في مسلسل "فيه حاجة غلط" كان فيه شخصية شريرة اسمها "المعلم عطوة"، بعيدًا عن ملابسات الشخصية وصفاتها، كان أكتر ما لفت نظري في الشخصية دي وأنا صغيرة إنه دايمًا كان بيعمل حركة كنت بقلدها بدافع الطفولة، ولما كبرت عرفت أهميتها، الحركة دي كانت عبارة إنه كان بيحضن نفسه حرفيًا ويبوس نفسه على كتفه ويقول لنفسه "حبيبي يا عطوة".. الحقيقة إن ده أقدم وصف جه في دماغي لما سمعت أغنية "مايستاهلوشي" بتاعة "أبلة فاهيتا" لما كانت بتقول "وهحضن نفسي وأدلع نفسي، ما هو أصل الناس مايستاهلوشي".
بعيدًا بقى عن إن الناس يستاهلوا أو ميستاهلوشي.. أنا بقيت أم من ست شهور، مع تقلبات هرمونات الأمومة ومسؤولياتها، عادة بحس بضغط زيادة، وفهمت حاجات كتير وتصرفات كنت بشوفها في أمي وأمهات تانية عايشتهم، زي خالاتي وأمهات صاحباتي وحتى قريباتي وصاحباتي اللي سبقوني لدور الأمومة.
فيه إعلان كان بيقول "الأمومة مش سهلة بس مستاهلة"، تقريبًا أنا مش عارفة أعد عدد الأبهات اللي بتقول الجملة دي للأمهات من باب إنهم يواسوهم، بس الحقيقة إن الأم اللي بتكون مطحونة مع طفل أو اتنين بتبقى عارفة إن الامومة مش سهلة ومستاهلة وكل حاجة، بس بتبقى محتاجة حاجة تانية تتطبطب عليها أو تعدلها مزاجها، لأن هي عارفة إنها في مهمة عمل شاق مستمرة لحد آخر لحظة في عمرها.
أعرف أمهات كتير كل يوم تستنى حد يقدرها أو يعملها حاجة تبسطها، أو تقول لنفسها: بكرة هخصص وقت لنفسي، بكرة هلاقي حد يساعدني مع ابني/ بنتي، وبكرة يشد بكرة يشد بعده، لحد ما تبص في المراية تلاقي نفسها مش فاكرة هي مين أصلاً.
الحقيقة إن أعظم توجه لتدليع النفس هو فعلاً إنك تبتدي من نفسك تدلعي نفسك، ده مش إنكار لحب الناس اللي حوالينا لينا، ولا حتى نظرة ليهم إنهم مش هيعملوا حاجة لينا، لكن ده في سبيل إننا كأمهات زي ما بنعمل لأولادنا ولأهلنا ولأزواجنا ولأسرنا الصغيرة حاجات يحبوها، فإحنا كمان لازم نيجي على رأس قائمة الأولويات في حياتنا، ولو مجيناش على رأس قائمة الأولويات، وده اللي عادة بيحصل، فإحنا منمحيش نفسنا ببساطة من القائمة دي.
وطبقًا لتوجُّه "حبيبي يا عطوة" و"هحضن نفسي وهدلع نفسي"، فمن حق الأم تتدلع، من خلال حاجات كتيرة ممكن تعملها لنفسها، حاجات بسيطة جوة البيت، زي:
1- اعملي كوباية أي مشروب بتحبيه واتفرجي على فيديوهات مضحكة على اليوتيوب واضحكي من قلبك.
2- روحي أقرب كافيه واشربي حاجة بتحبيها وساندوتش لذيذ، واستمتعي بخدمة الناس ليكي بدل خدمتك لنفسك وللغير طول الوقت.
3- اعملي قصة جديدة لشعرك كان نفسك فيها بقالك فترة، واستمتعي بالتغيير ومتندميش على قرارك بعد القص، أهم حاجة تختاري مكان يقصهولك زي ما إنتي عايزة مش زي ما هم عايزين.
4- اشتري فستان جديد تعرفي تلبسيه في أقرب وقت، بلاش الأحلام الخيالية بتاعة شراء فستان سواريه لمجرد إن شكله حلو ويفضل في الدولاب ميتلبسش أو يتلبس مرة واحدة.
5- اعملي طبخة بتحبيها. أفتكر إني اتكلمت مع كذا أم وعرفت منهم إنهم بياكلوا الأكل اللي بيحبوه العيال وأبوهم، وفي لحظة واحدة صاحبتي قالتلي فجأة بصيت للأكل وقولت أنا مش عاوزة آكُل من الأكل ده. اطبخي طبخة نفسك فيها فعلاً واستمتعي بطبخها وأكلها.
6- ولعي شمع بريحة في البيت أو استخدمي معطر جو طبيعي، الروائح من أكتر الحاجات اللي بتأثر على نفسيتنا ومزاجنا العام.
7- اختاري كريم إيد ريحته حلوة، طول اليوم إيدينا شغالة مع أولادنا وفي بيتنا وأحيانًا في شغلنا، دلعي إيدك بكريم ريحته حلوة وخليه معاكي في الشغل وقريب من المطبخ، واستخدميه بشكل منتظم في يومك.
8- اقري رواية حلوة، حتى لو كل يوم صفحة أو اتنين، متحصريش نفسك في قراءاتك عن الأمومة والطفولة وإدارة المنزل وخلافه، اختاري رواية سحرية تنقلك لعالم جديد.
9- العبي رياضة أو ارقصي مع أطفالك، ده هيعمل نشاط حلو ليكم إنتو الاتنين، وفي نفس الوقت هيديكي طاقة حلوة جدًا وهيقوي علاقتك بأطفالك من خلال نشاط ممتع.
10- اعملي روتين للعناية بنفسك، حتى لو حاجة بسيطة زي إنك تحطي كريم للوش قبل النوم وأول ما تصحي.
الحقيقة إن كل الاقتراحات دي مش دلع على قد ما هي حاجات بسيطة جدًا، لكن في وسط مسؤوليات البيت والأطفال المتكررة كل يوم والمتجددة كل يوم، بننسى نعمل حاجة لنفسنا حتى لو كانت ببساطة كوباية شاي، وإننا نحضن نفسنا ونقولها "حبيبي يا عطوة".
