مبدئيًا لأن لبس الشتا كتير وتفاصيله أكتر، وبالتالي اختياراتك في الخامة واللون بتكون متوسعة بشكل كبير. لكن لو مش هتقدري تجيبي أكتر من قطعة من بعض الأنواع، فإنتي ممكن تكتفي بيها، بشرط إن لونها يكون حيادي (أسود- رمادي- بيج).
الآيس كاب
في مصر نسبة المحجبات كبيرة، وده بيخلي قليلين اللي بيلجؤوا للبس الآيس كاب، فبينصح بلبسه لغير المحجبات، أولاً هو موضة جدًا وله أشكال كتيرة مختلفة، وثانيًا لأنه فعلاً بيحمي الدماغ من التجمد في البرد.
السكارف
محجبة أو لأ، السكارف لا غنى عنه في الشتا، وفيه منه الصوف والقماش والقصير والطويل، دي بترجع لاختيارك الشخصي، ومتنسيش إن السكارف الواحد ممكن يتلبس بأكتر من طريقة اتعلميها . أضغط هنا
الجوانتي
إحنا في مصر مش متعودين على لبس الجوانتيات، رغم إن فيه ناس كتيرة إيديها بتتجمد في الشتا، كالعادة له خامات كتيرة سواء صوف أو جلد، بس لازم تقيسيه قبل ما تشتريه عشان تتأكدي إنه مقاسك وإنك مستريحة فيه، عيبه الوحيد هو إنك مبتعرفيش تتحكمي في صوابعك وإنتي لابساه، فبيبقى صعب إنك تتعاملي بالفلوس أو إنك تمسكي قلم أو تتعاملي مع الموبايل التاتش، وعشان كده عملوا الجوانتي اللي من غير أطراف الصوابع.
البالطو
ده أتقل حاجة في طبقات الملابس، وبيكون دايمًا هو الطبقة الأخيرة، بيتلبس بس برة البيت أو outdoors، يعني في مكان إنتي معرّضة فيه للهوا والبرد، وبالتالي لازم تكوني لابسة تحته ما يكفي من الطبقات اللي تخليكي دافية جوة المباني. ولأن البالطو غالي واستخدامه مش هيكون كتير، فممكن تكتفي بقطعة واحدة بس منه.
البلوفر والكارديجان والبلازير
هم التلاتة بيمثلوا نفس الترتيب في طبقات ملابسك، يعني مش هينفع تلبسي بلوفر وعليه كارديجان أو بلازير. الفرق بينهم هو إن البلوفر بيكون مقفول تمامًا من قدام، بينما الكارديجان والبلازير بيكونوا مفتوحين مع إمكانية وجود سوستة أو زراير، أما الفرق بينهم هم الاتنين فهو إن الكارديجان كاجوال أكتر بينما البلازير بيكون أشبه بالفورمال. في جميع الأحوال لازم بيتلبس تحتهم طبقة ملابس أو أكتر ويُفضّل إنها تكون قطنية.
البنطلون والجيبة
في مثل هذه الظروف التي تمر بها البلاد، يفضل طبعًا إنه يكون بنطلون جينز أو قطيفة أو خامة قماش تقيلة، وده تفاديًا لصورايخ الهوا اللي بتاخدنا على خوانة. لكن لو كنتي مصممة على لبس الجيبة، يبقى ممكن ساعتها تلبسي تحتها بنطلون ليجين قطن، هيخليكي دافية ويحافظ على جلدك، وفي نفس الوقت مش هيضايقك في الحركة ولا هيبان من برة.
اقرئي أيضًا: القميص الأبيض ينفع مع البنطلون الأسود
البوت
فيه موضة طالعة بقالها كام سنة، وهي السخرية من البنات اللي بتلبس بوت في الشتا لأن البوت مخصص أصلاً للبلاد اللي فيها تلج. الاستنصاح ده غلط تمامًا، في الشتا مفضّل دايمًا إنك تحاولي تغطي جسمك على أد ما تقدري، وقدمك دي من بقية جسمك، واللي لازم تتدفا كويس عشان تقدر تشيلك وتتحرك بيكي.
البوت حل مثالي للدفا ده، وبيزيد عليه ميزة في شواعنا في مصر وهو إنه بيحمي رجلك من إنها تتعرض لطينة الشتا ومياه المطر المتبقية في الشارع، عشان كده حاولي وإنتي بتشتريه إنك تجيبيه خامة سهلة التنضيف، ولو متعودة على لبس الكعب العالي في الصيف حاولي تتجنبي ده في الشتا، لأنك مش بتكوني شايفة الرصيف أصلاً، ولو لا بد من كده يبقى حاولي تجيبيه بكعب متصل.
أما في حالة لو مكنتيش بتحبي البوت فالكوتشي والكونفرس همّ أحسن بديل، مريح وسهل في الاستعمال وله أشكال متنوعة وكتيرة تناسب الأذواق كلها.
الكاب والشال
لو إنتي في العشرينات أو أوائل التلاتينات يبقى من المستحسن إنك تبعدي عنهم، لأنهم بيزوّدوا على عمرك الشكلي عدد سنين مش قليل، وحلاً للمشكلة دي فيه بعض المصانع عملت كاب فيه شبه كبير من البالطو، ده أنسب لسنك ومرحلتك العمرية. أما بالنسبة للكاب والشال المصنوعين غالبًا من التريكو أو الكروشيه فبيناسبوا أكتر الفئة العمرية الأكبر من 35 سنة، وبيبقوا شكلهم شيك جدًا.
لبس البيت
طبعًا ما ننساش لبسنا في البيت، أهم حاجة في لبس البيت إنه يكون مريح ومش مقيد في الحركة، وعلشان كده برضه بيفضل لبس طبقة أو طبقتين بالكتير، وخلي بالك ما تلبسيش حاجات نازلة بشراشيب أو كمها أطول من اللازم لو بتقفي كتير في المطبخ. وأكيد أهم حاجة مع سيراميك الشقة هو اللكلوك، وده له أكتر من نوع، فيه نوع شبه الشراب وبيتلبس مع الشبشب عادي وممكن تلبسي بداله شراب تخين، أو لكلوك شبه الشبشب بس بيبقى فرو أو فطيفة أو صوف، أو لكلوك شبه البوت وتخين و بيبقى فيه من تحت قطع سليكون او مطاط بحيث إنه يلزق في الأرض وما تتزحلقيش. بس خلي بالك في كل الأحوال ماتناميش بيه، علشان السخونة الزايدة في القدم وقت النوم بتسبب أمراض كتيرة.
لإننا في الشتا بنحب نتدفى وفي نفس الوقت مش بنحب إن حجمنا يكون مضروب في 3، حاولي دايما تلبسي عدد طبقات قليلة، وتجنبي لبس طبقات من الملابس القطنية واستبدليها بطبقة واحدة من الصوف أو الكشمير، بحيث تخليكي دافية جوة المباني، وابقي البسي فوقها طبقة واحدة برة البيت سواء كانت بالطو أو كاب. من أهم النصايح اللي كتير مش بياخدوا بالهم منها، هي إن اللبس يكون ع المقاس مظبوط مش نمرة أضيق ولا نمرة أوسع، وبالنسبة للمقاسات الكبيرة، تجنبي قد ما تقدري لبس الملابس المخططة بالعرض، وكمان تجبني لبس الشال والكاب والبلوفرات الصوف المصنوعة بفتلة تخينة سواء كان يدوي أو آلي.
الشتا عامة بيحب الغوامق زي الأسود والبني المحروق والنبيتي والموف الغامق والزيتي، لأنهم بيدّوا إحساس بالدفا، لكن متخليش الإحساس ده يسرقك وتلاقي دولابك بقى كله غامق، حاولي دايمًا تخلي قطعة واحدة على الأقل لونها مزهزه ومنوّر في الطقم اللي هتخرجي بيه من البيت، زي الأبيض أو الأحمر أو الأزرق أو البرتقالي.
