطلع عينينا، إلا لو كانت عضلاتكم كويسة مش زي حالاتي.

خد power bank

خصوصا لو زي حالاتي وموبايلك بطاريته بتموت بسرعة. أنا تهت كتير rوي بسبب فصلان الموبايل في الشارع.

لو مسافر أوروبا اسأل على الـTAX FREE

في المحلات اللي بتشتري منها، بتوريهم الباسبور وبيدولك ورقة مختومة، روح المطار بدري شوية واملا بياناتك وقدم الورقة دي في الشباك المخصص، بيراجعوا الورق والحاجات اللي معاك، فخليهم في مكان ظاهر. وخلي معاك رقم الديبيت أو الكريديت كارد، عشان يرجع عليه، ﻷن لو كاش بيتخصم منها نسبة.

خد معاك فلوس زيادة

دايمًا اعمل حساب الطوارئ. قطر فاتك واضطريت تحجز تاني. رحت السكن لقيته غيّر الصور واضطريت تروح مكان أغلى. أي طوارئ تبقى مستعد لها.

انبسطوا ومتخلوش حاجة تنكد عليكم وإنتم مسافرين. افتكروا إن الوقت ده مش هيتعوض. جربوا حاجات جديدة ومتخافوش ومتقلقوش. اتعرفوا على ناس واسمعوا حكاياتهم، وارجعوا متدفيين بالونس والحواديت.

اقرأ أيضًا: خطوة بخطوة: أول رحلة لأوروبا