نصائح للاستعداد للولادة الطبيعية

1432

ملحوظة: لو إنتي حامل أنصح بتجنب قراءة الفقرة الأولى تمامًا، ممكن تنطي على الفقرة التانية على طول، مش هيفوتك كتير.

 

القريبين مني عارفين إن ولادتي لبنتي الأولى كانت مجهدة جدًا نفسيًا وجسديًا، ولادتها تزامنت مع أحداث الثورة، وحرمتني من المشاركة فيها وتزامنت مع ظروف شخصية تانية معقدة، وكل ده خلاني مريت بفترة اكتئاب طويلة استمرت سنتين تقريبًا وخلت علاقتي بيها معقدة طول السنتين دول، أما جسديًا فالولادة كانت صعبة وفترة المخاض كانت طويلة (36 ساعة من بداية الطلق لحد الولادة) والولادة نفسها كان فيها تفاصيل منهكة ومؤلمة جدًا، الأصعب على الإطلاق كان إني في أثناء الولادة من شدة الألم مكنتش قادرة أنظم عملية التنفس خالص ولا الدفع، وده تعبني جدًا وصعّب عملية الولادة، كنت خلاص منهكة ومرهقة والألم أصعب من احتمالي لدرجة إني فقدت وعيي في لحظة خروج الرأس!

بعد كده اكتشفت إن التجربة المؤلمة دي كانت من أسباب اكتئابي بعد الولادة، واللي أدى بدوره إني مقدرش أتواصل مع بنتي بسهولة أو أحبها فعلاً لفترة طويلة (واللي ممكن أحكي عنه في مقال تاني).

 

في تجربتي التانية أخدت قرار إني قدر الإمكان أتجنب مسببات الاكتئاب في التجربة الأولى، طبعًا كله بإيد ربنا وتجربة الولادة بتختلف من ولادة للتانية ومن شخص للتاني، بس حاولت أساعد نفسي قدر الإمكان.

 

– اتناقشت مع جوزي لفترات طويلة قبل الولادة في مخاوفي، وهو الحقيقة كان متعاون جدًا، سمع مني حدوتة ولادتي الأولى بكل تفاصيلها المؤلمة أكتر من عشروميت مرة وده ساعدني على تهدئة القلق، كمان اتناقشت معاه في خيارات الولادة وشرحتله إيه اللي عايزاه يحصل (مكان الولادة/ التخدير لو هتلجأوا إليه/ الاتصالات اللي محتاجاه يعملها/ مين يكون موجود لو فيه خيار إن حد يكون موجود معاكم).

(ملحوظة: الأزواج مش دايمًا معاهم العصاية السحرية اللي يقدموا بيها الشكل المناسب من الدعم اللي إنتي محتاجاه، لو حاسة إن الطريقة اللي بيدعمك بيها غير مجدية قولي اللي إنتي محتاجاه في نقط واضحة ومركزة، على سبيل المثال: محتاجاه يناقش الحاجات المقلقة ويفندها معاكي، ولا محتاجاه يقولك إنه هيبقى جنبك وكل حاجة هتبقى كويسة، ولا محتاجاه يسكت ويبطل رغي ويحضنك بس. لازم تبقي فاهمة إنتي محتاجة إيه، لو إنتي مش فاهمة نفسك واحتياجاتك كويس متستنيش ده من حد تاني).

 

– لو جوزك هيحضر معاكي عملية الولادة (والخيار ده أصبح متاح في مستشفيات كتير) حاولي تجهزي وتجهزيه نفسيًا للي هيحصل، وغالبًا مهما كان متخيل إنه جاهز اللي بيحصل بيبقى أقسى من تخيلاته، لو حاسة إنه مش هيدعمك كفاية أو وجوده هيكون مزعج ليكي أو هيضغط عليكي بأي شكل بلاش منه.

 

– قدر الإمكان انتهي من المهام المؤجلة قبل الولادة، كلنا عندنا مهام مؤجلة ﻷجل غير مسمى، لو عندك حبة وقت قبل الولادة حاولي تخلصي منهم، لأن أكيد مهما كان الوقت ضيق قبل الولادة هيبقى أضيق بعد الولادة (شغل متعطل، مكالمات أو إيميلات مؤجلة، دواليب محتاجة تتنظم).

 

– كمان لو بتشتغلي وينفع تخلصي جزء من شغلك بدري اعملي ده، جهزي البيت واحتياجاته، ولو تقدري تجهزي وجبات وتحفظيها في الفريزر ده هيساعدك جدًا.

 

– لو ده طفلك الأول اقضي أطول وقت ممكن مع نفسك ومع شريكك، حبي نفسك ودلعيها، اتمشي مع نفسك، قابلي أصحابك، مارسي الهوايات اللي بتحبيها واقري واتفرجي على أفلام (مش بقول إنك مش هتقدري تعملي ده بعد الولادة، طبعًا بشوية تنظيم للوقت إيقاع حياتك هيتظبط وهتقدري تلاقي وقت لنفسك، بس أول شهرين أو تلاتة بيكونوا صعبين فعلاً).

 

– لو ده طفلك التاني حاولي تلاقي وقت تعملي كل الحاجات اللي في النقطة اللي فاتت، بالإضافة لإنك تستمتعي بوقتك مع طفلك الأول قبل ما ييجي حد ياخد شوية من وقتك واهتمامك المركز عليه، العبوا مع بعض وكلميه دايمًا عن مشاعرك تجاهه، حاولي تجهزيه للمرحلة الجاية، لو فيه حد هيساعدك بعد الولادة في العناية بالطفل الأول خليه يقضي وقت أطول معاه قبل الولادة عشان يتجهز وميتفاجئش.

 

– اللي نفعني جدًا كمان إني حاولت قدر الإمكان أقرا عن مراحل الولادة وأفهم تفاصيل كل مرحلة، كمان تمرينات التنفس أثناء الولادة، ذاكرتها كويس وسجلتها ع الموبايل وخدتها معايا، وفعلاً ده ساعدني جدًا على تجاوز الألم والوعي بكل مرحلة من مراحل الولادة:

 

المرحلة الأولى: مرحلة اتساع عنق الرحم

ودي أطول مرحلة، بيبدأ خلالها عنق الرحم في التمدد، وبتبدأ انقباضات الرحم اللي بتكون كل 5 – 10 دقايق وبتزيد سرعتها وشدتها بالتدريج.

خلال المرحلة دي تجنبي القيام بدفع الجنين نهائيًا، حاولي تتحركي بين الطلقات أو تتمشي، ممكن حد يعمل تدليك خفيف لأسفل ضهرك لمساعدتك في تخفيف الألم، وممكن تاخدي دش دافي في بدايتها، وتقدري تستخدمي طريقة تنفس من دول:

 

1- التنفس البطني:

مع مجيء الطلقة الأولى استخدمي التنفس البطني، يعني البطن بس اللي بترتفع في الشهيق. خدي نفس عميق ببطء من الأنف وملء البطن مع تدليك البطن بالكفين بحركة خفيفة وناعمة من وسط أسفل البطن إلى الجانبين، ثم الزفير من الفم ببطء، وتقدري تكرري الحركة دي حوالي 10 مرات أثناء الطلقة الواحدة.

 

2- التنفس الصدري:

ودي طريقة تانية ممكن تستخدميها في المرحلة الأولى قبل مرحلة دفع الجنين. خدي ببطء نفس عميق ملء الصدر، ثم الزفير من الفم ببطء، وكرري التنفس حوالي 10 مرات أثناء الطلقة الواحدة. والطريقتين دول ساعدوني على التركيز والاسترخاء والتخفيف من إحساسي بالألم، حاولي تسترخي وتستجمعي طاقتك ومتهدريهاش في الصريخ.

بين كل طلقة والتانية قدر الإمكان حاولي تسترخي.

 

المرحلة التانية: بتبدأ مع وصول عنق الرحم ﻷقصى اتساع له، وبتنتهي بولادة الطفل:

المرحلة دي أسرع من الأولى وممكن تستمر حوالي ساعتين، خلال المرحلة دي بتساعدي الجنين في الخروج باستخدام تمرين حبس النفس والدفع، مع مجيء الطلقة ارفعي الراس والرجلين وخدي نفس عميق واحبسيه وادفعي للأسفل بأقصى قوتك أثناء الطلقة (مثلما يحدث أثناء عملية التبرز).

مع الاسترخاء التام والراحة بين كل طلقة والتانية، وممنوع تمامًا الضغط بالطريقة دي قبل مرحلة دفع الجنين.

 

التنفس السريع والسطحي:

مع ظهور رأس الجنين (الدكتور هيقولك وهيطلب منك تتوقفي عن الدفع) لازم توقفي تمامًا الضغط وتبدئي تتنفسي بشكل سريع وسطحي (كأنك بتنهجي بعد الجري) وده لتفادي حدوث تمزق في فتحة المهبل خصوصًا مع الولادة البكرية. وممكن تستخدمي الطريقة دي كمان لو حسيتي برغبة في الدفع قبل ما وقته يبدأ.

 

المرحلة التالتة: بعد ولادة الطفل وحتى نزول المشيمة:

في المرحلة دي بتستمر انقباضات الرحم لدفع المشيمة للخارج ومبيكونش فيها آلام شديدة.

 

والحمد لله تجربة الولادة التانية كانت أسهل فعلاً وكنت واعية فيها بكل اللي بيحصل، واستمتعت بلحظة خروج بنتي من جسمي وانتقالها لحضني. وأقدر أقول إني (لو تناسينا الألم) استمتعت بالمعجزة دي وهي بتتم قدام عيني، استمتعت برحمة ربنا وفضله ورضاه اللي اتحول لكائن صغير بين إيديا.

المقالة السابقةإنهن حتمًا لا ينفسن هناك
المقالة القادمةعلمي أولادك إزاي يقدروكي

ترك الرد

الرجاء إدخال تعليقك!
الرجاء إدخال اسمك هنا