نصائح ووصفات لعيد سعيد على المعدة

بعد كل سنة وانتو طيبين مرة تانية، بما إننا في العيد، لازم نفتكر إن رمضان والعيد أوقات مبهجة للإنسان، بس للأسف مش مبهجين للمعدة البشرية تمامًا، اللي بتتعذب كتير خلال الشهر الفضيل، بالجوع طول اليوم ثم اتخامها بعد الفطار بالحلويات والعصائر وما لذ وطاب من محمر ومشمر، وأول ما تتعود على النظام الخرافي الجديد اللي بيفرضه عليها صاحبها بنعملها مفاجأة غير سعيدة، وهي العيد.

من مظاهر الفرح بالعيد إننا نكسر النظام الغذائي الصارم للصيام، وبالتالي بنصحى الصبح ننتقم من الجوع السابق، وناكل الكحك والبسكويت مع الشاي واللبن، وبعدين نبدأ بالمكسرات واللب والترمس، لغاية ما ييجي معاد الغداء واللي بيكون سابق لميعاد الإفطار في رمضان أكيد، وبالتالي في الوقت اللي كانت المعدة متعودة فيه تكون فاضية، دخلّها كمية أكل غير معقولة وغير متناسقة تجيب اضطراب في الهضم لأصحاب المعدة الحديدية.

الحل في شوية نصائح بسيطة نخفف بيهم على معدتنا وناكل اللي نفسنا  فيه برضو ونعيّد.

1. فرحة العيد متمثلة في حاجات تانية كتير غير الأكل بانتقام، عشان كده حضروا برنامج مبهج للعيد، سواء زيارات أو فسحة في مكان جميل وجديد، أو حتى توضيب البلكونة عشان تبقى مكان نقعد فيه نغير جو.

2. زي ما كنت بتفطر على تمر في رمضان عشان المعدة محتاجة سكريات خفيفة سهلة الامتصاص، فده يسري على أيام العيد كمان، عشان نحضر المعدة للتغير الكبير في النظام بعد رمضان.

3. وجبة الإفطار الضخمة مش بتدي طاقة لليوم اللي مليان أنشطة في العيد، بالعكس دي هتزوّد إحساس الخمول، وبالتالي كل الأنشطة المحضّر لها مش هتحصل وهننام بعد صلاة العيد للمغرب واليوم يضيع مننا.

4. تقليل الأطعمة الدسمة قدر الإمكان في وجبة الغداء، اللي بتكون في موعد مختلف عن الإفطار في رمضان، وبالتالي مينفعش نربك المعدة بميعاد مبكر ومليان دهون ودسم.

5. الناس اللي بتشرب مشروبات غنية بالكافيين بتعاني في رمضان بالتأكيد، لكن ده مش سبب منطقي إننا نغرق في بحر من النسكافيه في أول يوم العيد، ده مش هيعوّض عن حرمان الأيام اللي فاتت، لكن هيقلل سرعة الهضم، ويسبب اضطراب في المعدة أكيد.

في حالة إنكم هتتغدوا في البيت، وإن الأم عايزة تعيد زي بقية العيلة فمن حقها إن الغدا يكون خفيف، فبعد تقضية شهر رمضان في المطبخ الحر عشان تطبخ لعيلتها هي كمان نفسها ترتاح، واخترنا كذا وصفة سهلة وسريعة وخفيفة على المعدة للعيد.

المشويات تعتبر أسهل أكل في الهضم، واخترنا الدجاج عشان أخف من اللحوم الحمراء، وهنا وظيفة الأم إنها تتبل الدجاج من اليوم السابق بتتبيلة مميزة، وتركها لتاني يوم، وعلى الأولاد والأب شوي الدجاج، سواء على شواية فحم، أو شواية كهرباء، ده هيكون نشاط مميز لليوم يلم العيلة وفي نفس الوقت وجبة بسيطة ومش مرهقة للأم، وممكن الدجاج يتقدم مع الخبز والسلطة والبطاطس المحمرة، ودي طريقة تتبيلة مضمونة للدجاج.

• بصل

• طماطم

• زبادي

• ملح

• فلفل أسود

• بهارات

• دبس رمان

تضرب المكونات مع بعضها في محضر الطعام، وتضاف على الدجاج قبل الشوي بعدة ساعات أو قبلها بيوم، ويراعى إن الدجاج يغطى بالتتبيلة وتحت الجلد لطعم أفضل.

دايمًا الأولاد بتحب أكل برة البيت والتيك أواي عشان ساندوتشات سهل أكلها وشهية، ممكن في العيد نعمل في البيت بوفيه ساندوتشات متنوعة وشهية لكل أفراد الأسرة، ومع البطاطس المحمرة والعصائر الطبيعية هتكون وجبة مغذية وسهلة، والأطفال ممكن تشارك في عملها كمان وده بيخفف أكيد على الأم.

• علبة تونة

• بصل مقطع مكعبات

• مايونيز

• مسطردة

• خيار مخلل

• عصير الليمون

• ملح

• فلفل أسود

ضيفي المكونات مع بعضها بالمقادير المناسبة ليكي، واحشي بيها العيش المفتوح مسبقًا.

المقادير:

• صدور دجاج مخلية

• عصير ليمون

• مسطردة

• ثوم مهروس

• زيت زيتون

• ملح

• فلفل أسود

 تبلي الدجاج المقطع أصابع عريضة بالتتبيلة السابقة لمدة ساعتين، ثم دخليها الفرن حتى ينضج.

 اصنعي صوص من البقدونس المفروم، والمايونيز وعصير الليمون.

 ضعي طبقة من الصلصة، ثم الخس، ثم الدجاج المشوي.

• قطع لحم ستيك مقطعة شرائح طويلة رفيعة

• فلفل أخضر مقطع شرائح طولية رفيعة

• بصل حلقات

• ثوم مفروم

• زيت نباتي

• مايونيز

• ملح

• فلفل أسود

 في المقلاة سخني الزيت ثم ضعي اللحم واتركيه مع التقليب حتى يتغير لونه، وبعد ذلك أضيفي الملح والبهارات كما تحبين.

 أضيفي الفلفل والبصل ومعلقة زيت إضافية وقلبي حتى يذبل الخضار، ويكتمل نضج اللحم.

 حضري الصوص من المايونيز والثوم بخلطهم معًا.

 ادهني الخبز بالصوص ثم ضعي الستيك والخضار.

 ممكن تضيفي خضراوات طازجة زي الخيار الشرائح أو الجزر أو أي نوع تحبيه.