10 طرق لتحويل مشاكل الديكور للوحة فنية

1324

يتي كأي بيت مصري، مليان بحاجات مش عايزاها تظهر، وحاجات متضايقة من شكلها بس لازم تفضل موجودة، وحاجات شكلها تقليدي لدرجة تجيب إحباط. في أثناء بحثي على الإنترنت إني ألاقي أفكار لحل مشكلة واحدة، اكتشفت إن مش بس البيوت المصرية اللي بتعاني من المشاكل دي، ولقيت بالصدفة حلول لمشاكل تانية، حلول فوجئت بيها وببساطتها. جبت منها النهارده حاجات ينفع يتم تطبيقها في بيوتنا، واللي أنا فعلاً نويت إني أحل بيها مشاكلي في البيت.

 

1- أول المشاكل وأشهرها هي كابل الراوتر، ودي مشكلة أنا شخصيًا عانيت منها ولسه بعاني، مشيته ع الحيطة وعلقته في السقف ومعرفتش أعمل إيه في بقية الكابل، هنا لقيت الحل الفني العظيم، وهي إني أحوّل الكابل للوحة ع الحيطة. دي أول الأفكار اللي ناوية أطبقها، بس لازم اللوحة تكون متحددة بدقة، عشان هيتم تعليق الكابل بمسامير وبالتالي هتعمل فتحات في الحيطة، والخطأ فيها بيبقى شكله مش ظريف.

 

2- خلصنا من كابل الراوتر.. يتبقى الراوتر، اللي يمكن يتحول من ببساطة لديكور كتاب قديم وشيك. ببساطة اشتري كتاب يكون شكله قديم من سور الأزبكية، بعناية افصلي الكتاب عن التغليف، وحطيه يداري الراوتر اللي متضايقة منه.

تعرفي على: 4 خطوات لدهان الشقة بنفسك

3- لسه مخلصناش من الأسلاك، طبيعة الحياة الجديدة بتاعتنا بقت مليانة بالأسلاك والكابلات، ده حل لطيف جدًا للكابلات القصيرة اللي بنحتاجها من وقت للتاني.

 

4- عن نفسي بشوف إن مفارش الغسالات الكهربا في مصر، مفيهاش إبداع وشكلها روتيني وممل، غير إنها غالبًا مش بتكون لها علاقة بديكور الحمام، الحل ده كويس جدًا، بلفة شيكارتون بتاعت الأسلاك الكهربا تقدري تجددي في شكل غسالتك بالشكل اللي إنتي تشوفيه ملائم للمكان اللي هي فيه، ده غير إنه بقى فيه منه مختلف الألوان، ده حتى كمان بقى بيتباع مخطط منه فيه.

 

5- في أوروبا والدول المتقدمة، ممكن يستغلوا زرار النور نفسه في إنهم يذكّروا أولادهم إنهم يطفوا نور الأوضة وهم خارجين، إحنا عندنا بديل شعبي للحكاية دي وهي إن الأب بيمشي يقفّل الأنوار بنفسه ويقول “الفاتورة حرام عليكو”. لو زهقتوا من حلولنا الشعبية، ممكن نقتبس من الغرب في إننا نخلي زرار النور نفسه يفكر الولاد إنهم يطفوه.

 

6- بمناسبة زرار النور.. فيه ناس بدل ما تبروزه زيادة، بتملا الدنيا حواليه ببراويز، عن نفسي أُعجبت بالفكرة جدًا، إنك تخلي الزرار جزء أصيل ومتماشي جدًا مع ديكور الحيطة، الفكرة دي تنفع أوي في الصالون والسفرة.

 

7- وأنا في بيت أهلي كانت أبواب الأوض لونها أبيض سادة، ده كان شيء مستفز جدًا، لزقنا على الباب كل أنواع الاستيكر الممكنة عشان تكسر روتينيته. الأجانب قالوا حل ألطف بكتير، هو إننا نلون الأجزاء البارزة/ الداخلة من الباب، هيكسر روتينية الأبواب، ويبقى تجديد غير مكلف في ديكور الشقة.

ملحوظة: تقدروا تعملوا كده كمان في باب الشقة شخصيًا.

 

8- كالعادة، أنا مش بحب شكل الحاجات التقليدية، بيخلينا نسخ متشابهة من بعضنا، وعشان كده على سبيل المثال التلاجة عندي صعب إننا نشوفها من كتر اللعب المغناطيسية اللي عليها. وكالعادة برضو لقيت عند الأجانب حلول تانية للحكاية دي بتتمحور حول إنك تخلي التلاجة جزء من الديكور. أولاً هتحتاجي إنك تفكي المقابض، وبعدين إما تلزقي ورق حائط على التلاجة، أو إنك تدهنيها بدهان السبورة، وبعد كده أعيدي تركيب المقابض. كاتبة الموضوع عن نفسها شايفة إن حل دهان السبورة ألطف بكتير، لأنه بيتيح فرصة لتغيير المكتوب بشكل دائم.

 

9- كأي بيت مصري صميم، صندوق الكهربا اللي بتتجمع فيه أسلاك الشقة كلها، اللي له غطا مربع الشكل قبيح المنظر، شكله بيضايقني جدًا ونفسي أخلص منه. في أثناء بحثي على حل للمشكلة دي، لقت مشكلة شبيهة عند الأجانب، وهي إنك تغطي الصندوق ببرواز جميل سهل الفتح، تلاقي تحته غطا صندوق الأسلاك. 

 

10- ده حل ملوش صورة لأنه من ابتكاري، استوحيته من أفكار الأجانب ولسه منفذتوش.. أغلب البيوت المصرية فيها حيطة دهانها واقع بسبب المياه اللي جوة الحيطة وعاملة رطوبة، دي مشكلة أزلية سخيفة الشكل موجودة في بيوت كتيرة. عندي في البيت موجودة بشكل مبالغ فيه لأنها واكلة حوالي نصف ارتفاع حيطة الطُرقة، كتير اقترحوا عليّ أخبيها بالسيراميك وده كان حل غير مقبول على الإطلاق بالنسبة ليّ. اهتديت إني هرشه باسبراي زي اللي بيتعمل بيه جرافيتي في الشوارع، هرسم جنينة وورود بشكل فوضوي قال يعني عمل سيريالي، وأكيد شكلها هيكون أحلى من الحيطة أم دهان متآكل.

 

دي كانت حلول بسيطة لمشاكل رخمة في البيت، من السهل تطبيقها في بيوتنا بطريقة مش مكلفة، لو عندك مشاكل تانية نفسك تلاقيلها حل، أو لو عندك حلول مطرحتهاش، بتمنى إنك تشاركيهم معانا.

المقالة السابقةمستر محمد فؤاد
المقالة القادمةرسالة إلى مريم

ترك الرد

الرجاء إدخال تعليقك!
الرجاء إدخال اسمك هنا