اكتشفت مرة إني لامة شعري بقالي أسبوع. الكحكة المتينة بالتوكة المتينة في أجدعها مشوار. مع العلم إني مش بحب أصلًا ألم شعري. عشان كده كان الاكتشاف ده مقلق بالنسبالي. وعارفين اكتشفت الموضوع ده إزاي؟ لما بصيت في المراية. أصل أنا كان بقالي كذا يوم برضو مش لاقية وقت إني أبص في المراية.
ممكن تكوني اتعرضتي لموقف مشابه للموقف ده، مش شرط فيما يتعلق بلمة الشعر.. لأن لمة الشعر هنا مجرد رمز للتفاني في الاستسلام للعملية اللي بتلاقي الأم بالذات نفسها كتير جدًا مضطرة إليها.
ممكن يكون فيه لبس معين اتركن في آخر الدولاب خلاص، بالذات الفساتين والجيبات، أو مكياج نشف من قلة الاستخدام، أو هواية عفا عليها الزمان، أو أماكن بطلتي تروحيها، أو موسيقى بطلتي تسمعيها...
وطبعًا الهدف نبيل: المسؤوليات والبيت والأولاد.
واحده صديقتي حكتلي مرة إنها لبست جيبة بعد طول غياب، فلما شافها ابنها الصغير قال لها "ماما، إنت النهارده بنت!".
خلي بالك إن دي عملية تحول بتعدي فيها الواحدة مننا من غير ما تحس. وبتحصل بالتدريج، وممكن تستغرق سنين. ممكن تبدأ بحاجة بسيطة جدًا، وبتنازل بسيط.. وراه تنازل تاني.. وراه استسهال.. وراه تعوّد.. لغاية ما تتحول الواحدة مننا لكائن هي نفسها مستغرباه.
اكتشفت إن فيه حاجات سهلة وبسيطة ممكن تتعمل، بما لا يخل باحتياجك للعملية، وباحتياجك لأنك تكوني في وضع يسعفك ويساعدك على إنجاز مهامك اليومية ومسؤولياتك. أنا عارفة ومدركة إن ماسكات الزبادي والخيار وما إلى ذلك بقت مجرد ذكريات سعيدة من عهد ما قبل الخلفة. لكن على فكرة، اهتمامك بنفسك مهم مش بس ليكي، ده مهم جدًا كمان لأولادك وزوجك. مهم أوي أولادك يحسوا إن ماما أمورة ومش مبهدلة. ومش محتاجة أقولك أهمية الموضوع بالنسبة لزوجك.
لقيت إن النصائح دي ممكن تكون مفيدة وسهلة التنفيذ للأمهات المشغولات:
- البسي أكسسوارات جميلة، حتى على اللبس العادي، أو حتى في المشاوير العادية زي السوبر ماركت وتوصيل الأطفال للحضانة أو المدرسة. الأكسسوار سهل اللبس وبيدي مظهر جميل.
- اشربي ماء كتير. شرب الماء مفيد جدًا للبشرة ونضارتها، ومش بس هيخليكي أنشط، لكن هيخلي شكلك حيوي أكتر كمان.
- خلي موعد استحمامك اليومي بالليل، بعد انتهاء المسؤوليات ونوم الأطفال. ده هيتيحلك فترة أطول من التمتع بالاستحمام من غير ما حد يقاطعك أو يطلب منك حاجة.
- اكتشفي لشعرك فورمة سهلة وجميلة في نفس الوقت، فورمة تكون مش بتحتاج مجهود كبير ولا وقت طويل لإنجازها.
- اتعرّفي على موديلات الملابس اللي بتليق عليكي، وبلاش لبس البهدلة والحاجات القديمة.
