بعد إذن اليخوت والشموع والجنتلة، يؤسفني أكسّر في الرموز والله، بس “مراد السويفي” شخصية نرجسية زي “عبد الله الروبي”، ولا عزاء ليَّ ولا ليكي ولكل بنات العالم، فيا ترى.. بنحب تاني ليه الشخصية النرجسية ؟
في سياق الحديث عن الإكس، صاحبتك بتشتكي، فإنتي بتقوليلها “يا بنتي ده واحد مريض نفسيًا”، فصاحبتكم الحقوقية بتقفش كده، لأن المرض النفسي مش شتيمة يا شباب، ودي ناس بتعاني. وده كلام يُحترم طبعًا، بس إلا الشخص النرجسي، هو أسعد مريض نفسي في العالم، ومرضه بيعذب اللي حواليه بس.
فقرة للي مشافوش المسلسل (فوتيها لو إنتي من متابعيه)
بطلتنا “غالية” متجوزة مخرج إعلانات كبير وعندهم بنت، وهو عايش عيشة الحرية والعزوبية والسهر والشرب، وشايفها تقليدية وإيقاعها ممل، فراكنها برة كل خروجاته وسهراته، ولا يعرف عنها حاجة علشان هو “عبد الله الروبي”، اللي مكانش له جواز أصلاً، وهي بتحمل اسمه وده شرف كافي. المهم في يوم عاكسها قدامه واحد، لأنها كانت لوحدها في بار وجوزها في وسط أصحابه، شاف جوزها المعاكسة ضربه وروَّح اتخانق معاها، وصحي تاني يوم قالها أنا مش سعيد وطلقها، وعدت سنة وهو سعيد بالطول والعرض، لحد ما ظهر في حياتها “مراد السويفي”، يعني يخوت يعني برفانات يعني طول بعرض وتسبيل ومطاردة وشموع، فتبدأ الخناقة على “غالية”.
يعني إيه الشخصية النرجسية
ناس كتير رابطة المعنى بالأنانية والغرور، وده صح، بس مش كل أناني ومغرور نرجسي، إنما كل نرجسي بيبقى أناني ومغرور وعليهم صفات تانية، وعشان تفهمي أكتر، الموقع الطبي healthline جامع صفات، لو اجتمع خمسة منهم في شخص، يبقى نقدر نقول عليه نرجسي أو NPD، الصفات دي هي:
– الشعور بالقيمة والأهمية بدون داعي، بيعامل نفسه على إنه شخصية عامة واسمه ده ماركة، جو أنا سعد الدالي كده، شخص ميتقالوش لأ وميتعاملش مع أي حد كده.
– تصور تخيلي لصفات استثنائية في نفسه، لنجاح أو شهرة أو جمال أو حنية.
– بيحس إنه مميز وفريد ومش أي حد ممكن يفهمه أو يقدَّر فنه، ومش هيعرف قيمته غير الناس المتعلمة قوي وأصحاب المناصب.
– بيحتاج اهتمام وتركيز مش عادي عشان يحس بحبك له، كل ثانية بتضيع من وقتك مع حد أو حاجة تانية هي تقصير في حقه.
– بيحس إن من حقه حاجات كتير قوي مش من حقه، الحاجات دي مع ناس تانية أو ملهوش سيطرة عليها، وبيحب كلامه يتنفذ.
– استغلالي لدرجة إنه بيحدد قيمة الأشخاص في حياته بفايدتهم له.
– مبيعرفش يتعاطف مع الناس ولا بيحس بمشاكل غيره.
– متعجرف وبيتمنظر على الناس الغريبة ويتباهى قدامهم باللي معاه.
“عبد الله الروبي” كان مثال للإنسان اللي بيعاني من اضطراب الشخصية النرجسية، في سنه اللي مش راضي يعترف بيه، في اللغة اللي بيستعملها وهو بيوصف الناس القريبين منه، في الطريقة اللي كان بيقلل بيها من شغل وموهبة مراته، حتى لما كان بيحاول يلمح إنه عايز يرجعلها، وقالها “بيتي ناقصة ست”، أنانية وعجرفة وإهمال لكل اللي حواليه، وندرة الكلمة الحلوة، واحتياج مستمر للفشخرة بنفسه وفرض سيطرته، بس المخيف فعلاً، هو نوع النرجسيين اللي زي “مراد السويفي”، اللي مفيش بنت متتمناش لنفسها حد يعاملها كده.
إستراتيجية الشخصية النرجسية
الشخصيات النرجسية عندها نمط سلوكي بيسموه العلماء -حرفيًا- قنبلة مشاعر، هدايا وكلام حلو ومفاجآت وحب حب حب، وبسرعة جدًا ويمكن من أول مرة يقابلك، عشان هو مينفعش يترفض ومش هيقبل يفشل في تعلقك به، وإلا كنا هنقع فيهم إزاي بعد قائمة العيوب المطوَلة دي؟ الدخلة الهندي الخيالية دي بتبقى الطُّعم اللي بيشدك بيه للعالم بتاعه، ومبيبتديش يظهر في عيوبه غير لما تكوني وقعتي واتضمنتي وأعلنتي حبك.
أول علامة هتلاحظيها على النرجسي إنك دايمًا معاه مستمعة والحوار من طرف واحد، مبيبطلش كلام عن نفسه وإنجازاته، عن هو مين وشاطر قد إيه، وعن مشاكله وعن صراعاته وإزاي هو دايمًا صح ومظلوم. النرجسي كمان مبيركزش في اللي إنتي بتحكيه، وأوقات كتير مش بيتفاعل مع كلامك ولا بيسألك عن التفاصيل أو بيرجع يتابع مشكلتك، يا إما بيديكي مثال على نفسه ويقلب الكلام عليه تاني، يا إما بيستناكي تخلصي ويديكي أقل رد فعل ممكن.
من أشهر المواقف النرجسية جدًا إللي “مراد” عملها
– إنه في ثانية حطها في اختيار يا هو يا شغلها، من غير ما يفكر في سمعتها ولا محتاجة فلوس ولا لأ، ولا مشاعرها هتبقى إيه.
– قلب في ثانية واحد تاني وزعق وطلع منه سلوك بشع مختلف تمامًا عن الشخص الساحر الحالم اللي هو مصدَّره.
– عمره ما اعترف بالغلط، ودايمًا بيلعب بالمصطلحات ويقول “أنا اتصرفت غلط” بس إنتي اللي وصلتيني لكده.
– محسش بأي تعاطف مع “عبد الله” وهو عارف بكل تفاصيل حالته، وقرر إنه يواجهه بتفاصيل الطلاق واللي ناسيه، لمجرد إنه يطلعه من حياتهم ويرتاح من الوضع اللي هو فيه، وممشيش إلا لما أغمى عليه.
– دايمًا ضاغط على “غالية” ومحسسها بالتقصير وبالإهمال فيه، وخلاها نسخة خايفة طول الوقت، لا حد يسلم عليها ولا حد يكلمها ولا يسمع صوت أي حاجة جنبها، وبتبقى شايلة هم إزاي تقوله ولا هيعمل إيه أكتر من هم المصيبة نفسها.
– “أنا مراد السويفي مالك الفندق”، “إنتي على يخت يا ماما”، “أنا حاجز المكان كله عشان نعرف نتكلم”، “مراد” طول الوقت بيستعرض بفلوسه وهو مين وابن مين ومعاه كام.
نيجي لسؤال الحلقة: بنحب تاني ليه شخصية نرجسية من نفس نوع الأولانية؟
– “غالية” وحيدة ملهاش إخوات، وده بيخليها مسؤولة ومضحية وحنونة وعندها علاقات قوية، يعني هتقدم كل حاجة للشخص النرجسي اللي عايز اهتمام مش عادي.
– كمان هي فنانة وجميلة ومميزة وخفيفة الدم، وبتشكل الشريك اللامع والمميز اللي النرجسي بيختاره لنفسه.
– بنت طلاق، وأبناء الأسر المفككة بيحبوا ناس محتاجين لهم، وعايزين اللي يقف جنبهم ويغير فيهم.
تعملي إيه لو مرتبطة بشخص نرجسي؟
اجري.
وده مش كلامي، دي نصايح business insider والله. العلماء بيقولوا إنها علاقة مرهقة واستنزافية ودايمًا هتحسي فيها بالذنب والقلق، وهتضطري تضحي وتتغيري وتنسي شخصيتك المستقلة، وفوق كل ده، احتمال كبير قوي يزهق منك ويسيبك فجأة زي ما عمل “عبد الله”.
اقرأ أيضًا: ونحب تاني ليه؟
