كاميليا
عادةً الحمل الأول بيكون مصحوب بالكثير من عمليات التسوق والشراء، ملابس للمولود وألعاب ومستلزمات العناية بالبشرة والشعر،
بالإضافة لتجهيز غرفة المولود الجديد من كل شيء، بداية من سرير الطفل، لشنطة الخروج، وصولاً للكرسي الهزاز والمشاية والألعاب
الصوتية والحركية.. بالإضاقة لكل ما سبق لا ننسى قائمة الهدايا اللي بتتقدم للأم والطفل الأول بعد الولادة.
وعلى عكس ما يبدو ده مكلف ومرهق ماديًا مع الطفل الأول، إلا إن فايدته ونتائجه بتبان جدًا في التوفير مع الطفل الثاني، خاصًة لو فرق
السن في حدود الـ3 سنوات أو أقل، فبتكون أغلب المشتروات حالتها جيدة وصالحة للاستخدام مع الطفل الثاني، اللي يا حبذا لو كان من
نفس نوع الطفل الأول.
إذا كنتي حامل وفي انتظار طفلك الثاني، أولاً ألف مبروك، وثانيًا اعرفي إزاي توفري مصاريف الشراء والتجهيزات في ظل غلاء
أسعار منتجات ومستلزمات الأطفال حاليًا.
بند الملابس: قبل رحلة الشراء لملابس جديدة، افرزي ملابس طفلك الأول، تحديدًا السالوبيتات والملابس الخاصة بحديثي الولادة وأول 3
شهور، هتلاقي ملابس كتير حالتها جيدة، وممكن يكون فيه ملابس بالتكيت لم تستخدم أصلاً، لأن الأطفال في السن ده بيكبروا بسرعة
جدًا. اغسليها وعقميها واستخدميها لطفلك الثاني، وبالتالي هتوفري بند شراء الملابس الداخلية وسالوبيتات البيت، أو على الأقل هتشتري
قطعتين تلاتة فقط للضرورة.
نفس الأمر مع ملابس الخروج، أول 3 شهور طفلك مش بيخرج كتير، وعادة بيكون ملفوف في بطانية أو غطا خفيف، بالتالي ممكن
تشتري طقم أو اتنين سالوبيت خروج مقاس 3 شهور، واستعيني بملابس طفلك الأول للتغيير. نفس الأمر مع شرابات الطفل ولفّات
الخروج والبافيتات وما شابهها.
بند الببرونات: طبعًا لأنك مش هتستخدمي ببرونات طفلك الأول اللي أكيد ذهبت مع الريح، فبننصحك تشتري فقط تتينة و2 ببرونة
مقاسات مختلفة، أولاً لأنك مش هتحتاجي أكثر من 2 ببرونة في أول مرحلة، سواء كان طفلك بيرضع طبيعي أو صناعي، وثانيًا لأن
طفلك ممكن يرضع طبيعي فقط وميحتاجش أكتر من ببرونة واحدة للأعشاب أو المياه بعد 6 شهور، وبالتالي استني لما تشوفي احتياج
طفلك هيكون إيه. نفس الأمر بالنسبة للتتينة أو اللهاية.
بند مستلزمات الطفل: ابدأي نظفي واغسلي مستلزمات طفلك الأول، زي عربية الخروج والكرسي الهزاز وسرير الأطفال، والبوسيت
وشنطة الخروج وكوفر الرضاعة وغيرها، أما لو كانت اتكسرت أو باظت أو ضاعت لأي سبب فبننصحك تشتريها مستعملة نظيف من
أسواق الإنترنت، هتكون بنصف الثمن أو أقل، وده مناسب لفترة استخدامها اللي مش هتتعدى شهور قليلة. أو ممكن تستعيريها من
إخواتك، أقاربك أو أصحابك.
منتجات العناية بالبشرة: اشتري في البداية عينات للتجربة، وتجنبي الحاجات غير العملية زي برفيوم الطفل، يعني اشتري نوع صغير
من شامبو الشعر، وكذلك عبوة من حفاضات الأطفال ولوشن الجسم، اختبريهم في أول فترة مع بشرة طفلك، لو مناسبين كملي، ولو لأ
ابدأي في تجربة عينات جديدة، بدون ما تدفعي فلوس كتير ومتستخدميش المنتجات. واستغلي الزيوت الطبيعية للعناية بمنطقة الحفاض،
زي زيت جوز الهند وزيت الزيتون، للتوفير في شراء كريم التهابات الحفاض.
رتبي أولوياتك: أثناء عملية الشراء التزمي بورقة مكتوب فيها النواقص الضرورية فقط، عشان متقعيش في فخ العروض والملابس
الجميلة المبهرة للرضع، اللي كلنا عارفين إنها مش بتتلبس أكتر من مرّة أو مرتين.
نوع المولود: إذا كان نوع المولود مختلف عن طفلك الأول، فمش هتحتاجي ملابس مختلفة أول 4 شهور من عمر طفلك على الأقل،
لذلك أجِّلي شراء الملابس في البداية لحد ما تشوفي طفلك ووزنه وجسمه، واشتري الأساسيات فقط، أو استخدميها من ملابس الطفل
الأول.
الأحذية وملابس الخروج: أجلي شراء الأحذية أول سنة من عُمر طفلك، ده اللي عرفته بالتجربة، الطفل بيحتاج شرابات فقط أول فترة
عشان نمو رجله، ومش بيحتاج أحذية في البيت في مرحلة محاولة المشي، عشان الأرجل الحافية بتساعده يوزن نفسه ويحس بالأرض
ويتحرك، فبالتالي أي مصاريف للأحذية أول سنة هي مجرد ديكور فقط بفلوس كتير. بالنسبة لملابس الخروج في الشتاء، ممكن جاكيت
واحد تقيل وسويت شيرت فقط للخروجات الضرورية.
استغلي التخفيضات: فترة حملك 9 شهور هيعدي عليكي فيها تخفيضات للصيفي والشتوي، استغلي فترة التخفيضات في شراء أي حاجة
من مستلزمات طفلك، واختاري النوع والخامة الجيدة بغض النظر عن هي ماركة معروفة أو لأ.. اختاري الأنسب مش الأشهر. والأفضل
تشتري من مكان مجمع لمختلف الماركات علشان تقارني السعر والخامة كويس.
حددي قائمة هدايا: مش عيب إننا نحدد قائمة هدايا لبعد الولادة نكتب فيها احتياجتنا الحقيقية، ونشاركها مع قرايبنا وأصحابنا اللي هييجوا
يباركوا ويهنوا بالمولود، بدل المبالغ المادية والهدايا غير العملية، اكتبي قائمة بكل احتياجاتك وأسعارها، وممكن أكتر من شخص يشترك
في الهدية الواحدة.
وأخيرًا.. مبروك، تقومي بالسلامة وتفرحي بالطفل الجميل، اللي هتتفاجئي بخبرتك الشخصية معاه، وإن حتى لعب الأطفال بتاعته
هيشاركها مع طفلك الأول.. وبكده تصبح احتياجات الطفل الثاني موفرة جدًا واقتصادية لأبعد الحدود.
