عزة ابو الانوار
ديسمبر جانا وفرحنا به بعد غيابه.. أهلاً ديسمبر.
هل هلالك شهر مبارك، هل الشتا بأصوافه وإسكارفاته وبوتاته وآيس كاباته.
يعني الشياكة والفخامة والوقار بأبسط التفاصيل، وده بقى سهل نحققه لنفسنا ولبناتنا ببالطو شيك أو إسكارف مع شعر سايب، لكن واجهتني المشكلة لما خلّفت قبل الشتا بشهر واحد واتفاجئت إن مع دخول الشتا الشديد والبوتات والإسكارفات، كل اللي أقدر أعمله لبنتي إني أكلفتها ف بطانية وميبانش منها حاجة، ولا فيه فساتين ولا إسكارفات ولا هشبع م الحنية ولا هدوق الحلويات.. أومال أنا جايبة بنت ليه طيب؟
ده غير إني خفت أحتاس في اختيار اللبس المناسب، أتقّل إمتى وأخفف إمتى، واللي بيقولوا غلط ألبسها عشرتاشر حاجة واللي يقولوا لازم تلبس أكتر مننا بخمس طبقات.. طب أروح فين وآجي منين.
قعدت أذاكر وأقرا وأتفرج على صور، وكمان طلّعت كل اللبس بتاع بنوتي عشان أشوف ممكن نلبس إزاي، وإزاي نِظهِر شياكة النونة وف نفس الوقت تبقى متدفية كويس.
وكتبتلك قايمة ممكن تساعدك ف لبس بنوتك ف أول شتا ليها على وش الدنيا.
مبدئيًا اللبس الداخلي
اللبس الداخلي كله لازم يبقى قطن، ملوش علاقة صيف ولا شتا، واهتمي بجودته ونضافته أكتر من الخارجي، لأن ده الملامس لبشرة طفلك وأكتر حاجة ممكن تسبب حساسية.
هاتي فلنات نص كم وبكم حسب الجو في منطقتك، ولو مش متمكّنة من التعامل مع البيبيهات هاتي شايات لأنها أسهل في التعامل.
كمان ضروري البنطلونات الداخلية اللي شكل الكلسون لكن تكون قطن برضو مش صوف.
حاولي تكون الملابس الداخلية علامة الماركة بتاعتها كتابة مش بادج متخيط، يا إما تكون متخيطة من برة لأن حاجة بسيطة زي دي بتكون ملمسها سخيف بالنسبة لطفلك وتخليه مش مرتاح.
اللبس الخارجي
السالوبيت
أفضل شيء هو السالوبيت، لأنه مبيديش فرصة لدخول الهوا لجسم طفلك وبيكون مغطيه كله، كمان لو هتلبّسي بنتك فستان فشكل البنطلون مش هيكون لطيف تحته، ومش هتلاقي كولون مقاسها، فالأفضل نأجل مرحلة الفساتين دي شوية لحد ما الكولون ييجي مقاسها أو الصيف يدخل، ممكن تعوّضي الفساتين بالسالوبيتات اللي بتكون على هيئة فستان، يعني بيبقي سالوبيت عادي وشابك فيه طبقة تانية خفيفة بشكل فستان بحمالات، وده موجود كتير.
والأفضل اللي بيكون بكباسين من فوق لتحت عشان بيبقى سهل ف اللبس.
اللكلوك
أهم قطعة في ملابس الشتا، وطبعًا بتكون مميزة جدًا لو هاند ميد، فلو بتعرفي تشتغلي كروشيه أو تريكو اعملي لكاليك لبنوتك، هتبقى ذكرى جميلة ليها فيما بعد. ولأنك مش هتلاقي جزمة مقاس أقل من 3 أشهر، بالإضافة إن الجزمة بتقلل تحفيز الطفل لتحريك صوابع رجله.
الآيس كاب
الآيس كاب بيدي طلّة مميزة للبنات وبيظهر ملامحهم أكتر، كمان راس البيبي وودانه لو باردين بيفضل البيبي حاسس بالبرد مهما لبّستيه. وبرضو الهاند ميد بيكون ألطف من الجاهز حتى لو مش مصنوع بنفس التمكّن.
مشكلة الآيس كاب إنه كتير بيسبب البرد عشان ممكن يعرق راس البيبي ويبقى عرضة للبرد مع أي نسمة هوا، ولتفادي المشكلة لبّسي بنوتك الآيس كاب في الخروج بس، وتلبسه آخر حاجة قبل ما تخرجي من باب الشقة مباشرة، وأول ما ترجعي شيليه عن راسها واحدة واحدة.
الشرابات
ينفع تتلبس تحت اللكلوك إذا كانت فتحات الغرز واسعة، وينفع يكون بديل عنه، ويفضّل برضو الشرابات القطن عشان متؤذيش بشرتها أو تكون خشنة عليها، لكن لو بنوتك كثيرة الحركة الشرابات مبتكونش عملية أوي لأنها بتتخلع بسهولة.
الجوانتي
الطفل ممكن يبقى متدفي كويس أوي لكن إيده ساقعة جدًا، وده لأن أطراف الطفل سريعة التأثر، كمان الجوانتي ضروري صيف شتا وبتراعي الخامة حسب الجو، لأنه مش بس بيدفي أطراف الطفل ولكن بتحميه من إنه يخربش نفسه، يفضّل الجوانتي الفردتين يكون مشبوكين بحبل لتجنب فقدانه.
بورت بيبي
وده أثناء التواجد في أماكن مفتوحة، وهو عبارة عن بطانية بسوستة بتحطي الطفل جواها يكون متحاوط من جميع الجهات ما عدا وجهه، لكنه مش مناسب لو بتتحركي بالطفل في كرسي العربية أو عربية الطفل، ووقتها مفيش بديل للبطانية.
يا ريت تدوري على صورة يا فيفي
نصايح عامة
– السالوبيت اللي رجله مقفولة بلكلوك منه فيه بيكون ألطف وأكثر عملية لكن مشكلته إنه بيصغر بسرعة ولو صغر حاجة بسيطة مينفعش يتلبس تاني، غير إنه مش بيديكي الفرصة تفنني ف أشكال اللكاليك وألوانها.
– متجيبيش مقاس زيرو أبدًا لأنه بيتلبس أول 10 أيام من عمر البيبي وبعدين بيصغر، هاتي اللي مكتوب عليه من 0 لـ3.
– ألوان الشتا للأطفال مينفعش تكون غامقة زينا، لكن لو بتفضّلي الغوامق ممكن الفيروزي والأورانج والبيربل والفوشيا والكافيه. ولو لسه معرفتيش نوع الجنين هاتي ألوان محايدة تليق بناتي وولادي، زي الأبيض والأصفر والأخضر.
– البيبي حجمه صغير وبالتالي مش مناسب له كثرة الألوان، حاولي تكون كل أجزاء لبسه لونين اتنين بالكتير.
– الطفل مش بيتدفا بكتر طبقات الهدوم، الأفضل طبقات قليلة وتقيلة، عشان كمان يبقى حر الحركة، وتكملي الدفا بجاكيت أو بطانية أو بورت بيبي.
