10 أفكار للاستفادة من انقطاع الكهرباء

1805

تعد مشكلة الطاقة من المشاكل العالمية اللي كل الدول بتتكاتف عشان تلاقيلها حل. وفي مصر في الفترة الحالية زادت بشكل كبير مشاكل الطاقة، وخاصة مشاكل الطاقة الكهربية، وبقينا بنعاني كتير جدًا ولفترات طويلة من انقطاع التيار الكهربائي. 

 

والنهارده بنقدملك 10 أفكار للاستفادة من فترات انقطاع التيار الكهربي.

 

1- هوّي البيت

في الصيف دايمًا بنكون مقفلين البيت ومشغلين المراوح والتكييفات، لدرجة إن الحوائط بتحتفظ بالحرارة ونحس دايمًا إن البيت درجة حرارته أعلى من الشارع؛ استغلي فترة انقطاع التيار الكهربي وافتحي الشبابيك والبلكونات، ودخلي تيار هوا متجدد للبيت.

 

2- اعملي مكالمات التليفون المتأخرة

طول اليوم دايمًا بنبقى مشغولين لدرجة بتمنعنا من التواصل مع أهلنا والناس اللي بنحبهم. فترة انقطاع التيار الكهربائي فترة راحة إجبارية من الشغل ومن مسؤوليات البيت. فمن الممكن استغلالها في عمل المكالمات التليفونية اللي نتطمن بيها على أهلنا وأصدقائنا دون التأثير على شغلنا ومسؤولياتنا.

 

3- اقري على ضوء الشموع

انقطاع التيار الكهربائي فرصة مثالية لإحياء طقس كلاسيكي رومانسي، ألا وهو القراءة على ضوء الشموع. جربي تشتري شمعدان ومعاه شموع طويلة معطرة، واستغلي فترة انقطاع الكهرباء في القراءة.

 

4- اتكلمي مع شريك حياتك

كلنا دلوقتي بقينا بنعاني من مشكلة عدم التواصل اللي بينا وبين شركاء حياتنا، وبقى عادي جدًا إننا نلاقي الزوجين كل واحد منهم قاعد على جهاز اللاب توب بتاعه ومفيش أي كلام أو تواصل بينهم. خلي فترة انقطاع التيار الكهربائي فرصة إنكم تاخدوا هدنة من العالم الخارجي، واعملي كوبايتين شاي واقعدوا اتكلموا سوا.

 

5- اقعدي في الضلمة وريحي عينيكي

طول اليوم بنكون قاعدين ومركزين في شاشات الكومبيوتر والتليفزيون. الأطباء بينصحونا إننا نغمض عينينا ونريحها من الضوء ومن التركيز في الشاشات. استغلي فترة فترة انقطاع الكهرباء في إنك تقعدي في الضلمة وتريحي عضلات عينيكي المجهدة. 

 

6- شوفي الأفلام اللي مخزناها على اللاب توب

كلنا بنحمّل أفلام ونتأخر في مشاهدتها لحد ما نوصل لفترة نلاقي إن عندنا مشكلة في المساحات الفاضية من الداتا على أجهزة اللاب توب. استغلي فترة انقطاع الكهرباء في مشاهدة الأفلام الموجودة على جهاز اللاب توب وقرري إيه يستحق تحتفظي بيه وإيه يستحق يتمسح. 

 

7- رتبي فولدرات اللاب توب

مشكلة الفوضى على أجزة اللاب توب من المشكلات اللي كلنا بنعاني منها. استغلي فترة انقطاع الكهرباء، وبالتالي انقطاع الاتصال الإنترنت ورتبي فولدرات اللاب توب.

 

8- احكي حواديت لأولادك

مفيش قنوات كوكي وطيور الجنة وسبيس تون. استغلي فترة انقطاع الكهرباء في إنك تحكي لأولادك حواديت تنمّي بيها قدراتهم على التخيل، أو احكيلهم قصص دينية تقربيهم بيها من الأنبياء والرسل وترسخي بيها الآداب والقيم الدينية بداخلهم.

 

9- شاهدي مع أولادك ألبومات الصور العائلية واحكيلهم تاريخ العائلة بالتفصيل

عرفي أولادك على جدودهم وعلى أعمامهم وأخوالهم عن طريق الصور العائلية. وريهم صورك وصور والدهم القديمة، وخليهم يقارنوا ما بين ملامحكم دلوقتي وملامحكم زمان، ويقارنوا ما بين أسلوب اللبس وقصات الشعر وصور المصيف. الذكريات دي هي اللي بتنمي إحساس الطفل بالانتماء للعيلة.

 

10- اعملي مسرح خيال الظل مع الأولاد

الموضوع مش مكلّف ومش محتاج منك أكتر من كشاف كبير ومجموعة عرائس ورقية، ولو كان صعب تنفذيه في البيت تقدري إنتي وأولادك تعملوا أشكال من الظلال على الحائط باستخدام أيديكم.

 

وفي النهاية.. أحب أقولكم إن استغلال أوقات انقطاع الكهرباء في أي نشاط منزلي أفضل بكتير من إننا نقعد مستسلمين للملل بفعل الظلام وارتفاع درجة الحرارة.

المقالة السابقةهي مش عصفورة؟ بس جبارة!
المقالة القادمةتضيق فأبحث عن هيفاء

ترك الرد

الرجاء إدخال تعليقك!
الرجاء إدخال اسمك هنا