الأزمة الاقتصادية الأخيرة وتوحش الأسعار وانخفاض قيمة العملةكلها حاجات قلبت موازين بيوت كتير، وخلتنا بنلف حوالين نفسنا واحنا بنحاول (ندبق) الميزانية. بندور على بدايل سعرها أقل، وبنفكر بدل المرة تلاتة قبل مانشتري أي حاجة جديدة. كتير مننا استغنى عن رفاهيات كتير والأسوأ ان في اللي اضطر يستغنى عن أساسيات كمان.
قبل كدة كنت بصرف من غير تفكير ومن غير حسابات لكن دلوقت ده ما بقاش ينفع. بقينا محتاجين نعرف راسنا من رجلينا. مش بس نعرف الفلوس بتتصرف فين لكن كمان نفهم بنصرف قد ايه في كل بند، إيه اللي ممكن نستغنى عنه ؟ وإيه اللي نقدر نبدله؟ وهل ممكن فعلا في ظروف زي دي نقدر ندخر؟
من أشهر الطرق في عمل الميزانيات ميزانية 50/30/20
قبل ما نبتدي:
الطريقة دي بتعتمد بشكل أساسي على فهم الفرق بين الحاجات اللي انتي محتاجاها(الأساسية) والحاجات اللي انتي عايزاها (الاختيارية) واللي للأسف بقى في خلط بينهم في أذهاننا.
أشهر مثال على الفرق بينهم هو مثال العيش والآيس كريم. العيش احتياجات أساسية بينما الآيس كريم ممكن نكون عايزينه أوي لكن ممكن نستغنى عنه(اختياري).
محتاجين كمان نعرف احنا بنصرف كام في إيه. قبل ما تبتدي لازم تسجلي لشهرواحد على الأقل كل قرش بتصرفيه. استخدمي الطريقة اللي تحبيها سواء الورقة والقلم أو شيت اكسل أو تطبيقات الموبايل.بحيث يبقى معاكي سجل في نهاية الشهر واضح فيه صرفتي كام في كل بند على مدار شهر أو أكتر.
الخطوة الأولى:
احسبي دخلك الصافي:
لو موظفة الموضوع بيبقى أسهل دخلك هو صافي المرتب بعد خصم الضرايب والتأمينات. لو أعمال حرة هتحتاجي تعملي شوية حسابات عشان تعرفي إجمالي الدخل ناقص تكاليف العمل( مثلا تكاليف الخامات والعمالة والكهربا..إلخ).
الخطوة التانية:
حددي احتياجاتك الأساسية بحيث ماتزيدش عن 50 % من صافي الدخل:
زي ما وضحنا الاحتياجات هي الأمور اللي ما ينفعش نستغنى عنها زي مثلا: إيجار البيت، الكهربا والغاز، الأدوية المزمنة، الأكل والشرب والمواصلات.
ارجعي لسجل مصروفاتك وشوفي إجمالي مصروفاتك في البنود دي المفروض ماتزيدش عن 50 % من صافي دخلك.
الخطوة التالتة:
حددي الحاجات اللي انتي عايزاها(الاختيارية) بحيث ما تزيدش عن 30 %:
للوهلة الأولى 30 % تبان نسبة كبيرة وهنتشهيص بقى، بس لو فكرتي في الفرق اللي شرحناه بين المصاريف الأساسية والاختيارية هتلاقي حاجات كتير كنتي فاكراها مصاريف أساسية هتدخل تحت بند المصاريف الفرعية (يعني الكاتشاب مثلا رغم انه أكل لكن هيدخل تحت بند المصاريف الاختيارية مش الأساسية) وطبعا بيدخل فيه الفسح والخروجات، ومصاريف اللبس الزايد عن الاحتياجات الأساسية.
الخطوة الرابعة:
20 % للإدخار:
هيتبقى من إجمالي الدخل 20 %. دول للإدخار، والإدخار ده يدخل تحته الجمعيات مثلا. ضروري جدا تدخري جزء من دخلك الشهري سواء للطواريء لا قدر الله أو عشان تشتري حاجة بمبلغ كبير وكمان للشعور بأمان مادي.
أهم حاجة في الطريقة دي انها بتساعدك على التفرقة بين مصروفاتك الأساسية والاختيارية وبتلفت نظرك لحاجات كتير ممكن تستغني عنها أو تقننيها.كمان بتساعدك في وضع إطار واضح لمصروفاتك وفهمهها مع وجود نسبة مدخرات معقولة.
المصادر:
2https://blog.mint.com/saving/the-minimalist-guide-to-budgeting-in-your-20s-072016/
