كل حد فينا اختبر مشاعر الحزن والغضب والكآبة، والاكتئاب أحيانًا، بسبب كسرة قلب أو كسرة نفس، أو حرمان من شيء بنحبه أو ناس بنحبها، أو بعض الخسارات الأخرى أو حتى بدون أسباب واضحة لينا، ومع وجود حوالي 300 مليون إنسان بيعانوا من الاكتئاب (بناءً على تصريحات منظمة الصحة العالمية)، أصبح الشعور بالكآبة سبب رئيسي بيأثر على إنتاجيتنا في الحياة عمومًا، الشيء اللي بيزود من شعورنا بالكآبة ويساهم في وصولنا لحالات أكتر من الاكتئاب. وبسبب تكرار زيارة الحالات دي للنفس فالمعالجة النفسية Megan Bruneau بتقدم بعض النصايح اللي ساعدتها هي شخصيًا في الأوقات الصعبة المالحة اللي بنحتاج نعدي منها بسلام، مع إنجاز بعض المهمات المطلوبة. أهم النصايح كانت:
1- اخرج برة البيت
لما بنكون في حالة اكتئاب، أسهل شيء بيكون البقاء في مكان مقفول بعيد عن كل حاجة، ويا إما نقلب في صفحات الفيسبوك وياخدنا الوقت لحتت وأماكن وصفحات إحنا مش عارفين دخلناها ليه، أو نتفرج على صور ناس على إنستجرام ونشوف الناس قد إيه سعيدة بحياتها الجديدة من غيرنا، أو حتى نقعد نقلب على اليوتيوب أو النيتفليكس، ونتفرج على نفس حلقة المسلسل للمرة الأربعين. كل اللي فات ده بيزود حالة الغرق اللي ساعات بنحسها لما نبقى في حالة نفسية سيئة أو حتى لو موجة كآبة عابرة، وساعتها لو شغلنا بيعتمد على الشغل من البيت بيكون الموضوع أصعب ومبنقدرش ننجز حاجة، وده بيسبب شعور أكبر بالحزن ويدخلنا جوة الدوامة أكتر. برغم سهولة إننا نتجر في السكة دي بسبب حالتنا النفسية وقتها، لكن الخروج برة البيت بيكون مفيد جدًا، زي الشغل من كافيه بنحبه وبيرحينا أو الشغل من مساحات العمل المشتركة اللي أصبحت منتشرة الآن.
2- حدد توقعاتك بناءً على حالتك النفسية
ميجان بتقول: لما بتكون حالتك النفسية في أحسن حالاتها، إنت ممكن تنجز كتير جدًا وفي وقت يمكن أقل من المتوقع، بتكون زي الجهاز الجديد اللي بيشتغل بـ100% من طاقته. لكن لما بنكون مش في أفضل حالاتنا، صعب إننا نتوقع من نفسنا نفس الأداء، وبنحتاج نتعلم إننا منتوقعش من نفسنا نفس التوقعات، لو حاسين إن مجهودنا يا دوب 30%، فنتوقع من نفسنا الـ30% دول، وبلاش نحط توقعات كبيرة وإحنا عارفين إننا منقدرش عليها في الوقت ده بالذات. فبدلاً من تحديد مهمة معينة لليوم كله، الأفضل تحدد جزء صغير من المهمة هتشتغل عليه في وقت معين، وليكن من الساعة 12 للساعة 2، ده هيسهل عليك وهيقلل ارتباكك وهيزود تركيزك على إنجاز الجزئية والتركيز على نقطة مهمة في الأيام الصعبة اللي بيكون تركيزنا فيها محدود.
3- حافظ على التزامك
تنفيذ شغل مطلوب منك أو إنجاز مهمة محددة بميعاد معين مهمة صعبة وإحنا كويسين ومتعافين نفسيًا، وصعوبتها بتزيد كل ما النفسية بتكون مش في أحسن حالاتها، الأصعب إن عدم إنجاز شغل إحنا مسؤولين عنه في وقته المتفق عليه بيزود من كآبتنا وبيقلل إنتاجيتنا أكتر، وعشان نقدر نمسك شوية خيوط تساعدنا على ده، ممكن نلزم نفسنا بإنهاء بعض المهام كجزء من خطة العلاج مع الطبيب النفسي المعالج، أو عن طريق إننا ندرب حد معانا على الشغل يساعدنا في ده، وفي نفس الوقت يكتسب خبرة، وإننا دايمًا نطلب المساعدة اللازمة عشان نقدر نحافظ على كوننا أشخاص مسؤولين مسؤولية حقيقية.
4- اعتني بنفسك وخليك مع اللي بيحبوك
عادة لما بنمر بوقت صعب، بنلجأ إننا نعزل نفسنا عن الآخرين. وعلى الرغم من إن ده ممكن يكون عكس اللي بنحس إننا محتاجينه في الوقت ده، لكننا بنحتاج نكون في وسط ناس، لكن مش أي ناس، الناس اللي فعلاً بتتقبلنا زي ما إحنا، حتى لو كنا في حالة فوضى تامة، الناس اللي فعلاً بتهتم بينا بشكل حقيقي ونقدر نروحلهم زي ما إحنا كده (بعبلنا زي ما بيقولوا) من غير كسوف ولا زواق.
بالإضافة لده، في الأوقات المالحة، وإحنا حاسين إننا مكسورين بعض الشيء، بنحتاج أكتر للعناية بنفسنا، وده ممكن يحصل عن طريق نوعين من الأنشطة اللي بتساعدنا، أول نوع هو الأنشطة اللي بتسبب نوع من الإلهاء زي ممارسة التسلق، صناعة الحُلي. الأنشطة دي بتتميز بإنها بتحتاج تركيز عالي فيها فبتقدر تفصلنا عن بعض المشاعر غير المحببة، والنوع التاني هي الأنشطة اللي بتساعدنا في التعبير عن نفسنا ومشاعرنا زي الرسم أو الكتابة. المهم إننا نتأكد إننا زي ما بيقولوا بنعمل الطيب لنفسنا، مش بس عشان نداوي نفسنا، لكن كمان عشان نحس إننا لسة قادرين نِدي، وعشان كده لازم نِدي المساحة دي لنفسنا الأول.
كمان جزء كبير من إننا نخلي بالنا من نفسنا هو إننا نخلي بالنا من العلاقات اللي ممكن نبنيها مع مواد -مش أشخاص- زي الكحول أو النيكوتين أو حتى الكافيين، لأنهم بيزودوا من أعراض الاكتئاب وبيخلوا الموضوع أسوء بكتير، وبيدخل مناطق ودواير تانية تتعِب أكتر.
5- تواصل مع معالج
الاستشاريين والمعالجين النفسيين مش موجودين، بس لما نوصل لتفاقم حالة الاكتئاب، همّ موجودين دايمًا وبيكونوا دعم حقيقي لأي حد بيمر بأوقات مالحة في أيامه.
6- اتعلم تبقى رحيم تجاه نفسك
عامل نفسك زي ما بتعامل صاحب قريب ليك بتحبه، اختار الكلمات اللي بتكلم نفسك بيها، حط لنفسك توقعات عالية، لكن ادِّي لنفسك مساحة للخطأ، وده هيديك مساحة تقدر تكبر فيها وتخاطر وتلبي توقعاتك عن نفسك.
7- دَوًّر على الهدايا المستخبية في معاناة الماضي أو الحاضر
الدراسات الحديثة لقت إن فيه علاقة قوية جدًا بين الصعوبات النفسية اللي بنمر بيها وقدرتنا على الإبداع، وإن قدرة الإنسان بتتطور لصنع فنون كتير كنوع من التأقلم أو كنوع من أدوات التعبير بسبب المرور بصدمات نفسية، وإن هي نفسها الصدمات اللي ممكن تخلينا نحس بالعار تجاه نفسنا، وبالتالي أوقات أكثر ملوحة وأوقات أتقل. وعشان كده كتير بنكون محتاجين نعترف ونتقبل إن كتير من نقاط قوتنا دلوقتي كانت بسبب بذور زرعتها معارك خضناها مع نفسنا زمان، أو لسة بنخوضها كل يوم، وإننا نحاول على قد ما نقدر نلاقي معنى في الأسى والآلام اللي بنمر بيها من وقت للتاني.
المصدر:
https://qz.com/1089589/how-to-stay-productive-when-youre-depressed-or-heartbroken/
للمعالجة النفسية Megan Bruneau
