كسوة الشتا وكسوة الصيف.. مصطلحين كان أي بيت مصري متعود عليهم وبيجهز ميزانيتهم، بس الوضع دلوقتي اختلف بعد الغلاء الرهيب في أسعار الهدوم في المحلات، أرقام عجيبة تجيب ذبحة صدرية.. والـ1000 جنيه اللي كانت تجيب 4 أطقم كاملين دلوقتي يدوب تجيب قطعتين من غير أي كمالة.
وبسبب الغلاء ده الأونلاين سوقه بدأ يظهر بقوة، مشاريع كتير لشباب بتحاول تمشي مع الموضة بأسعار أقل وتكلفة أقل وخامات كويسة. بس برضو الشرا أونلاين مش مضمون، وبسهولة ممكن يتضحك عليكي ومتعرفيش تجيبي حقك، وبدل ما توفري تغرمي أكتر، وده حصل معايا شخصيًا. عشان كده هقدملك عصارة تجاربي في الشراء الأونلاين عشان توفري:
1– أول حاجة لما تفكري فيها لو قررتي تشتري أونلاين هي مصداقية الصفحة اللي هتشتري منها، المصداقية تساوي منتج محترم بسعر مقبول جدًا، وده تقدري تقيسيه من آراء الناس و”الريفيوز” عن المنتجات، لازم تدققي كويس وتشوفي كام حد بيشكر في شغل الصفحة وكام حد عنده اعتراض. ده هيخليكي تحددي إنتي هتشتري ولا لأ والمغامرة تستاهل من عدمه.
2- الصور هتهوسك.. هتجننك.. هتحسي إن الهدوم والأكسسوارات هتنطق من الموبايل، وهتلاقي كمان صور لعارضات أجنبيات وموديلات مش من هنا خالص، مع كل التأكيدات إن اللى هيوصلك هيبقى نفس الصورة بالظبط. متنخدعيش واطلبي تشوفي صور على الطبيعة وواضحة ومُقرّبة للمنتج اللي عايزة تشتريه، ده هيوفر عليكي إنك تشتري على أساس الصورة المعروضة، وفجأة تلاقي نفسك دفعتي فلوسك في حاجة مختلفة خالص وتندمي جدًا.
3- لو خلاص استقريتي على حاجة وشفتيها على الطبيعة وقررتي تشتري، لازم في الخطوة دي تستفسري عن سياسة الاستبدال والاسترجاع للصفحة. فيه صفحات ولا بتجيب سيرة النقطة دي، وتفتكري إن عادي لو وصلك المنتج على البيت وفتحتيه ومعجبكيش تقدري ترجعيه وتتحملي تمن الشحن بس، لكن اللي بيحصل مش كده، وتلاقي اللي ماسكين المشروع والصفحة بيتهربوا منك وبيعملولك “بلوك”، وتبقي موفرتيش، بالعكس، دفعتي فلوس في حاجة إما رديئة الخامات أو مش على مقاسك أو شكلها ملوش علاقة بالصورة، أو كويسة من كل النواحي بس مطلعتش ملائمة لشكل جسمك.
4- لو حصل إن حاجة عاجباكي جدًا والآراء على الصفحة هايلة، بس مفيش سياسة استبدال واسترجاع، يبقى في الخطوة دي لازم تتأكدي من مقاساتك كويس قوي وتاخديها بالمسطرة، عشان الحاجة تجيلك مظبوطة جدًا وترضيكي، وكمان عشان توفري تمن الترزي، لأن أحيانًا ممكن الحاجة تطلع كويسة جدًا بس محتاجة تتظبط أو تتقصر، وفوق الفلوس اللي دفعتيها وفلوس الشحن تحطي كمان فلوس الترزي، فبدل ما توفري تلاقي نفسك لسة بتحطي فلوس فوق الفلوس.
5- الأونلاين رخيص، بس رخيص عن رخيص بيفرق.. فيه حاجات أسعارها هتعجبك قوي بس القماش والتفصيل والتقفيل لأ، لازم تطلبي حقك في فتح “الأوردر” بتاعك ومعاينة الحاجة كويس جدًا قبل الدفع، ادخلي قيسي ودققي في الحاجة وخدي وقتك جدًا كأنك في محل بالظبط، ولو مندوب التوصيل قالك ممنوع تفتحي الأوردر قبل الدفع متستلميش المنتج، حتى لو نفسك فيه قوي، ورجعيه بيه، ومتتنازليش عن حقك أبدًا.
6- وإنتي بتطلبي “الأوردر” بتاعك، اتأكدي من شركة الشحن اللي بتتعامل معاها الصفحة أو الموقع، فيه شركات معروفة ولها تعريفات ثابتة لكل منطقة، لو حسيتي إن الأسعار مبالغ فيها ارجعي لشركة الشحن واتأكدي من تعريفة منطقتك. أما لو الصفحة بتتعامل مع حد خاص في التوصيل يبقى لازم تفاصلي في سعر الشحن لو لقيتيه مبالغ فيه عن اللي إنتي متعودة عليه. أسعار الشحن بتبقى ميزانية فوق الميزانية، تخليكي من الأساس تفكري في وسايل تانية غير الشحن للبيت، زي إنك تقابلي المندوب في أقرب محطة مترو أو في مكان وسط، واللي هتدفعيه في الشحن هتدفعيه أقل مواصلات أو بنزين، المهم اتفقي على يوم تكوني نازلة فيه مشاوير ويبقى ضربتي عصفورين بحجر واحد.
7- فيه مواقع شراء أونلاين شهيرة جدًا ولها سمعتها، وناس كتير اتعاملت معاها، بس بلاش الثقة الزيادة وإنتي بتتعاملي معاهم. هما بيكونوا مجرد وسيط عرض بينك وبين صاحب المنتج نفسه، الحاجة ممكن تكتشفي فيها عيوب وتدوخي عشان تعرفي ترجَّعي فلوسك، حتى مع كل الضمانات اللى هتقرأيها في سياسة البيع والشراء بإن حقك مش هيضيع. اتأكدي من التاجر نفسه على الموقع وشوفي آراء الناس اللي أخدوا منه حاجات قبل كده. ركزي مع العروض والخصومات اللي بيعملوها كل فترة، ممكن تشتري حاجات لقطة فعلاً .
8- احسبيها صح لو هتشتري من مواقع أونلاين من برة مصر، سعر الشحن بيكون أكبر من إنك تتحمليه لوحدك على قطعتين أو تلاتة بتفكري تشتريهم. اتأكدي الأول من سياسة الموقع وحقوقك وجمعي أوردر كبير مع مامتك وأخواتك وأصحابك. أوقات لو الأوردر تجاوز مبلغ معين الشحن بيكون مجانًا، أو على الأقل سعر الشحن هتقدروا توزعوه بينكم ومش هتحسي ساعتها إنك دفعتي كتير فيه.
9- متدفعيش فلوسك على أدوات تجميل وأحذية وشنط وهدوم داخلية أونلاين، إلا لو ضامنة كويس قوي اللي بتشتري منه، يُفضَّل إنك تجربي منتجات التجميل بنفسك عشان متدبسيش في درجات مش مناسبة لبشرتك، أو الألوان تطلع مختلفة خالص عن اللي في الصورة، أو ممكن توصلك منتجات قديمة. منتجات التجميل مبترجعش وفلوسك هتروح عليكي، كذلك الهدوم الداخلية مبترجعش، فيفضل إنك تنزلي بنفسك تشتريهم، أما بقى الشنط وأي منتجات جلود، دي بتبقى فاجعة وكارثة كونية، حاجة شكلها في منتهى الرخص وتقفيل سيئ وخامة الجلد رديئة. نصيحتي في منتجات الجلود بالذات إن الغالي تمنه فيه.. الشنطة اللي شايفاها أونلاين بـ200 جنيه مش هتعيش معاكي، أؤكدلك ده، وهتلاقي نفسك مضطرة تشتري واحدة تانية في وقت قليل، الفكر التوفيري بيقول شيلي الـ200 جنيه والشهر اللي بعده حطي 200 جنيه كمان عليهم وانزلي اشتري شنطة بـ400 جنيه.. غالية أيوة بس هتعيش وشكلها حلو جدًا وتمنها فيها فعلاً.
10 – افتكري كويس الجملة دي “the power of social media”. احتفظي بسكرين شوت لكل محادثاتك مع اللي بتشتري منه، اطلبي فاتورة مع المنتج واحتفظي بيها، واحتفظي كمان بإيصال الشحن وكيس الاستسلام. أي مشكلة هتقابلك أو حد ضحك عليكي أو فلوسك راحت عليكي صوَّري كل ده مع العيب اللي واضح في المنتج واحكي تجربتك واعملي “منشن” للصفحة، ونزليهم في كل الصفحات أو الجروبات اللي بتعرض النوع ده من المشاكل. متستهونيش وتقولي مش هعرف أرجّع حقي، السوشيال ميديا بقت قوة لا يستهان بيها، وبنسبة كبيرة بتجيب نتيجة، والشركة أو الصفحة بتستجيب عشان متخسرش متابعينها.
وأخيرًا.. فكري مرتين تلاتة قبل ما تاخدي قرار إنك تشتري أونلاين. هو سهل وأرخص والحاجة بتوصلك لحد بيتك، بس لازم تحددي أولوياتك كويس عشان متتحوليش لمدمنة شراء، وبدل ما توفري تكومي حاجات ملهاش لزوم، ومتبقيش ولا وفرتي ولا حاجة.. دبريها صح.
