يوم مفتوح للدلال

525

-ماما أنا نويت أقص شعري.

-لما تتجوزي ابقى اعملي اللى انتى عايزاه.

 

-بابا ممكن أغير لون أوضتي وأرسم حاجات ع الحيط؟

-لما تروحي بيتك ساعتها أنتى حرة.

 

-ماما عايزة أسافر رحلة مع الكلية.

-لما تبقى على ذمة راجل ابقى خليه يوديكى البلد اللى نفسك فيها.

 

ليه الأهل/المجتمع بيعملوا فى البنت كده! ليه بيربطوا سعادتها وراحتها بحلم بعيد يمكن يتحقق أو ميتحققش؟ وليه يأجلوا فرحتها ويجبروها تقعد حاطة إيديها على خدها مستنية بكرة يجيب معاه علب الألوان عشان يلون حياتها –لو مكنش عنده مانع ده لو جه أساسًا-ا؟

 

عزيزتي.. إوعى تسمعى كلام أى حد عايز يقصقص جناحاتك ويحَجِّم أحلامك، ولا تقعدى مستنية حد يحبك ويدلعك، حبي أنتِ روحك، دللي نفسك بنفسك، جربى ولو مرة كل شهر تخصصي يوم ليكي وبس تشحنى فيه روحك وتشيلى من عليها غبار المشاكل والمسئوليات.

 

 شوفي إيه اللى بتحبيه واعمليه، على سبيل المثال: انزلي اعملي شوبينج، روحي سنيما، اتفرجي على أفلام أو مسلسلات بتحبيها، اسمعى مزيكتك المفضلة، ارقصي، متطبخيش واشتري ديليفري لو متعودة تعملى الأكل أو اطبخي لنفسك أكتر أكلة بتحبيها وكُليها لوحدك، 

 

اشتري شيكولاتة أو اشربي فنجان قهوتك المظبوط، اقري شوية، املى البانيو مع شوية شموع وسيبى نفسك تسترخى، روحى سبا واعملى مانيكير وباديكير، قُصي شعرك واصبغيه، أو حطى مانيكير والمكياج اللى بتحبيه وخَلِّى حد من البيت يصورك وانتى بتضحكى من القلب.

 

فيه مليون طريقة و طريقة ممكن تدلعى بيهم نفسك، مش لازم تبقى الطريقة مكلفة، مش لازم تبقى بره البيت، المهم إنك متنسيش نفسك وسط الزحمة ومشاغل الحياة، ومتفرَّطيش فى حقك فى السعادة.  

 

من حق كل واحدة فى الدنيا تبقى مبسوطة ومستريحة وحواليها كل التفاصيل الصغيرة اللى بتملى أيامها ببهجة لأجل ما تعرف تكمل المشوار. ومفيش أى عقل أو منطق بيقولوا إن السعادة حلم مؤجل مرتبط بوجود شخص ما لو مجاش هنفضل كده محلك سِر مش مسموحلنا أبسط حدود الانبساط! 

 

السعادة عمرها ما كانت فى المحطة الأخيرة على أد ما هى فى تفاصيل الطريق

المقالة السابقةذات البعدين
المقالة القادمةالباستا (2)
امرأة ثلاثينية متقلبة المزاج، أعشق الرقص على السطور كتابةً، أُحب الفن بمختلف أنواعه وأعيش عليه. والآن كبرت وصار عليّ أن ألعب في الحياة عشرات الأدوار طوال الوقت، لأستيقظ كل صباح أُعافر حتى أستطيع أن أُحاكي بهلوانات السيرك فأرمي الكُرات المُلونة بالهواء ثم ألتقطها كلها في آنٍ واحد.

ترك الرد

الرجاء إدخال تعليقك!
الرجاء إدخال اسمك هنا