13 تطبيق لأندرويد هيخلوا حياتك أسهل

563

1-Baby care 

 

بيبي كير هو إيدي ورجلي من وقت الولادة، التطبيق ده بيساعدك تسجلي الوزن والطول ومحيط الرأس للطفل من أول الولادة وفي كل زيارة للطبيب، وبيوضحلك من خلال رسم بياني تطور نمو طفلك ومدى تناسبه مع متوسط المعدلات الطبيعية. كمان بيساعدك على تسجيل الأنشطة الحيوية للرضيع، زي الرضاعة سواء طبيعية أو صناعية والأطعمة الصلبة لما البيبي يكبر شوية والحفاضات والتسنين والنظافة والتطعيمات ومواعيد الأدوية. بحيث يبقى عندك تقرير أسبوعي بيوضح كل المعلومات اللي ممكن تحتاجيها أو يحتاجها طبيب الأطفال، وكمان ممكن تستخدميه لأكتر من طفل. وممكن تستخدمي المنبهات المتعددة اللي فيه للتنبيه بمواعيد الرضاعة أو الأدوية وغيرهم من احتياجات الطفل.

 

2- Period calendar

 

التطبيق ده بيساعدك على تتبع الدورة الشهرية وحساب أيام التبويض، وبيساعدك على تسجيل وزنك ودرجة حرارتك والأعراض الجسدية والنفسية المختلفة اللي بتتعرضي ليها كل شهر.

 

3- Fly helper

 

ده التطبيق الخاص بموقع Fly helper، وده أشبه ببرنامج متكامل بيساعدك على تنظيم الأعمال المنزلية وتنظيم وقتك، من خلال تقسيم المهام لمهام أصغر وتقسيم كل جزء في البيت لمجموعة من المهام، والحقيقة إنه سهّل عليّ جدًا تنظيم شغل البيت.

 

4- Ladies home workout

 

تطبيق بيساعدك على عمل التمرينات في البيت بسهولة، من خلال مجموعة تمرينات، وكل تمرين له فيديو بتتابعي معاه التمرين، هيساعدك جدًا على تنشيط جسمك والحفاظ على لياقتك.

كمان هتلاقي مع التطبيق لينكات لتحميل تطبيقات تانية مشابهة بس كل واحد منهم بيركز على جزء معين في الجسم.

 

5- Ladies office workout

 

التطبيق ده أخو التطبيق اللي فوق، لو إنتي بتقعدي فترة طويلة على مكتب في شغلك التطبيق ده هيساعدك من خلال تمرينات بسيطة ممكن تعملي أغلبها وإنتي قاعدة على الكرسي أو واقفة في مكانك، بحيث تتجنبي قدر الإمكان الأضرار الجانبية للجلوس فترات طويلة على المكتب.

 

6- My baby today

 

التطبيق الخاص بالموقع الشهير Baby center واللي هيساعدك على متابعة تطور طفلك واحتياجاته ويجاوب على أغلب أسئلتك سواء الخاصة بيكي أو بطفلك.

 

7- Spendee

 

تطبيق هيساعدك على متابعة دخلك الشهري ومصاريفك الشهرية، ومن السهل إنك تغيري فيه حسب احتياجاتك، أنا جربت تطبيقات كتير للميزانية وده كان الأسهل والأبسط بالنسبة لي.

 

8- Blue light filter

 

التطبيق ده بيخفف من الضوء الأزرق في شاشة الموبايل وبيعدل ألوانها عشان يقلل الضغط اللي بيسببه طول فترة استخدام الموبايل على العين، وبالتالي عينك ترتاح أكتر وتنامي بشكل أفضل.

 

9- Out of milk

 

تطبيق بيساعدك على إعداد قايمة مشتروات لاحتياجات البيت ويفكرك بالحاجات اللي ناقصاكي.

مفيد لو إنتي زيي بتروحي السوبر ماركت تتنّحي وتحاولي تفتكري إيه اللي ناقصك ومتعرفيش.

 

10- Easy taxi

 

التطبيق ده بيساعدك تطلبي تاكسي في المكان اللي إنتي فيه من التاكسيات المشاركة في الخدمة، وبيبعتلك اسم ورقم التاكسي، مفيد وآمن وبيجنبك عطلة الوقفة والانتظار، بيحتاج موبايل متصل بالإنترنت، جربته في مصر والسعودية وأعتقد إنه شغال في أغلب الدول العربية.

 

11- Duolingo

 

برنامج هيساعدك على تعلم اللغات المختلفة بطريقة مبسطة، أنا كنت بستخدمه ساعات في المواصلات، وفي الأوقات الفاضية، ده طبعًا لو مش مخصصة وقت بعينه لتعلم اللغة.

 

12- Allrecipes dinner spinner

 

آلاف الوصفات اللي بتساعدك على عمل كل الأكلات اللي نفسك فيها من الموقع الشهير Allrecipes.

 

13- Water your body

 

بتنسي تشربي مية؟ التطبيق ده هيساعدك ويفكرك، كل اللي محتاجاه إنك تدخّلي وزنك في البداية وتسجلي كل مرة تشربي فيها، هيساعدك من خلال رسوم توضيحية وتذكيرات بعدد أكواب المية والكميات اللي جسمك محتاجها.

المقالة السابقةعملية فصل
المقالة القادمةالموت والصدمة والاشتياق

ترك الرد

الرجاء إدخال تعليقك!
الرجاء إدخال اسمك هنا